ଭୁବନେଶ୍ଵର: ଉତ୍ତରପଶ୍ଚିମ ଏବଂ ସଂଲଗ୍ନ ପଶ୍ଚିମକେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ରହିଛି ଗଭୀର ଅବପାତ । ଏହା ବିଗତ ୬ ଘଣ୍ଟା ହେଲା ଉତ୍ତର-ଉତ୍ତରପଶ୍ଚିମ ଦିଗରେ ଘଣ୍ଟାକୁ ୧୮ କିଲୋମିଟର ବେଗରେ ଗତି କରୁଛି ।

ଏବେ ଗଭୀର ଅବପାତଟି ଗୋପାଳପୁର ଠାରୁ ଦକ୍ଷିଣ-ଦକ୍ଷିଣପୂର୍ବରେ ୯୦ କିମି ଦୂରରେ ରହିଥିବା ବେଳେ ପୁରୀଛଠାରୁ ଦକ୍ଷିଣ-ଦକ୍ଷିଣପଶ୍ଚିମରେ ୧୪୦ କିଲୋମିଟର ଏବଂ ପାରାଦୀପ ଠାରୁ ପୂର୍ବ-ଉତ୍ତରପୂର୍ବରେ ୨୪୦ କିଲୋମିଟର ଦୂରରେ ରହିଛି ।

ଏଥିସହ ପଢ଼ନ୍ତୁ: ଲଘୁଚାପ ଜନିତ ବର୍ଷା ଜାରି, ଫିକା ପଡ଼ିଲା ଦଶହରା

ଗଭୀର ଅବପାତଟି କ୍ରମଶଃ ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରି ଓଡ଼ିଶା ଏବଂ ଆନ୍ଧ୍ର ଉପୂକଳ ମଧ୍ୟରେ ଗୋପାଳପୁର ନିକଟରେ ଗୁରୁବାର ସନ୍ଧ୍ୟାରେ ଅତିକ୍ରମ କରିବ । ଏହା ପ୍ରଭାବରେ ସାରା ଓଡ଼ିଶାରେ ବର୍ଷା ଲାଗି ରହିଛି । ସେପଟେ ଓଡ଼ିଶା ଉପରେ ଏବେ ସକ୍ରିୟ ରହିଛି ଦକ୍ଷିଣପଶ୍ଚିମ ମୌସୁମୀ ବାୟୁ ।

ଗତ 6ଘଣ୍ଟାରେ ଘଣ୍ଟା ପ୍ରତି 18କିମି ବେଗରେ ଉତ୍ତର ଉତ୍ତର ପଶ୍ଚିମ ଦିଗରେ ଅଗ୍ରସର ହେଉଛି ଗଭୀର ଅବପାତ ଏହା ଗୋପାଳପୁର ଠାରୁ ଦକ୍ଷିଣ ଦକ୍ଷିଣପୂର୍ବ ଦିଗରେ 90କିମି, ପୁରୀ ଠାରୁ 140କିମି ଦକ୍ଷିଣ-ଦକ୍ଷିଣପଶ୍ଚିମ ଦିଗରେ କେନ୍ଦ୍ରୀଭୂତ ରହିଛି l ସନ୍ଧ୍ୟା ସୁଦ୍ଧା ଏହା #ଗୋପାଳପୁର ପାଖାପାଖି ସ୍ଥଳଭାଗ ଅତିକ୍ରମ କରିବା ସମ୍ଭାବନା pic.twitter.com/c04DbgHF0P
— usd (@usd0705) October 2, 2025

ଆଜି ପାଇଁ ଓଡ଼ିଶାର ୭ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ପୁରୀ, ଗଜପତି, ରାୟଗଡ଼ା, କୋରାପୁଟ, ଗଞ୍ଜାମ, କଳାହାଣ୍ଡି ଓ କନ୍ଧମାଳ ଜିଲ୍ଲାରେ ଭୀଷଣ ବର୍ଷା ସହ ଘଣ୍ଟା ପ୍ରତି ୪୯ରୁ ୫୦ କିମି ବେଗରେ ପବନ ବହିବା ନେଇ ରେଡ୍ ଆଲର୍ଟ ରହିଛି । ସେହିଭଳି ପ୍ରବଳ ବର୍ଷା ସହ ପବନ ନେଇ ଜଗତସିଂହପୁର, ଖୋର୍ଦ୍ଧା, କଟକ, ବଲାଙ୍ଗିର, ସୋନପୁର, ବୌଦ୍ଧ, ବାଲେଶ୍ଵର, ମୟୂରଭଞ୍ଜ, ଭଦ୍ରକ, ଅନୁଗୁଳ, ଯାଜପୁର ଓ କେନ୍ଦ୍ରାପଡ଼ାକୁ ଅରେଞ୍ଜ ଆଲର୍ଟ ରହିଛି । ଅନ୍ୟ ଜିଲ୍ଲା ଗୁଡ଼ିକୁ ବର୍ଷା ନେଇ ଜାରି ହୋଇଛି ୟେଲୋ ଆଲର୍ଟ ।

ଅବପାତ ପ୍ରଭାବରେ ବର୍ଷା ଆସନ୍ତାକାଲି ଶୁକ୍ରବାର ମଧ୍ୟ ଲାଗି ରହିବ । ପ୍ରବଳ ବର୍ଷା ନେଇ ସୁନ୍ଦରଗଡ଼ ଜିଲ୍ଲାକୁ ଅରେଞ୍ଜ ଆଲର୍ଟ ରହିଥିବା ବେଳେ କେନ୍ଦୁଝର, ମୟୂରଭଞ୍ଜ, ଝାରସୁଗୁଡ଼ା, ବରଗଡ଼ ଜିଲ୍ଲାକୁ ୟେଲୋ ଆଲର୍ଟ ରହିଛି । ଅନ୍ୟ ଜିଲ୍ଲାରେ ବଜ୍ରପାତ ଘଡ଼ଘଡ଼ି ସହ ଘଣ୍ଟାପ୍ରତି ୩୦ରୁ ୪୦ କିମି ବେଗରେ ପବନ ନେଇ ସତର୍କ କରିଛି ପାଣିପାଗ କେନ୍ଦ୍ର ।

ଏଥିସହ ପଢ଼ନ୍ତୁ: ପ୍ରବଳ ଛେଚିବ, କେମିତି ବୁଲିବେ ପୂଜା ପେଣ୍ଡାଲ୍ ?

ଆନ୍ଧ୍ର ସହ ଓଡ଼ିଶା ଉପକୂଳ ସମୁଦ୍ର ଅଶାନ୍ତ ରହିଛି । ତେଣୁ ୩ ତାରିଖ ମଧ୍ୟାହ୍ନ ପର୍ଯ୍ୟନ୍ତ ପଶ୍ଚିମକେନ୍ଦ୍ରୀୟ ଓ ସଂଲଗ୍ନ ଉତ୍ତରପଶ୍ଚିମ ବଙ୍ଗୋପସାଗରକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି । ଶୁକ୍ରବାର ପରେ ଓଡ଼ିଶାରେ ବର୍ଷା ନେଇ କୌଣସି ସତର୍କ ସୂଚନା ନାହିଁ ।

Argus News | argus news | Odisha Latest News, Breaking News, Trending News, Live TV