ରାଜ୍ୟରେ ଜାରି ରହିଛି ଲଘୁଚାପ ଜନିତ ବର୍ଷା । ବର୍ଷା ଯୋଗୁ ନାହିଁ ନଥିବା ହୀନସ୍ତା ହେଉଛନ୍ତି ଲୋକେ । ସବୁଠୁ ଅଧିକ ପ୍ରଭାବିତ ହୋଇଛି ବାଲେଶ୍ବର ସହର । ବର୍ଷା ଜଳର ନିଷ୍କାସନ ହୋଇପାରୁନି। ୩ ଦିନ ଧରି ଜଳ ବନ୍ଦୀ ଅବସ୍ଥାରେ ସହରବାସୀ । ସହରରେ ଅନେକ ଘରେ ବର୍ଷାଜଳ ପଶିଛି । ନାହିଁ ନଥିବା ସମସ୍ୟା ଭୋଗୁଛନ୍ତି ଲୋକେ । କେଉଁଠି ସପିଂ ମଲ୍‌ରେ ବର୍ଷା ଜଳ ପଶିଛି ତ ଆଉ କେଉଁଠି ପୋଷ୍ଟ ଅଫିସରେ । ଏବେ ବି ସହରର ପ୍ରମୁଖ ସ୍ଥାନ ବାଲିଆଛକ, ନୁଆ ସାହି, ଗୁଡିପଦା, ଭାସ୍କରଗଞ୍ଜ, ତଳସାହି, ଏକତା ନଗର, ଲୋକନାଥ କଲୋନୀ ଆଦି ଅଞ୍ଚଳରେ ବର୍ଷା ଜଳ ଲହଡି ମାରୁଛି । ସେପଟେ ଉଚ୍ଛୁଳୁଛି ବୁଢାବଳଙ୍ଗ । ଗାଁରେ ପଶିଛି ନଦୀର ପାଣି । ବାଲେଶ୍ବର ବଲିଘାଟ- ପରିକ୍ଷୀ ମୁଖ୍ୟ ରାସ୍ତାରେ ୩ ଫୁଟର ବନ୍ୟାଜଳ ପ୍ରବାହିତ ହେଉଛି । ଫଳରେ ସଦର ବ୍ଲକର ୫ ପଞ୍ଚାୟତ ପ୍ରଭାବିତ ହେବା ଅଶଙ୍କା ରହିଛି ।

ବର୍ଷା ଯୋଗୁଁ ବ୍ରିଜ୍ ତଳେ ପ୍ରବଳ ପାଣି ସ୍ରୋତରେ ଫସିଲେ ଦୁଇ ଯୁବତୀ । କଳାହାଣ୍ଡି ଜିଲ୍ଲା ଥୁଆମୁଳରାମପୁର ବ୍ଳକ ଅଡ୍ରି ନିକଟସ୍ଥ ଚାନ୍ଦଗିରି ନାଳରେ ଘଟିଛି ଘଟଣା । ପ୍ରବଳ ବର୍ଷା ହେବାରୁ ଚାନ୍ଦଗିରି ନାଳରେ ହଠାତ୍ ପାଣି ଆସିଥିଲା । ଏହି ସମୟରେ ବଡବଫଲା ଗାଁର ଦୁଇ ଯୁବତୀ ବର୍ଷା ଯୋଗୁଁ ବ୍ରିଜ୍ ତଳେ ଆଶ୍ରୟ ନେଇଥିବାବେଳେ ପାଣି ମଝିରେ ଫସି ଯାଇଥିଲେ । ପରେ ସେମାନଙ୍କୁ ଉଦ୍ଧାର କରାଯାଇଥିଲା ।

ବର୍ଷା ଯୋଗୁଁ ପାହାଡ଼ରୁ ଧସିଛି ମାଟି ଅତଡ଼ା । ଗଜପତି ଜିଲ୍ଲା ଗୁମ୍ମା ବ୍ଲକ ନାମନଗଡ ପଞ୍ଚାୟତର ଏହି ଦୃଶ୍ୟକୁ ଦେଖନ୍ତୁ। ଗତ ଦୁଇ ଦିନ ଧରି ଲଗାତାର ବର୍ଷା ଲାଗି ରହିଥିବାରୁ ସକାଳୁ ମାଟି ଅତଡ଼ା ଧସି ଅଜୟଗଡ଼ ପଞ୍ଚାୟତକୁ ଯାତାୟତ ଠପ୍ ହୋଇଛି । ୧୦ରୁ ଅଧିକ ଗାଁକୁ ଯାତାୟାତ ବାଧାପ୍ରାପ୍ତ ହୋଇଛି ।

ବୈତରଣୀରେ ଆସିଛି ବନ୍ୟା । ଗତ ତିନି ମାସରେ ବୈତରଣୀରେ ଏହା ତୃତୀୟ ବନ୍ୟା । ବୁଧବାର ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ହୋଇଥିଲା । 14 ବ୍ଲକରେ 100 ମିମିରୁ ଅଧିକ ଓ 42 ବ୍ଲକରେ 50 ମିମିରୁ ଅଧିକ ବର୍ଷା ହୋଇଛି । ଯାହା ପ୍ରବଳରୁ ଅତି ପ୍ରବଳ । ଉପର ମହାନଦୀ, ବୈତରଣୀ, ବୁଢାଵଳଙ୍ଗ ଓ ବୈତରଣୀରେ ବହୁତ ବର୍ଷା ହୋଇଛି । କେବଳ ବୈତରଣୀରେ ଛୋଟ ବନ୍ୟା ଅଛି ବୋଲି କହିଛନ୍ତି ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ । ହୀରାକୁଦରେ 10 ଗେଟ ଦେଇ ଜଳ ନିଷ୍କାସନ ହେଉଛି । ଆବଶ୍ୟକ ପଡିଲେ, ଆହୁରି ଗେଟ ଖୋଲା ହେବ । ଜଳସ୍ତର ବୃଦ୍ଧି ହେବ, ହେଲେ ମହାନଦୀରେ ବନ୍ୟା ଆସିବ ନାହିଁ ବୋଲି କହିଛନ୍ତି ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ।