କଟକ: ଐତିହାସିକ କଟକ ବାଲିଯାତ୍ରାରେ ପଡ଼ିବ ଭଳିକି ଭଳି ଖାଦ୍ୟର ପସରା । ଦହିବରାରୁ ନେଇ ଠୁଙ୍କା ପୁରୀ, ମାଛ ଆମ୍ବିଳରୁ ନେଇ ଫାଷ୍ଟଫୁଡ୍‌ । ଏସବୁ ଖାଇବାକୁ ଲାଗିବ ଲୋକଙ୍କ ଗହଳି । ବାଲିଯାତ୍ରାରେ ଭଳିକି ଭଳି ସୁସ୍ଵାଦୁ ଖାଦ୍ୟ ଷ୍ଟଲର ଭିଡ଼ ଭିତରେ ପରିବେଶ ସୁରକ୍ଷାକୁ ଗୁରୁତ୍ଵ ଦେଇଛି କଟକ ଜିଲ୍ଲା ପ୍ରଶାସନ ।

ଚଳିତବର୍ଷ ତଳ ସହ ଉପର ବାଲିଯାତ୍ରା ପଡ଼ିଆରେ ଷ୍ଟଲ ପଡ଼ୁଛି । ୧୬୦୦ରୁ ଅଧିକ ଷ୍ଟଲ ପଡ଼ୁଥିବା ବେଳେ ସେଥିରୁ ଅଧିକାଂଶ ହେଉଛି ଖାଦ୍ୟ ଷ୍ଟଲ । ପରିବେଶ ସୁରକ୍ଷାକୁ ବାଲିଯାତ୍ରାରେ ପ୍ରଶାସନ ଗୁରୁତ୍ଵ ଦେଇ ଏକକ ବ୍ୟବହୃତ ପ୍ଲାଷ୍ଟିକ ଉପରେ କଟକଣା ଲଗାଇଛି । ଅର୍ଥାତ ବାଲିଯାତ୍ରାରେ ଆପଣ ଯାହା ବି ଖାଆନ୍ତୁ କିନ୍ତୁ ଆପଣ ଖାଉଥିବା ପାତ୍ରଟି ପ୍ଲାଷ୍ଟିକ ହୋଇ ନଥିବ ।

ଐତିହାସିକ କଟକ ବାଲିଯାତ୍ରାରେ ସିଙ୍ଗଲ୍ ୟୁଜ୍ ପ୍ଲାଷ୍ଟିକକୁ ବ୍ୟାନ କରାଯାଇଛି । ଏକକ ବ୍ୟବହୃତ ପ୍ଲାଷ୍ଟିକ ଉପରେ ପ୍ରତିବନ୍ଧକ ଲଗାଇଛି କଟକ ଜିଲ୍ଲା ପ୍ରଶାସନ । ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ଜିଲ୍ଲା ପ୍ରଶାସନ ଏ ନିଷ୍ପତ୍ତି ନେଇଛି । ଏନେଇ ପ୍ରଶାସନ ଜାରି କରିଛି ନିର୍ଦ୍ଦେଶନାମା ।

ପଲିଥିନ ମନା

ବାଲିଯାତ୍ରାରେ ପଲିଥିନ ବ୍ୟାଗ, ଏକକ ବ୍ୟବହୃତ ପ୍ଲାଷ୍ଟିକ କପ୍, ପ୍ଲେଟ୍, ଚାମଚ, ଷ୍ଟ୍ର ସହ ଥର୍ମକୁଲରୁ ତିଆରି ଅନ୍ୟ ସାମଗ୍ରୀ ବ୍ୟବହାର ବାରଣ କରାଯାଇଛି ।

