ସମଗ୍ର ଦେଶରେ ମୌସୁମୀ ଋତୁ ଅର୍ଥାତ ଜୁନରୁ ସେପ୍ଟେମ୍ବର ମଧ୍ୟରେ ବର୍ଷାର ପିରମାଣ କେତେ ରହିବ ସେନେଇ ଆକଳନ କରିଛି ଭାରତୀୟ ପାଣିପାଗ ବିଭାଗ । IMDର ଆକଳନ ଅନୁସାରେ ଉତ୍ତର ଓ ଉତ୍ତର-ପୂର୍ବ ଭାରତରେ ସାମାନ୍ୟ ବର୍ଷା ହେବ । କାରଣ ଏଠାରେ ଲଙ୍ଗ ପ୍ରୋଜେକ୍ଟେଡ୍ ଆଭରେଜ୍ ଅର୍ଥାତ ଦୀର୍ଘକାଳୀନ ହାରାହାରି ୯୪%ରୁ ୧୦୬% ପ୍ରତିଶତ ବର୍ଷା ହୋଇପାରେ। କିନ୍ତୁ ମଧ୍ୟ ଓ ଦକ୍ଷିଣ ଉପଦ୍ବୀପ ଭାରତରେ ୯୪%ରୁ କମ ବର୍ଷା ଏବଂ ଉତ୍ତର-ପଶ୍ଚିମ ଭାରତରେ ୯୨%ରୁ କମ ବର୍ଷା ନେଇ ଆକଳନ କରିଛି IMD । ଅର୍ଥାତ ଏସଵୁ ଅଞ୍ଚଳରେ ଜୁନରୁ ସେପ୍ଟେମ୍ବର ମୌସୁମୀ ଋତୁରେ ସ୍ବାଭାବିକ ଠାରୁ କମ୍ ବର୍ଷା ହେବା ନେଇ ପୂର୍ବାନୁମାନ କରିଛି ଭରାତୀୟ ପାଣିପାଗ ବିଭାଗ । ସେହିପରି ମୌସୁମୀର କୋର ଜୋନରେ ଆସୁଥିବା ଓଡ଼ିଶା ସମେତ ଅନ୍ୟାନ୍ୟ ରାଜ୍ୟରେ ମଧ୍ୟ ଦୀର୍ଘକାଳୀନ ହାରାହାରି ୯୪%ରୁ କମ୍ ବର୍ଷା ହୋଇପାରେ।

ଏହାସହ ପଢ଼ନ୍ତୁ: ପ୍ରବଳ ବର୍ଷା ସାଙ୍ଗକୁ ବିଜୁଳି ଘଡ଼ଘଡ଼ି ବର୍ଷା; IMD ଜାରି କଲା ଆଲର୍ଟ

ମୌସୁମୀ ସମୟରେ ଏଲନିନୋର ପ୍ରଭାବ ପଡ଼ିବା ନେଇ ୯୨% ଚାନ୍ସ ରହିଥିବା କହିଛନ୍ତି IMD ମହାନିର୍ଦ୍ଦେଶକ । ଜୁନରେ ଏଲନିନୋ ସାମାନ୍ୟ ଦୁର୍ବଳ ସ୍ଥିତିରେ ରହିବ । କିନ୍ତୁ ଜୁଲାଇ, ଅଗଷ୍ଟରେ ଦୁର୍ବଳରୁ ମଧ୍ୟମ ସ୍ଥିତିରେ ରହିବ । ସେହିପରି ସେପ୍ଟେମ୍ବରରେ ଏହାର ପ୍ରଭାବ ମଧ୍ୟମରୁ ଅଧିକ ରହିବ। ଓଡ଼ିଶାରେ ମଧ୍ୟ ମୌସୁମୀ ଋତୁରେ ଏଲନିନୋର ପ୍ରଭାବ ରହିବା ନେଇ ସେ ସତର୍କ କରାଇଛନ୍ତି।

ଏଲିନିନୋ ବର୍ତ୍ତମାନ ସକ୍ରିୟ ହୋଇନାହିଁ । ପୂର୍ବବର୍ଷ ଗୁଡ଼ିକ ରେକର୍ଡ ଅନୁସାରେ ସାଧାରଣତଃ ଏଲନିନୋର ପ୍ରଭାବ ମୌସୁମୀର ଦ୍ଵିତୀୟ ପର୍ଯ୍ୟାୟ ଅର୍ଥାତ ଅଗଷ୍ଟ, ସେପ୍ଟେମ୍ବରରେ ଅଧିକ ଦେଖିବାକୁ ମିଳେ । ତେଣୁ ସେତେବେଳକୁ ସ୍ଥିତି ଆହରହୁ ସ୍ପଷ୍ଟ ହେବ । ଏବେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଦକ୍ଷିଣପୂର୍ବ ଆରବ ସାଗର, ଲାକ୍ଷାଦ୍ବୀପର କିଛି ଅଞ୍ଚଳ, ଦକ୍ଷିଣ-ପୂର୍ବ ଓ ପୂର୍ବ- କେନ୍ଦ୍ରୀୟ ବଙ୍ଗୋପସାଗରର କିଛି ଅଂଶ, ଆଣ୍ଡାମାନ ସାଗର ଏବଂ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରର କିଛି ଅଞ୍ଚଳରେ ସକ୍ରିୟ ହୋଇଛି।

ଆସନ୍ତା ୨ରୁ ୩ ଦିନରେ ଏହି ସବୁ ଅଞ୍ଚଳର ଆଉ କିଛି ଅଂଶରେ ମୌସୁମୀ ସକ୍ରିୟ ହୋଇଯିବ । କିନ୍ତୁ ବଡ଼କଥା ହେଉଛି ଏଲନିନୋର ପ୍ରଭାବ ମୌସୁମୀ ବର୍ଷାକୁ ପ୍ରଭାବିତ କରିପାରେ । ବର୍ଷାର ପରିମାଣ କମିବା ସହ ତାପମାତ୍ରା ସାଧାରଣ ଠାରୁ ଅଧିକ ରହିପାରେ ।