Peepal Tree Incident / ଅଜବ ପ୍ରତିବାଦ… ଅଳିଆ ସମସ୍ୟାକୁ ନେଇ ଅଶ୍ବତଥ ଗଛରେ ପୂଜାରୀ… ୪୫ ମିନିଟର ହାଇଡ୍ରାମାରେ ପୋଲିସ ନାକେଦମ

ମୁମ୍ବାଇରେ ଅଳିଆ ଆବର୍ଜନା ସମସ୍ୟାକୁ ନେଇ ଅଜବ ପ୍ରତିବାଦ। ବାରମ୍ବାର ଅଭିଯୋଗ ସତ୍ତ୍ୱେ ଅଶ୍ବତଥ ଗଛ ତଳୁ ଅଳିଆ ସଫା ନହେବାରୁ ରାଗିଗଲେ ମନ୍ଦିରର ଜଣେ ପୂଜକ। ଶେଷରେ ପ୍ରତିବାଦ ଜଣାଇବାକୁ ସିଧା ଗଛ ଉପରେ ଚଢ଼ିଗଲେ। ତାଙ୍କୁ ତଳକୁ ଓହ୍ଲାଇବା ପାଇଁ ପୋଲିସ ଓ ଅଗ୍ନିଶମ ବାହିନୀକୁ କରିବାକୁ ପଡ଼ିଲା ନାକେଦମ। ପ୍ରାୟ ୪୫ ମିନିଟ୍ ଧରି ଚାଲିଲା ହାଇଡ୍ରାମା। ଶେଷରେ ସୁରକ୍ଷିତ ଭାବେ ଗଛରୁ ତଳକୁ ଓହ୍ଲାଇଲେ ପୂଜକ। କାହିଁକି ଏମିତି ପ୍ରତିବାଦ କଲେ ସେ? ଆସନ୍ତୁ ଜାଣିବା ପୂରା ଘଟଣା।

ବାରମ୍ବାର ମନା କରିବା ସତ୍ତ୍ବେ ପବିତ୍ର ଗଛ ମୂଳରେ ଲୋକେ ଜାଣିଶୁଣି ଅଳିଆ ପକାଇଥିଲେ। ଆଉ ଏହା ଉକ୍ତ ପୂଜାରୀଙ୍କୁ ଜମା ଭଲ ଲାଗୁ ନଥିଲା। ସିଓନ-କୋଲିୱାଡା ଅଞ୍ଚଳର ହନୁମାନ ମନ୍ଦିରର ପୂଜକ ଲାଲତୁନ ଝା ଏକ ଉପାୟ ଚିନ୍ତା କଲେ। ରାଗରେ ଗରଗର ହୋଇ ଅଶ୍ବତଥ ଗଛ ଉପରେ ଚଢ଼ିଯାଇଥିଲେ। ତାଙ୍କର ପ୍ରତିବାଦ ପ୍ରାୟ ୪୫ ମିନିଟ୍ ଧରି ଚାଲିଥିଲା।

କିଛି ସମୟପରେ ଘଟଣାସ୍ଥଳରେ ଭିଡ଼ ଜମା ହୋଇଥିଲା ଏବଂ କିଛି ଅଘଟଣ ଘଟିବାର ଆଶଙ୍କା କରି ପୋଲିସ ଏବଂ ଅଗ୍ନିଶମ ବାହିନୀ ଦଳକୁ ଡକାଯାଇଥିଲା। ଏହି ସମ୍ପୂର୍ଣ୍ଣ ଘଟଣାଟି ବିଏମସିର ଏଫ/ଉତ୍ତର ୱାର୍ଡ ସହିତ ଜଡ଼ିତ। ପୂଜକ ଲାଲତୁନ ଝା ଅଭିଯୋଗ କରିଛନ୍ତି ଯେ ସ୍ଥାନୀୟ ଲୋକ ଏବଂ ଅଳିଆ ଆବର୍ଜନା କର୍ମଚାରୀମାନେ ନିୟମିତ ଭାବରେ ଏଭଳି ଅଳିଆ ଆବର୍ଜନା ପକାନ୍ତି।

ଫଳସ୍ୱରୂପ, ଗଛ ଚାରିପାଖରେ ନିରନ୍ତର ମଇଳା ଜମା ହୁଏ। ଏହି ସମସ୍ୟା ବିଷୟରେ ଅନେକ ଥର ଅଭିଯୋଗ କରିଛନ୍ତି, କିନ୍ତୁ ପରିମଳ ବ୍ୟବସ୍ଥାରେ କୌଣସି ଉନ୍ନତି ହୋଇନାହିଁ। ପ୍ରଶାସନର ଅବହେଳା ଯୋଗୁଁ ହତାଶ ହୋଇ ସେ ପ୍ରତିବାଦର ଏହି ପଦ୍ଧତି ଆପଣାଇଛନ୍ତି।  ଶେଷରେ ଆଣ୍ଟପ ହିଲ୍ ପୋଲିସ ଏବଂ ଅଗ୍ନିଶମ ବାହିନୀ ଦଳ ଘଟଣା ସ୍ଥଳରେ ପହଞ୍ଚିଥିଲେ। ପୂଜାରୀଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ, ତଳକୁ ଓହ୍ଲାଇବା ସମୟରେ କୌଣସି ଅପ୍ରୀତିକର ଘଟଣା ନ ଘଟିବା ଲାଗି ଗଛତଳେ ଏକ ସୁରକ୍ଷା ଜାଲ ବିଛାଯାଇଥିଲା।

ପ୍ରାୟ ୪୫ ମିନିଟ୍ ଧରି ଚାଲିଥିବା ଏହି ଘଟଣା ପରେ, ପୂଜାରୀ ଲାଲତୁନ୍ ଝା ସୁରକ୍ଷିତ ଭାବରେ ତଳକୁ ଓହ୍ଲାଇ ଆସିଲେ। ଘଟଣାସ୍ଥଳରେ ଉପସ୍ଥିତ ଲୋକମାନେ ଏବଂ ଉଦ୍ଧାରକାରୀ ଦଳ ଆଶ୍ବସ୍ତିର ନିଃଶ୍ବାସ ମାରିଥିଲେ।