Rain Alert / ଆସୁଛି ବଡ଼ ବର୍ଷା ! ୨୦ ତାରିଖରୁ ରାଜ୍ୟରେ ବଢ଼ିପାରେ ବର୍ଷାର ପ୍ରଭାବ

ରାଜ୍ୟରେ ପୁଣିଥରେ ସକ୍ରିୟ ହୋଇପାରେ ମୌସୁମୀ ବର୍ଷା । ସେପ୍ଟେମ୍ବର ୨୦ ତାରିଖ ବେଳକୁ ଓଡ଼ିଶାରେ ପ୍ରବଳରୁ ଅତ୍ୟନ୍ତ ପ୍ରବଳ ବର୍ଷାର ସମ୍ଭାବନା ନେଇ ପାଣିପାଗ ବିଶେଷଜ୍ଞମାନେ ଆକଳନ କରିଛନ୍ତି । ଏହାକୁ ନେଇ ଆଗାମୀ ଦିନରେ ବର୍ଷାର ପରିମାଣ ଧୀରେଧୀରେ ବଢ଼ିପାରେ ।

ପାଣିପାଗ ବିଶେଷଜ୍ଞ ଶରତ ଚନ୍ଦ୍ର ସାହୁଙ୍କ ସୂଚନା ଅନୁସାରେ, ସେପ୍ଟେମ୍ବର ୧୮ରୁ ୧୯ ତାରିଖ ମଧ୍ୟରେ ଦକ୍ଷିଣ ଚାଇନା ସାଗର ଅଞ୍ଚଳରୁ ଏକ ଘୂର୍ଣ୍ଣିବଳୟର ଅବଶିଷ୍ଟାଂଶ ପ୍ରବେଶ କରିପାରେ । ଏହାର ପ୍ରଭାବରେ ୨୦ ତାରିଖ ବେଳକୁ ଉତ୍ତର ଆଣ୍ଡାମାନ ସାଗର ଓ ଏହାର ପାର୍ଶ୍ୱବର୍ତ୍ତୀ ଅଞ୍ଚଳରେ ଏକ ଲଘୁଚାପ କ୍ଷେତ୍ର ଗଠନ ହେବାର ସମ୍ଭାବନା ରହିଛି ।

ପରବର୍ତ୍ତୀ ସମୟରେ ଏହି ଲଘୁଚାପ କ୍ଷେତ୍ର ଅଧିକ ଘନୀଭୂତ ହୋଇ ଗଭୀର ଅବପାତର ରୂପ ନେଇପାରେ । ଏପରିକି ପରିସ୍ଥିତି ଅନୁକୂଳ ରହିଲେ ଏହା ବାତ୍ୟାରେ ମଧ୍ୟ ପରିଣତ ହେବାର ସମ୍ଭାବନା ଥିବା କୁହାଯାଇଛି । ତେବେ ବର୍ତ୍ତମାନଠାରୁ ଏହାର ଗତିପଥ କିମ୍ବା ତୀବ୍ରତା ନେଇ ନିଶ୍ଚିତ ଭାବେ କିଛି କହିବା ସମ୍ଭବ ନୁହେଁ । ଆସନ୍ତା ୨୦ ତାରିଖ ବେଳକୁ ପାଣିପାଗର ଚିତ୍ର ଅଧିକ ସ୍ପଷ୍ଟ ହେବ ବୋଲି ଶ୍ରୀ ସାହୁ କହିଛନ୍ତି ।

ସେପଟେ, ଆଜି ରାଜ୍ୟର ୨୦ଟି ଜିଲ୍ଲା ପାଇଁ ବର୍ଷା ନେଇ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଆସନ୍ତାକାଲିଠାରୁ ବର୍ଷାର ପରିମାଣ ବଢ଼ିବା ନେଇ ପାଣିପାଗ ବିଭାଗ ପୂର୍ବାନୁମାନ କରିଛି । ତେଣୁ ଆଗାମୀ କିଛି ଦିନ ଧରି ରାଜ୍ୟବାସୀଙ୍କୁ ପାଣିପାଗର ନିୟମିତ ସୂଚନା ଉପରେ ନଜର ରଖିବାକୁ ପରାମର୍ଶ ଦିଆଯାଇଛି ।