Cyclone Arnab / ବାତ୍ୟା ପ୍ରଭାବରେ ବେହାଲ ରାୟଗଡ଼ା... ଲଗାଣ ବର୍ଷାରେ ଭାଙ୍ଗିଲା ଘର, ସ୍କୁଲ କୋଠା

ବାତ୍ୟାର ପ୍ରଭାବରେ ରାୟଗଡ଼ା ଜିଲ୍ଲାର ବିଭିନ୍ନ ସ୍ଥାନରେ ଲଗାଣ ବର୍ଷା ଜାରି ରହିଛି । ଲଗାତାର ବର୍ଷା ଯୋଗୁଁ ଜିଲ୍ଲାର ଅନେକ ଅଞ୍ଚଳରେ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିବା ବେଳେ ବିଭିନ୍ନ ସ୍ଥାନରେ ଘରଦ୍ୱାର ଓ ସରକାରୀ କୋଠା କ୍ଷତିଗ୍ରସ୍ତ ହୋଇଥିବା ଖବର ମିଳିଛି । ବର୍ଷା ଓ ପ୍ରତିକୂଳ ପାଗ ଯୋଗୁଁ ଲୋକଙ୍କ ମଧ୍ୟରେ ଚିନ୍ତା ବଢ଼ିଛି ।

ସୂଚନା ଅନୁଯାୟୀ, ରାୟଗଡ଼ା ସଦର ବ୍ଲକ ଅନ୍ତର୍ଗତ ପେରୀଗାଁ ସରକାରୀ ପ୍ରାଥମିକ ବିଦ୍ୟାଳୟ ଉପରେ ଏକ ବିରାଟ ଗଛ ଉପୁଡ଼ି ପଡ଼ିବାରୁ ବିଦ୍ୟାଳୟ କୋଠାଟି ସମ୍ପୂର୍ଣ୍ଣ ଭାବେ ଭାଙ୍ଗିରୁଜି ନଷ୍ଟ ହୋଇଯାଇଛି । ଲଗାଣ ବର୍ଷା ଓ ବାତ୍ୟାର ପ୍ରଭାବରେ ଏହି ଅଘଟଣ ଘଟିଥିବା ଜଣାପଡ଼ିଛି । ବିଦ୍ୟାଳୟ କୋଠା ନଷ୍ଟ ହୋଇଯିବା ଫଳରେ ଶିକ୍ଷାଦାନକୁ ନେଇ ମଧ୍ୟ ଚିନ୍ତା ପ୍ରକାଶ ପାଇଛି ।

ସେହିପରି ରାୟଗଡ଼ା ସଦର ବ୍ଲକ ମୀରାବାଲି ପଞ୍ଚାୟତ ଅନ୍ତର୍ଗତ ତାମାଲବାଇ ଗ୍ରାମର ଅଜୟ କର୍କରିଆଁଙ୍କ ମାଟିକାନ୍ଥ ଲଗାଣ ବର୍ଷା ଯୋଗୁଁ ଧସିପଡ଼ିଛି । ଫଳରେ ପରିବାର ଲୋକେ ଅସହାୟ ପରିସ୍ଥିତିରେ ପଡ଼ିଛନ୍ତି । ଘରର କାନ୍ଥ ଭୁଶୁଡ଼ି ପଡ଼ିବାରୁ ପରିବାରର ସୁରକ୍ଷା ଓ ରହିବା ବ୍ୟବସ୍ଥାକୁ ନେଇ ସମସ୍ୟା ସୃଷ୍ଟି ହୋଇଛି । ଏହାବ୍ୟତୀତ ମୁନିଗୁଡ଼ା ବ୍ଲକର ବିଭିନ୍ନ ଅଞ୍ଚଳରେ ମଧ୍ୟ କାନ୍ଥ ଭୁଶୁଡ଼ି ଘରଦ୍ୱାର କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି ।

ଏଭଳି ସ୍ଥିତିରେ କ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ସହାୟତା ଯୋଗାଇଦେବାକୁ ଦାବି ହେଉଛି । ପ୍ରଶାସନ ପକ୍ଷରୁ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହ ପ୍ରଭାବିତ ଲୋକଙ୍କୁ ଆବଶ୍ୟକ ସହାୟତା ଯୋଗାଇଦେବାକୁ ଆଶ୍ୱାସନ ଦିଆଯାଇଛି । ଆଗକୁ ବର୍ଷା ଜାରି ରହିବାର ଆଶଙ୍କା ଥିବାରୁ ଲୋକଙ୍କୁ ସତର୍କ ରହିବା ସହ ଦୁର୍ବଳ ଘର ଓ ବିପଦପୂର୍ଣ୍ଣ ଗଛ ନିକଟରେ ନରହିବାକୁ ପରାମର୍ଶ ଦିଆଯାଉଛି ।