ତାଇୱାନରେ ଭୟଙ୍କର ବାତ୍ୟା ‘ଚାମ୍ପି’ ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି । ବାତ୍ୟାର ପ୍ରଭାବରେ ସମୁଦ୍ରରେ ବିଶାଳ ଓ ଭୟଙ୍କର ଢେଉ ସୃଷ୍ଟି ହେବା ସହ ପ୍ରବଳ ବର୍ଷା ଏବଂ ଝଡ଼ ପବନ ଦେଖିବାକୁ ମିଳିଛି । ପବନର ବେଗ ଘଣ୍ଟାପ୍ରତି ୧୯୧ କିଲୋମିଟର ପର୍ଯ୍ୟନ୍ତ ପହଞ୍ଚିଥିବା ସୂଚନା ମିଳିଛି । ଏହି ପ୍ରାକୃତିକ ବିପର୍ଯ୍ୟୟରେ ଜଣେ ବ୍ୟକ୍ତିଙ୍କ ମୃ*ତ୍ୟୁ ହୋଇଥିବା ବେଳେ ୧୬୩ ଜଣ ଆହତ ହୋଇଛନ୍ତି ।

ହଜାର ହଜାର ଲୋକ ସ୍ଥାନାନ୍ତର
ବାତ୍ୟାର ଭୟାବହତାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବ୍ୟାପକ ସତର୍କତାମୂଳକ ପଦକ୍ଷେପ ନିଆଯାଇଛି । ବିପଦପୂର୍ଣ୍ଣ ଅଞ୍ଚଳରେ ରହୁଥିବା ହଜାର ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଅନେକ ଅଞ୍ଚଳରେ ପ୍ରବଳ ବର୍ଷା ଓ ପବନ ଯୋଗୁଁ ସାଧାରଣ ଜୀବନଯାତ୍ରା ସମ୍ପୂର୍ଣ୍ଣ ଠପ୍ ହୋଇପଡ଼ିଛି ।

ବାତ୍ୟାର ପ୍ରଭାବରେ ରାସ୍ତାଘାଟରେ ଯାତାୟାତ ବାଧାପ୍ରାପ୍ତ ହୋଇଛି । ଅନେକ ସ୍ଥାନରେ ବିଦ୍ୟୁତ୍ ସେବା ମଧ୍ୟ ପ୍ରଭାବିତ ହୋଇଛି । ଏହା ଫଳରେ ସାଧାରଣ ଲୋକଙ୍କୁ ବହୁ ସମସ୍ୟାର ସାମ୍ନା କରିବାକୁ ପଡ଼ୁଛି ।
ଏଥି ସହ ପଢନ୍ତୁ:  ଆଜି ଅବପାତ କାଲି ତୀବ୍ର ଅବପାତ…୨୮ ସକାଳେ ଉତ୍ତର ଆନ୍ଧ୍ର-ଦକ୍ଷିଣ ଓଡ଼ିଶା ଉପକୂଳ ଛୁଇଁବା ସମ୍ଭାବନା

ଉଦ୍ଧାର କାର୍ଯ୍ୟ ଜାରି, ଲୋକଙ୍କୁ ସତର୍କ ରହିବାକୁ ପରାମର୍ଶ
ବାତ୍ୟା ପ୍ରଭାବିତ ଅଞ୍ଚଳରେ ପ୍ରଶାସନ ଏବଂ ଉଦ୍ଧାରକାରୀ ଦଳ ପକ୍ଷରୁ ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି ରହିଛି । ଆହତଙ୍କୁ ଚିକିତ୍ସା ଯୋଗାଇଦେବା ସହ ପ୍ରଭାବିତ ଲୋକଙ୍କୁ ସହାୟତା ପହଞ୍ଚାଇବା ଉପରେ ଗୁରୁତ୍ୱ ଦିଆଯାଉଛି । ପରିସ୍ଥିତିକୁ ଦେଖି ପ୍ରଶାସନ ଲୋକଙ୍କୁ ଘର ଭିତରେ ସୁରକ୍ଷିତ ରହିବା ଏବଂ ଅତ୍ୟାବଶ୍ୟକ କାରଣ ନଥିଲେ ବାହାରକୁ ନ ଯିବାକୁ ପରାମର୍ଶ ଦେଇଛି । ସମୁଦ୍ରକୂଳ ଓ ଅନ୍ୟ ବିପଦପୂର୍ଣ୍ଣ ସ୍ଥାନଠାରୁ ଦୂରେଇ ରହିବାକୁ ମଧ୍ୟ ସତର୍କ କରାଯାଇଛି । ବାତ୍ୟା ‘ଚାମ୍ପି’ ଯୋଗୁଁ ତାଇୱାନରେ ସୃଷ୍ଟି ହୋଇଥିବା ଏହି ସଙ୍କଟ ମଧ୍ୟରେ ଉଦ୍ଧାର ଓ ରିଲିଫ୍ କାର୍ଯ୍ୟ ଉପରେ ସମସ୍ତଙ୍କ ନଜର ରହିଛି ।