Landslide Disaster / ପାହାଡ଼ରୁ ମାଡ଼ି ଆସିଲା ମାଟି ଓ ପଥର, ଆଖି ପିଛୁଳାକେ ଛାରଖାର ହୋଇଗଲା ଗାଁ

ପାହାଡ଼ରୁ ମାଡ଼ି ଆସିଲା ମାଟି ଓ ପଥର, ଆଖି ପିଛୁଳାକେ ଛାରଖାର ହୋଇଗଲା ଗାଁ... ଗଞ୍ଜାମ ଓ କନ୍ଧମାଳ ଜିଲ୍ଲା ସୀମାନ୍ତରେ ଥିବା ଗିଡିପାବାଲି ଗାଁରେ ଭୟଙ୍କର ଭୂସ୍ଖଳନ ଘଟି ଆତଙ୍କ ଖେଳିଯାଇଛି । ରାତି ପ୍ରାୟ ୨ଟା ସମୟରେ ହଠାତ୍ ପାହାଡ଼ ଧସିବା ସହ ପାହାଡ଼ର ମାଟି ଓ ପଥର ଗାଁ ଭିତରକୁ ମାଡ଼ି ଆସିଥିଲା । ଆଖି ପିଛୁଳାକେ ଗାଁର ଅନେକ ଘର ମାଟି ତଳେ ପୋତି ହୋଇଯାଇଥିବା ଆଶଙ୍କା କରାଯାଉଛି ।

ପରିବାର ଲୋକଙ୍କ କହିବା ଅନୁଯାୟୀ, ଭୂସ୍ଖଳନ ଘଟିବାର କିଛି ମିନିଟ୍ ମଧ୍ୟରେ ଗାଁର କିଛି ଲୋକ ଘରୁ ବାହାରି ଜୀବନ ବଞ୍ଚାଇବାରେ ସଫଳ ହୋଇଥିଲେ । ହେଲେ ଅନେକ ଲୋକ ଘର ଭିତରେ ଫସି ରହିଯାଇଥିବା କୁହାଯାଉଛି । କାହାର ଦୁଇ ଦୁଇଟି ଛୋଟ ପିଲାଙ୍କୁ ଧରି ମାଆ ଉଦ୍ଧାର ପାଇଥିବା ବେଳେ ସ୍ୱାମୀଙ୍କ ପତ୍ତା ମିଳୁନାହିଁ । ଆଉ କାହାର ପରିବାରର ଅନ୍ୟ ସଦସ୍ୟ ନିଖୋଜ ଅଛନ୍ତି । ଏବେ ମଧ୍ୟ ୧୦ରୁ ଊର୍ଦ୍ଧ୍ୱ ଲୋକ ନିଖୋଜ ଥିବା ନେଇ ଆଶଙ୍କା ପ୍ରକାଶ କରୁଛନ୍ତି ଗ୍ରାମବାସୀ ।

ଜୀବନ ବଞ୍ଚାଇବା ପାଇଁ କିଛି ଲୋକ ଜଙ୍ଗଲ ରାସ୍ତାରେ ଦୁଇ ଦିନ ଧରି ଚାଲିଚାଲି କନ୍ଧମାଳ ଜିଲ୍ଲାର ସିପାଇଜୁ ଗାଁରେ ପହଞ୍ଚିଥିବା ଜଣାପଡ଼ିଛି । ଖବର ପାଇ କନ୍ଧମାଳ ପଟୁ ଅଗ୍ନିଶମ ବିଭାଗର ଟିମ୍ ଅତ୍ୟନ୍ତ କଷ୍ଟରେ ଦୁଇଟି ଗାଁରୁ ମୋଟ ୫୭ ଜଣଙ୍କୁ ଉଦ୍ଧାର କରିଛି । ଉଦ୍ଧାର ହୋଇଥିବା ସମସ୍ତଙ୍କୁ ଖିଲାପଙ୍ଗା ଗାଁରେ ରଖାଯାଇ ସ୍ୱାସ୍ଥ୍ୟ ପରୀକ୍ଷା କରାଯାଉଛି ।

ଖିଲାପଙ୍ଗାରେ ସ୍ଥାନୀୟ ବିଡିଓ ଓ ସ୍ୱାସ୍ଥ୍ୟ ବିଭାଗର ଟିମ୍ ପହଞ୍ଚି ଉଦ୍ଧାର ହୋଇଥିବା ଲୋକଙ୍କ ଚିକିତ୍ସା ଓ ଆବଶ୍ୟକୀୟ ସହାୟତା ଯୋଗାଇ ଦେଉଥିବା ସୂଚନା ମିଳିଛି । ତେବେ ଗିଡିପାବାଲି ଗାଁରୁ ଏବେ ମଧ୍ୟ ୧୦ରୁ ଊର୍ଦ୍ଧ୍ୱ ଲୋକ ନିଖୋଜ ଥିବା ଦାବି ହେଉଥିବାରୁ ଉଦ୍ଧାର କାର୍ଯ୍ୟକୁ ନେଇ ଚିନ୍ତା ବଢ଼ିଛି । ନିଖୋଜଙ୍କ ପରିବାର ଲୋକେ ନିଜ ଆତ୍ମୀୟଙ୍କ ଫେରିବା ବାଟକୁ ଚାହିଁ ରହିଛନ୍ତି ।