ଭୁବନେଶ୍ଵର: ମାଘ ମାସ ସରୁ ସରୁ ଅପସରି ଗଲାଣି ଶୀତ । ସପ୍ତାହେରୁ ଅଧିକ ଦିନ ହେଲାଣି ଦିନର ସର୍ବୋଚ୍ଚ ପାରଦ ୩୦ ଡିଗ୍ରୀ ଉପରେ ରହୁଛି । ମଙ୍ଗଳବାର ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି । ରାଜ୍ୟର ୩୩ଟି ସହରର ସର୍ବୋଚ୍ଚ ଦିନ ତାପମାତ୍ରା ୩୦ ଡିଗ୍ରୀ ଉପରେ ରହିଛି ।

ରାଜ୍ୟର ୭ଟି ସ୍ଥାନରେ ପାରଦ ୩୩ ଡିଗ୍ରୀ ଅତିକ୍ରମ କରିଛି । ସମ୍ବଲପୁର ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଛି । ସେଠାରେ ସର୍ବାଧିକ ତାପମାତ୍ରା ୩୩.୮ ଡିଗ୍ରୀ ରେକର୍ଡ କରାଯାଇଛି । ସେହିଭଳି ଝାରସୁଗୁଡ଼଼ା ଓ ତାଳଚେରରେ ୩୩.୪ ଡିଗ୍ରୀ, ସୁନ୍ଦରଗଡ଼ରେ ୩୩.୨ ଡିଗ୍ରୀ, ହୀରାକୁଦରେ ୩୩.୧ ଡିଗ୍ରୀ, ଢେଙ୍କାନାଳ ଓ ଭୁବନେଶ୍ଵରରେ ପାରଦ ୩୩ ଡିଗ୍ରୀ ରେକର୍ଡ ହୋଇଛି ।

ଏଥିସହ ପଢ଼ନ୍ତୁ: ଦିନରେ ଗରମ, ସକାଳ-ସନ୍ଧ୍ୟାରେ ଥଣ୍ଡା

ମାଘ ସରୁଥିବା ବେଳେ ଫାଲଗୁନ୍ ଆରମ୍ଭରୁ ଅସମ୍ଭଳା ହେଲାଣି ଖରା । ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ପୂର୍ବାନୁମାନ ଅନୁସାରେ ତାପମାତ୍ରା ୨ରୁ ୩ ଡିଗ୍ରୀ ପର୍ଯ୍ୟନ୍ତ ବୃଦ୍ଧି ପାଇବ । ଆଗାମୀ ସପ୍ତାହକ ପର୍ଯ୍ୟନ୍ତ ରାଜ୍ୟରେ ପାଗ ମୁଖ୍ୟତଃ ଶୁଖିଲା ରହିବ । ୨ ଦିନ ଘନ କୁହୁଡ଼ି ନେଇ ପାଣିପାଗ ବିଭାଗ ୟେଲୋ ଆଲର୍ଟ ଜାରି କରିଛି ।

ଆଗାମୀ ୨ ଦିନ ପାଇଁ ୧୧ ଜିଲ୍ଲାକୁ ଘନ କୁହୁଡ଼ି ନେଇ ଆଲର୍ଟ ଜାରି ହୋଇଛି । ଗଜପତି, ଗଞ୍ଜାମ, ପୁରୀ, ଖୋର୍ଦ୍ଧା, ନୟାଗଡ଼, କଟକ, କେନ୍ଦ୍ରାପଡ଼ା, ଜଗତସିଂହପୁର, ଅନୁଗୁଳ ଓ ଢେଙ୍କାନାଳ ଜିଲ୍ଲାରେ ଘନ କୁହୁଡ଼ି ଅନୁଭୂତ ହୋଇପାରେ ।

ବିଗତ ୨୪ ଘଣ୍ଟାରେ ଭୁବନେଶ୍ଵର ସହ ଖୋର୍ଦ୍ଧା, ପୁରୀ, କଟକ, ଢେଙ୍କାନାଳ, ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ ଆଦି ଜିଲ୍ଲାରେ ଭୋର୍ ସମୟରେ ଘନ କୁହୁଡ଼ି ଆସ୍ତରଣ ଦେଖିବାକୁ ମିଳିଛି । ମଙ୍ଗଳବାର ରାଜଧାନୀ ଭୁବନେଶ୍ଵର ସକାଳ ୮ଟା ପର୍ଯ୍ୟନ୍ତ କୁହୁ଼ଡ଼ି ବଳୟରେ ରହିଥିଲା ।

ଏଥିସହ ପଢ଼ନ୍ତୁ: କମ୍ ବର୍ଷା, ଅଧିକ ଖରା... ପ୍ରଭାବିତ ହେବ ଫସଲ ଉତ୍ପାଦନ: IMDର ପୂର୍ବାନୁମାନ

IMD ଅନୁସାରେ, ଫେବ୍ରୁଆରୀରେ ସ୍ଵାଭାବିକ ଠାରୁ ଅଧିକ ରହିବ ତାପମାତ୍ରା । ଫେବ୍ରୁଆରୀରେ ଅନୁଭୂତ ହେବ ସାମାନ୍ୟ ଠାରୁ ଅଧିକ ଗରମ । ଭାରତୀୟ ପାଣିପାଗ ବିଭାଗ (IMD) ଅନୁସାରେ, ୨୦୨୬ ଫେବ୍ରୁଆରୀରେ ଦେଶର ଅଧିକାଂଶ ସ୍ଥାନରେ ସର୍ବନିମ୍ନ ଓ ସର୍ବାଧିକ ତାପମାତ୍ରା ସ୍ଵାଭାବିକ ଠାରୁ ଅଧିକ ରହିପାରେ ।

ତେବେ ଦକ୍ଷିଣ ଭାରତ ଓ ମଧ୍ୟ ଭାରତର କିଛି ସ୍ଥାନରେ ତାପମାନା ସ୍ଵାଭାବିକ ପାଖାପାଖି ରହିବାର ସମ୍ଭାବନା ରହିଛି । ପାଣିପାଗ ବିଭାଗର ଆକଳନ ଅନୁସାରେ, ସ୍ଵାଭାବିକ ଠାରୁ ତାପମାତ୍ରା ଅଧିକ ରହିବା ଯୋଗୁଁ ରବି ଫସଲ ଶୀଘ୍ର ବଢ଼ିବ । ବିଶେଷକରି ଉତ୍ତର-ପଶ୍ଚିମ ଓ ମଧ୍ୟ ଭାରତରେ ଗହମ ଭଳି ଫସଲ ସମୟ ପୂର୍ବରୁ ପାଚିବା ସମସ୍ୟା ଉପୁଜିପାରେ । ଫଳରେ ସଶ୍ୟ ଫଳିବାରେ ସମସ୍ୟା ହେବା ସହ ହାଲୁକା ହେବ, ଅମଳ କମିବ ।