Brother Death Raksha Bandhan / ରାଖୀ ବାନ୍ଧି ଭାଇ ନେଲା ଜୀବନ ହାରିବା ଭଳି ଚରମ ପଦକ୍ଷେପ, ଅବାକ୍ ପରିବାର

ମୁମ୍ବାଇ: ମହାରାଷ୍ଟ୍ରର ଜଳଗାଁଓରୁ ଭାଇ ଭଉଣୀଙ୍କ ଅତୁଟ ବନ୍ଧନର ସାକ୍ଷୀ ରକ୍ଷାବନ୍ଧନରେ ଆସିଛି ଏକ ହୃଦୟ ବିଦାରକ ଘଟଣା । ଭଉଣୀ ହାତରୁ ରାଖୀ ବାନ୍ଧିବା ପରେ ଭାଇ ନେଇଛି ଚରମ ନିଷ୍ପତ୍ତି । ଆଉ ଜୀବନ ହାରୁ ହାରୁ ଭଉଣୀକୁ ଇନଷ୍ଟାଗ୍ରାମ ପୋଷ୍ଟରେ କହିଯାଇଛି ଅନେକ କଥା । ଯାହାକି ସମସ୍ତଙ୍କୁ କନ୍ଦାଇ ଦେଇଛି । ରାଖୀ ପୂର୍ଣ୍ଣିମାରେ ନାବାଳକ ଜଣକ କାହିଁକି ଏପରି ନିଷ୍ପତ୍ତି ନେଲା ତାକୁ ନେଇ ସମସ୍ତଙ୍କ ମନରେ ପ୍ରଶ୍ନ ଉଠିଛି ।

ତେବେ ଜଳଗାଁଓର ଜଣେ ୧୭ ବର୍ଷୀୟ ବାଳକ ତାର ଭଉଣୀଠାରୁ ରାଖୀ ପାଇବା ପରେ ଫାଶୀ ଲଗାଇ ଆତ୍ମହତ୍ୟା କରିଥିବା ଜଣାପଡ଼ିଛି । ମୃତ୍ୟୁ ପୂର୍ବରୁ ସେ ସୋସିଆଲ ମିଡିଆରେ ନିଜ ଭଉଣୀ ଏବଂ ପରିବାର ପାଇଁ ଏକ ଭାବପ୍ରବଣ ବାର୍ତ୍ତା ପୋଷ୍ଟ କରିଥିଲା । ମୃତ ୧୭ ବର୍ଷୀୟ ବାଳକର ନାମ ରୋହିତ ସାହେବରାଓ ଧଙ୍ଗର ବୋଲି ଜଣାପଡ଼ିଛି, ଯିଏକି ଏକାଦଶ ଶ୍ରେଣୀର ଛାତ୍ର ଥିଲା । ରୋହିତ ତାର ଭଉଣୀଠାରୁ ରାଖୀ ବାନ୍ଧିବା ପରେ ବାପାଙ୍କ ସହିତ ଘରକୁ ଫେରିଥିଲା ।

• ଇନଷ୍ଟାଗ୍ରାମରେ ଭାବପ୍ରବଣ ପୋଷ୍ଟ

ରୋହିତ ଇନଷ୍ଟାଗ୍ରାମରେ ଭଉଣୀ ସହ ଏକ ଫଟୋ ପୋଷ୍ଟ କରିଥିଲା ଏବଂ ଏହା ସହିତ ଏକ ଭାବପ୍ରବଣ ବାର୍ତ୍ତା ଲେଖିଥିଲା । ରୋହିତ ଲେଖିଥିଲା, "ଦିଦି, ସବୁକିଛିର ଯତ୍ନ ନେବ । ମାଆ ଏବଂ ବାପାଙ୍କୁ ଏକା ଛାଡିବ ନାହିଁ, ମୁଁ ଯାଉଛି ।" ଏହି ପୋଷ୍ଟ ପରେ ରୋହିତ ଆତ୍ମହତ୍ୟା କରିଥିଲା । ମୃତ୍ୟୁ ପୂର୍ବରୁ ରୋହିତ ଆଉ ଏକ ଷ୍ଟାଟସ୍ ମଧ୍ୟ ପୋଷ୍ଟ କରି ଲେଖିଥିଲା, "ଏଥର ଯଦି ମୁଁ ଆସିବି, ମୁଁ ସମସ୍ତଙ୍କ ପ୍ରିୟ ହୋଇ ଆସିବ । ମୋ ଦେହରେ ଯେଉଁ ଦାଗ ଲାଗିଯାଇଛି, ତାହାକୁ ଲିଭାଇ ଦେବି । ମୋ ଆଖି ଆଉ ଓଦା ହେବ ନାହିଁ । ଧନ୍ୟବାଦ..."

• କାହିଁକି ଜୀବନ ହାରିଲା ରୋହିତ ?

ପ୍ରାରମ୍ଭିକ ସୂଚନା ଅନୁଯାୟୀ, ରୋହିତ ତାର ଜଣେ ବନ୍ଧୁଙ୍କୁ ଏକ ଭିଡିଓ ପଠାଇଥିଲା, ଯେଉଁଥିରେ ସେ କହିଥିଲା ଯେ ସେ ଅନଲାଇନ୍ ଗେମିଂରେ ଟଙ୍କା ହରାଇଛି । ମେସେଜ ଦେଖି ବନ୍ଧୁ ରୋହିତ ଘରକୁ ଦୌଡ଼ି ଯାଇଥିଲେ, କିନ୍ତୁ ସେତେବେଳକୁ ସେ ଆତ୍ମହତ୍ୟା କରିସାରିଥିଲା । ପରିବାର ଲୋକ ତାକୁ ତୁରନ୍ତ ସରକାରୀ ମେଡିକାଲ କଲେଜ ଏବଂ ହସ୍ପିଟାଲକୁ ନେଇଥିଲେ, କିନ୍ତୁ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ । ଶନିପେଠ ପୋଲିସ ଷ୍ଟେସନରେ ଏକ ଆତ୍ମହତ୍ୟା ଜନିତ ମୃତ୍ୟୁ ମାମଲା ରୁଜୁ ହୋଇଥିଲା ।

ପଢନ୍ତୁ ଏହି ଖବର: ଏମିତି ବି ଆସେ ମୃତ୍ୟୁ: ରାକ୍ଷୀ ବାନ୍ଧିବ ବୋଲି ଅଗଣାକୁ ଧାଇଁ ଆସିଲା ଭଉଣୀ: ଧସିଗଲା ମାଟି ପଶିଗଲା ୟାଶି

ଏହି ଘଟଣା ସମସ୍ତଙ୍କୁ କନ୍ଦା ଦେଇଛି । ରକ୍ଷାବନ୍ଧନରେ ଭଉଣୀ ନିଜ ଭାଇକୁ ରାଖୀ ବାନ୍ଧେ ଏବଂ ତାର ଦୀର୍ଘ ଜୀବନ ପାଇଁ ପ୍ରାର୍ଥନା କରେ । କିନ୍ତୁ ରୋହିତ ଭଉଣୀ ଜାଣି ନଥିଲେ ଯେ ସେ ଶେଷ ଥର ପାଇଁ ତାଙ୍କ ଭାଇ ହାତରେ ରାଖୀ ବାନ୍ଧୁଛନ୍ତି । ସେ ଜାଣି ନଥିଲେ ଯେ ରୋହିତ ଏତେ ବଡ଼ ନିଷ୍ପତ୍ତି ନେବାକୁ ଯାଉଛି । ରୋହିତ ମୃତ୍ୟୁ ପୂରା ପରିବାରକୁ ମର୍ମାହତ କରିଛି ।

ବି.ଦ୍ର: ଯଦି ଆପଣ କିମ୍ବା ଆପଣ ଜାଣିଥିବା କେହି ଆତ୍ମହତ୍ୟା କରିବାର ଚିନ୍ତା କରୁଛନ୍ତି, ତେବେ ଏହା ଏକ ଅତ୍ୟନ୍ତ ଗୁରୁତର ଡାକ୍ତରୀ ଜରୁରୀକାଳୀନ ପରିସ୍ଥିତି। ତୁରନ୍ତ ଭାରତ ସରକାରଙ୍କ ଜୀବନସାଥୀ ହେଲ୍ପଲାଇନ୍ 18002333330ରେ ଯୋଗାଯୋଗ କରନ୍ତୁ । ଆପଣ ଟେଲିମାନ୍ସ ହେଲ୍ପଲାଇନ୍ ନମ୍ବର 1800914416କୁ ମଧ୍ୟ କଲ୍ କରିପାରିବେ । ଏଠାରେ ଆପଣଙ୍କ ପରିଚୟକୁ ସମ୍ପୂର୍ଣ୍ଣ ଗୋପନୀୟ ରଖାଯିବ ଏବଂ ଏହି ପରିସ୍ଥିତିକୁ ଦୂର କରିବା ପାଇଁ ବିଶେଷଜ୍ଞମାନେ ଆପଣଙ୍କୁ ଆବଶ୍ୟକ ପରାମର୍ଶ ଦେବେ । ମନେ ରଖନ୍ତୁ, ଜୀବନ ଅତ୍ୟନ୍ତ ମୂଲ୍ୟବାନ।