ପରିବେଶ ଉପଯୋଗୀ ସାମଗ୍ରୀକୁ ଗୁରୁତ୍ଵ

ସମସ୍ତ ଷ୍ଟଲ ମାଟିରେ ମିଶି ଯାଉଥିବା କପ୍, ପ୍ଲେଟ୍ ଏବଂ ଖାଦ୍ୟ କଣ୍ଟେନର ବ୍ୟବହାର କରିବେ ।

ଡଷ୍ଟବିନ୍ ବ୍ୟବହାର

ବାଲିଯାତ୍ରା ପଡ଼ିଆରେ ପ୍ରତ୍ୟେକଟି ଷ୍ଟଲ ୨ଟି ଭିନ୍ନ ଭିନ୍ନ ଡଷ୍ଟବିନ ରଖିବେ । ଗୋଟିଏରେ ଓଦା ଓ ଅନ୍ୟଟିରେ ଶୁଖିଲା ବର୍ଜ୍ୟବସ୍ତୁ ପକାଇବେ । ଏବଂ ଡଷ୍ଟବିନରେ ପଡ଼ିଥିବା ଆବର୍ଜନାକୁ ନିର୍ଦ୍ଧାରିତ ଆଦାୟ କେନ୍ଦ୍ରରେ ଦେବେ ।

ଷ୍ଟଲ୍ ଚାରିପାଖ ସଫା ରଖିବା

ଷ୍ଟଲର ଚାରିପାଖ କିଭଳି ସଫାସୁତୁରା ରହିବ ସେଥିପ୍ରତି ଷ୍ଟଲ ନେଇଥିବା ବ୍ୟକ୍ତି ଓ ସଂସ୍ଥା ବିଶେଷ ଧ୍ୟାନ ଦେବେ ।

ପ୍ରଶାସନ ପକ୍ଷରୁ ଜାରି ହୋଇଥିବା ନିର୍ଦ୍ଦେଶାବଳୀ ନ ମାନିଲେ ଷ୍ଟଲର ଲାଇସେନ୍ସ ବାତିଲ୍ କରାଯାଇପାରେ । ଏଥିସହ ପରିବେଶ ପ୍ରଦୂଷଣ ଏବଂ ମହାନଗର ନିଗମ ନିୟମ ଅନୁସାରେ ଜରିମାନା ବି ଦେବାକୁ ହେବ ।

ଆସନ୍ତୁ ଐତିହାସିକ କଟକ ବାଲିଯାତ୍ରା-୨୦୨୫କୁ ସ୍ଵଚ୍ଛ, ସବୁଜ ଓ ପରିବେଶ ଉପଯୋଗୀ ଉତ୍ସବ ଭାବେ ପାଳନ କରି ଓଡ଼ିଶାର ଐତିହ୍ୟକୁ ଋଦ୍ଧିମନ୍ତ କରିବା ।

ରାତି ୧୧ ପରେ ମାଇକ୍ ମନା

କଟକ ଐତିହାସିକ ବାଲିଯାତ୍ରାରେ ରାତି ୧୧ ପର୍ଯ୍ୟନ୍ତ ହେବ ସାଂସ୍କୃତିକ କାର୍ଯ୍ୟକ୍ରମ । ରାତି ୧୧ଟା ପର୍ଯ୍ୟନ୍ତ ବାଜି ପାରିବ ମାଇକ୍ । ଗଣକବି ବୈଷ୍ଣବ ପାଣି ମଞ୍ଚ ଓ ଅକ୍ଷୟ ମହାନ୍ତି ମଞ୍ଚ ପାଇଁ ଏହି ନିୟମ ଲାଗୁ ହେବ । ନଭେମ୍ବର ୫ରୁ ୧୩ ତାରିଖ ପର୍ଯ୍ୟନ୍ତ ଏହି ନିୟମ ଲାଗୁ ନେଇ କଟକ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।

ଏଥିସହ ପଢ଼ନ୍ତୁ: କଟକ ବାଲିଯାତ୍ରା ଏବଂ ଓଡ଼ିଶାର ସାମୁଦ୍ରିକ ବାଣିଜ୍ୟର କାହାଣୀ...

ଆହୁରି ପଢ଼ନ୍ତୁ: ୧୦ ଜିଲ୍ଲାରେ ବୁଲିବ ବାଲିଯାତ୍ରାର ପ୍ରଜ୍ଞାପନ ମେଢ଼, ସଚେତନ କରିବା ସହ ଦେବ ନିମନ୍ତ୍ରଣ