ରାମ ନାମରେ ଗୁଞ୍ଜରିତ ଗଗନ ପବନ । ଦେଶଠୁ ରାଜ୍ୟ...ଗାଁଠୁ ସହର ମର୍ଯ୍ୟାଦାପୁରୁଷଙ୍କ ଜନ୍ମଦିନ ପାଇଁ ଉତ୍ସବ ମୁଖର । 9 ଦିନର ରାମଚରିତ ମାନସ ଓ ପାରାୟଣ ପରେ ଜନ୍ମ ନେଇଛନ୍ତି ପ୍ରଭୁ ଶ୍ରୀରାମ । ଏଣୁ ଖୁସି ଆଜି ଉଛୁଳା ନଦୀ ଭଳି ବୋଲ ମାନୁନି । ରାଜ୍ୟସାରା କେଉଁଠି ବାଇକ୍ ରାଲି ତ କେଉଁଠି ପୂଜାପାଠ ଚାଲିଛି । ରାମଭକ୍ତିରେ ଆତୁର ଭକ୍ତ ।

ଭବ୍ୟ ରୂପେ ସଜେଇ ହୋଇଛି ରାମଙ୍କ ଜନ୍ମଭୂମି ଅଯୋଧ୍ୟା ନଗରୀ । ବଡ଼ ଧୁମ୍ ଧାମରେ ପାଳନ କରାଯାଉଛି ଶ୍ରୀରାମନବମୀ । ଗଳିକନ୍ଦିରେ ପ୍ରକମ୍ପିତ ଜୟ ଶ୍ରୀରାମ ଧ୍ବନୀ । ରାମଲାଲାଙ୍କ ଦର୍ଶନ ଲାଗି ଲକ୍ଷ ଲକ୍ଷ ଭକ୍ତଙ୍କ ଭିଡ଼ ଜମିଛି । ସକାଳେ ପ୍ରଥମେ ପ୍ରଭୁ ରାମଲାଲାଙ୍କ ଅଭିଷେକ ହୋଇଥିଲା । ପରେ ସ୍ୱତନ୍ତ୍ର ଶୃଙ୍ଗାର କରାଯାଇଥିଲା । ଠିକ୍ ମଧ୍ୟାହ୍ନ ୧୨ଟା ସମୟରେ ସୂର୍ଯ୍ୟ ତିଲକ ଧାରଣ କରିଥିଲେ ରାମଲାଲା । ପ୍ରଭୁଙ୍କ ଏ ଦିବ୍ୟ ରୂପକୁ ଚର୍ମ ଚକ୍ଷୁରେ ଦେଖି ଧନ୍ୟ ଭକ୍ତ । ଏହି ପବିତ୍ର ମୁହୂର୍ତ୍ତ ସୂର୍ଯ୍ୟ ଦେବଙ୍କଠାରୁ ସୂର୍ଯ୍ୟବଂଶୀ ପ୍ରଭୁ ରାମଙ୍କ ପାଇଁ ଏକ ସ୍ୱର୍ଗୀୟ ଆଶୀର୍ବାଦର ପ୍ରତୀକ, ଯାହାର ନିଦର୍ଶନ ଆଜି ଅଯୋଧ୍ୟାର ରାମ ମନ୍ଦିରରେ ଦୃଶ୍ୟମାନ ହୋଇଥିଲା ।

କେବଳ ଅଯୋଧ୍ୟା ନୁହେଁ ଓଡ଼ିଶା ବି ଆଜି ଦଶରତ ପୁତ୍ରଙ୍କ ପ୍ରେମରେ ବିଭୋର । ରାଜ୍ୟର ବିଭିନ୍ନ ସ୍ଥାନରେ ଫୁଲରେ ସଜେଇ ହୋଇଛି ରାମ ମନ୍ଦିର । ଶ୍ରୀରାମ ନବମୀ ପାଇଁ ସଂପୂର୍ଣ୍ଣ ଗେରୁଆମୟ ହୋଇଛି ଭଦ୍ରକ ସହର । ରାମ ସଂକୀର୍ତ୍ତନ, ବିଶ୍ବ ଶାନ୍ତି ମହାଯଜ୍ଞ, ହନୁମାନ ଚାଳିଶାରେ ସବୁଠି ଭକ୍ତିମୟ ପରିବେଶ । ଉପମୁଖ୍ୟମନ୍ତ୍ରୀ ପ୍ରଭାତି ପରିଡା,ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀ, ରାଜ୍ୟ ବିଜେପି ସଭାପତି ମନମୋହନ ସାମଲ, ଭଦ୍ରକ ବିଧାୟକ ଶିତାଂଶୁ ଶେଖରମହାପାତ୍ର ଭଦ୍ରକରେ ରାମଙ୍କ ଦର୍ଶନ ସହ ପୂଜାର୍ଚ୍ଚନା କରିଛନ୍ତି ।

ସେହିପରି ରାମ ନାମରେ ଉଠୁଛି ପଡୁଛି ରାଜଧାନୀ ଭୁବନେଶ୍ବରର ରାମମନ୍ଦିର । ହଜାର ହଜାର ଭକ୍ତଙ୍କ ଜମିଛି ଭିଡ଼ । ପତ୍ନୀଙ୍କ ସହ ମନ୍ଦିର ଯାଇ ରାମଙ୍କ ଦର୍ଶନ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ସେପଟେ ଶ୍ରୀମନ୍ଦିରରେ ଶ୍ରୀରାମ ଜନ୍ମନୀତି ପାଇଁ ଅପରାହ୍ନ ୫ଟାରୁ ରାତି ୧୦ଟା ପର୍ଯ୍ୟନ୍ତ ସର୍ବସାଧାରଣଙ୍କ ଦର୍ଶନ ବନ୍ଦ । ସ୍ୱୟଂ ପ୍ରଭୁ ଶ୍ରୀଜଗନ୍ନାଥ ମାତା ରୂପ ଧାରଣ କରି ଶ୍ରୀରାମଙ୍କୁ ଜନ୍ମଦେବାର ବିଧି ରହିଥାଏ । ଏଥିସହ ଆଜିର ଦିନରେ ରଥକାଠ ଚିରଟର ଶୁଭ ଅନୁକୂଳ ହେବାର ରହିଛି ପରମ୍ପରା ।

ଶ୍ରୀରାମନବମୀରେ ସମ୍ବଲପୁର ବୃକ୍ସହିଲ ସ୍ଥିତ ରାମ ମନ୍ଦିରରେ ରାମଙ୍କ ଆର୍ଶୀବାଦ ନେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ପଞ୍ଚାୟତିରାଜ ମନ୍ତ୍ରୀ ରବି ନାଏକ ।

ରାଜ୍ୟସାରା ରାମ ମନ୍ଦିରେ ଆଧ୍ୟାତ୍ମିକ ପରିବେଶ । ମର୍ଯ୍ୟାଦା, ଧର୍ମ, ତ୍ୟାଗ ଏବଂ ସତ୍ୟର ପ୍ରତୀକ ଭଗବାନ ଶ୍ରୀରାମଙ୍କର ଭକ୍ତିରେ ଲୀନ ଭକ୍ତ ।

ଚୈତ୍ର ଶୁକ୍ଳ ନବମୀ ରାମ ନବମୀ ରୂପେ ପରିଚିତ । ଏହି ଦିନ ରାମଚନ୍ଦ୍ରଙ୍କ ଜନ୍ମୋତ୍ସବ ପାଳନ କରାଯାଏ । ଭକ୍ତି, ଉପାସକ, ତପସ୍ୟା, ସତ୍ୟ, ବଳିଦାନ, ପ୍ରେମ ଏବଂ କର୍ତ୍ତବ୍ୟର ଏକ ଜୀବନ୍ତ ଉଦାହରଣ ଶ୍ରୀରାମ । ଆଜି ଭଳି ପବିତ୍ର ଦିନରେ `X'ରେ ପୋଷ୍ଟ କରି ଶୁଭେଚ୍ଛା ଜଣାଇଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସମେତ ପ୍ରଧାନମନ୍ତ୍ରୀ ମୋଦି ଓ ମୁଖ୍ୟମନ୍ତ୍ରୀ ମୋହନ ମାଝୀ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV