Argus News - ମାଆର ମୃତ୍ୟୁ ପରେ ଝିଅ ଭରୁଥିଲା ଋଣ କିସ୍ତି, ଗାଁ ଦାଣ୍ଡରେ ଗୋଡ଼ାଇ ଗୋଡ଼ାଇ ମାଡ଼ ମାରିଲେ SHG ସଦସ୍ୟା

ଭଦ୍ରକ: ଗାଁ ଦାଣ୍ଡରେ ଗହଳି । ଯୁବତୀଙ୍କ ପଛରେ ଗୋଡ଼ାଇ ଯାଉଛନ୍ତି ମହିଳା । ଅସଭ୍ୟ ଭାଷାରେ ଗାଳି ସହ ମାଡ଼ ମାରୁଛନ୍ତି । ଜଣେ କି ଦୁଇ ଜଣେ ନୁହେଁ ଏକାଧିକ ମହିଳା ଜଣେ ଯୁବତୀଙ୍କୁ ଘେରି ମାଡ଼ ମାରିଛନ୍ତି । ବାପାମାଆ ଛେଉଣ୍ଡ ଝିଅକୁ ଗାଁ ଦାଣ୍ଡରେ ଦିଆଯାଇଛି ଏଭଳି ନିର୍ଯାତନା ।

ଏଭଳି ଘଟଣା ଘଟିଛି ଭଦ୍ରକ ଜିଲ୍ଲା ଗ୍ରାମାଞ୍ଚଳ ଥାନା ଗଣିଜାଙ୍ଗ ପଞ୍ଚାୟତ ଅରଞ୍ଜି ଗାଁରେ । ଗାଁର ମହିଳା ସ୍ଵୟଂ ସହାୟକ ଗୋଷ୍ଠୀ (SHG)ର ସଦସ୍ୟ ଥିଲେ ମନୋରମା ମହାପାତ୍ର । SHGକୁ ଆସିଥିବା ଟଙ୍କାରୁ ଅନ୍ୟ ସଦସ୍ୟାଙ୍କ ଭଳି ୭୦ ହଜାର ଟଙ୍କା ଋଣ ପାଇଥିଲେ ମନୋରମା ।

ଏଥିସହ ପଢ଼ନ୍ତୁ: ପରିବାର ପୋଷିବାକୁ ଯାଇ ଗୁଜରାଟରେ ଚାଲିଗଲା ଜୀବନ; ଅଙ୍ଗଦାନ କରି ରଖିଲେ ଓଡ଼ିଶାର ଟେକ

ପକ୍ଷାଘାତରେ ପୀଡ଼ିତ ମନୋରମାଙ୍କ ଗତ ଜୁଲାଇ ମାସରେ ମୃତ୍ୟୁ ହୋଇଥିଲା । ମାଆର ମୃତ୍ୟୁ ପରେ ଝିଅ ଭରି ଚାଲିଥିଲେ ମାସିକ କିସ୍ତି । ପରେ ମାଆଙ୍କ ମୃତ୍ୟୁ ପ୍ରମାଣପତ୍ର ମିଳିବା ପରେ SHGରେ ଜମା କରିବା ସହ ନିୟମ ଅନୁସାରେ ବ୍ୟାଙ୍କକୁ ଅବଗତ କରାଇଥିଲେ ।

ନିୟମ ଅନୁସାରେ, SHG ଗ୍ରୁପ୍‌ରେ ଥିବା କୌଣସି ମହିଳା ଋଣ ନେଇଥିଲେ ତାଙ୍କର ମୃତ୍ୟୁ ପରେ କିସ୍ତି ଦେବା ଆବଶ୍ୟକତା ନାହିଁ । ଋଣ ସମୟରେ ନିଆଯାଇଥିବା ବୀମାରୁ ଅବଶିଷ୍ଟ ଅର୍ଥ କଟିବା ସହ ପରିବାରକୁ ଟଙ୍କା ମିଳିଥାଏ ।

ଆଉ ସେହି ଅନୁସାରେ, ମନୋରମାଙ୍କ ମୃତ୍ୟୁ ପରେ ୫ ମାସ କିସ୍ତି ଶୁଝିବା ପରେ ବୀମା ପାଇଁ ଆବେଦନ କରିଥିଲେ ଝିଅ ମୋନାଲିସା । ବ୍ୟାଙ୍କ ଅଧିକାରୀଙ୍କ ଠାରୁ ସମସ୍ତ ତଥ୍ୟ ନେବା ପରେ ମୃତ୍ୟୁ ପ୍ରମାଣପତ୍ର ଦେଇ କିସ୍ତି ଆଉ ଦେବାକୁ ପଡ଼ିବେ ନାହିଁ ବୋଲି ଜଣାଇଥିଲେ ।

ଏଥିସହ ପଢ଼ନ୍ତୁ: SEBC ତାଲିକାରେ ଥିବା ଜାତିଙ୍କୁ କେନ୍ଦ୍ରୀୟ OBC ତାଲିକାଭୁକ୍ତ କରିବାକୁ ଅଣ୍ଟା ଭିଡ଼ିଲେ କେନ୍ଦ୍ର ମନ୍ତ୍ରୀ

କିନ୍ତୁ ମନୋରମାଙ୍କ ମୃତ୍ୟୁ ପରେ ୩ ଝିଅ କାହିଁକି ଆଉ କିସ୍ତି ନ ଦେବେ ସେନେଇ ସ୍ଵୟଂ ସହାୟକ ଗୋଷ୍ଠୀର ସଦସ୍ୟାଙ୍କ ମଧ୍ୟରେ ମତଭେଦ ସୃଷ୍ଟି ହୋଇଥିଲା । ମାସିକ ୨୮୩୦ ଟଙ୍କା କିସ୍ତି ଦେବାକୁ ବାଧ୍ୟ କରିଥିଲେ SHGର ସଦସ୍ୟା ।

ଆଉ ଝିଅମାନେ କିସ୍ତି ବାନ୍ଧିବାକୁ ମନା କରିବା ପରେ ଗାଁ ଦାଣ୍ଡରେ ସେମାନଙ୍କୁ ଗୋଡ଼ାଇ ଗୋଡ଼ାଇ ମାଡ଼ ମରାଯାଇଥିବା ଅଭିଯୋଗ ହୋଇଛି । ମନୋରମାଙ୍କ ଜଣେ ଝିଅ ଗୁରୁତର ଆହତ ହୋଇ ଏବେ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ମାଡ଼ ମାରିଥିବା ମହିଳାଙ୍କ ବିରୋଧରେ ମୋନାଲିସା କାର୍ଯ୍ୟାନୁଷ୍ଠାନ ଦାବି କରିଛନ୍ତି । ତେବେ ଏନେଇ SHGର ସଦସ୍ୟା ଓ ପୋଲିସର ପ୍ରତିକ୍ରିୟା ମିଳିପାରି ନାହିଁ ।