ଆହୁରି ୨୪ ଘଣ୍ଟା ରାଜ୍ୟରେ ପ୍ରବଳ ଶୀତ ହେବା ନେଇ ସୂଚନା । ଏହାସହ ୧୬ ଜିଲ୍ଲାକୁ ଶୀତ ଲହରୀ ପାଇଁ ସତର୍କତା ଜାରି କରାଯାଇଛି । ୧୧ ଜିଲ୍ଲାକୁ କୁହୁଡି ପାଇଁ ମଧ୍ୟ ସତର୍କତା ଜାରି କରାଯାଇଛି । ପଶ୍ଚିମରୁ ଉପକୂଳ, ପୂର୍ବରୁ ଦକ୍ଷିଣ ସବୁଠି ହାଡ ଭଙ୍ଗା ଶୀତ ଅନୁଭବ ହୋଇଥିବା ବେଳେ ଆହୁରି ୨୪ ଘଣ୍ଟା ରାଜ୍ୟରେ ପ୍ରବଳ ଶୀତ ନେଇ ସତର୍କତା ଜାରି କରିଛି ପାଣିପାଗ ବିଭାଗ ।

ପ୍ରବଳ ଶୀତ ପାଇଁ ରାଜ୍ୟରେ କୋଲଡ ୱେଭ୍ ବା ଶୀତ ଲହରୀ ଜାରି କରିଛି ବିଭାଗ । ଆସନ୍ତା ୨୪ ଘଣ୍ଟା ପାଇଁ ସୁନ୍ଦରଗଡ,ଝାରସୁଗୁଡା ,ଅନୁଗୁଳ,ଢେଙ୍କାନାଳ, କନ୍ଧମାଳ, ବୌଦ୍ଧ, କଟକ,ଯାଜପୁର, ପୁରୀ, ଖୋର୍ଦ୍ଧା କେନ୍ଦ୍ରାପଡା, ଭଦ୍ରକ, ବାଲେଶ୍ୱର ମୟୁରଭଞ୍ଜ କେନ୍ଦୁଝର ଓ ଜଗତସିଂହପୁର ଏହି ୧୬ ଜିଲ୍ଲାକୁ ଶୀତ ଲହରୀ ପାଇଁ ୟେଲୋ ୱାର୍ଣ୍ଣିଙ୍ଗ ଦେଇଛି ପାଣିପାଗ ବିଭାଗ । ଆସନ୍ତା ଦୁଇଦିନରେ ରାତି ତାପମାତ୍ରା ୨ରୁ ୪ ଡିଗ୍ରୀ ବଢ଼ିଯିବ । ଏହା ଶୀତ କମାଇବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।

ଶନିବାର ରାତିରେ ବି ଶୀତ ନାକେଦମ୍ କରିବ । କିନ୍ତୁ ରବିବାରଠାରୁ ଶୀତରେ ସାମୟିକ ବ୍ରେକ୍ ଲାଗିପାରେ । ପଶ୍ଚିମା ଝଡ଼ ପ୍ରଭାବରେ ରାତି ତାପମାତ୍ରା ବଢ଼ିବା ସହ ଶୀତ କମିପାରେ । ପାଣିପାଗ ବିଶେଷଜ୍ଞ ଏଭଳି ଆକଳନ କରିଛନ୍ତି ।

ଶନିବାର ଫୁଲବାଣୀରେ ୬ଡିଗ୍ରୀ, ରାଉରକେଲାରେ ୭, ଝାରସୁଗୁଡ଼ା, ସୁନ୍ଦରଗଡ଼ ଓ କେନ୍ଦୁଝରରେ ୮, ବାରିପଦାରେ ୯, କଟକ ଓ କୋରାପୁଟରେ ୧୦ ଡିଗ୍ରୀ ରହିପାରେ ବୋଲି ପାଣିପାଗ ବିଭାଗ ଆକଳନ କରିଛି । ୨୦ ତାରିଖ ଯାଏ ବିଭିନ୍ନ ସ୍ଥାନରେ କୁହୁଡ଼ି ଦେଖାଯିବ ବୋଲି କୁହାଯାଇଛି । ଭୁବନେଶ୍ୱରରେ ସ୍ୱାଭାବିକଠାରୁ ୫ ଡିଗ୍ରୀ, ଅନୁଗୁଳରେ ୫.୫, କଟକରେ ୪.୪, ବାରିପଦାରେ ୪.୨, କେନ୍ଦୁଝରରେ ୩.୯, ଚାନ୍ଦବାଲିରେ ୩.୬, କୋରାପୁଟରେ ୩.୬ ଓ ଗୋପାଳପୁରରେ ସ୍ୱାଭାବିକଠାରୁ ୨.୮ ଡିଗ୍ରୀ କମ୍ ରହିଛି । ଜି.ଉଦୟଗିରି ସବୁଠୁ ଥଣ୍ଡା ପାଲଟିଛି ।

ଏଠାରେ ପାରଦ ୨.୬ ଡିଗ୍ରୀ ରହିଥିଲା । ରାଉରକେଲାରେ ୪.୬ ଡିଗ୍ରୀ ଥିଲା । ଝାରସୁଗୁଡ଼ା ଏଥର ଶୀତରେ ୭୩ ବର୍ଷର ରେକର୍ଡକୁ ପାଞ୍ଚ ଥର ଭାଙ୍ଗି ସାରିଲାଣି । ଗୁରୁବାର ରାତିରେ ପାରଦ ୫ ଡିଗ୍ରୀ ଥିଲା । ରାତି ତାପମାତ୍ରା ସ୍ୱାଭାବିକଠାରୁ ୭.୫ ଡିଗ୍ରୀ ଖସିଯାଇଥିଲା । ଗତ ୯ ତାରିଖରେ ଏଠାରେ ସର୍ବନିମ୍ନ ତାପମାତ୍ରା ୪.୬ ଡିଗ୍ରୀ ଓ ୧୦ରେ ୪.୫ ଡିଗ୍ରୀ ଥିଲା ।