ୱାଶିଂଟନ୍: ଇରାନର ସର୍ବୋଚ୍ଚ ନେତା ଅୟାତୋଲ୍ଲା ଅଲୀ ଖାମେନେଇଙ୍କ ମୃତ୍ୟୁ ପରେ ଟ୍ରମ୍ପଙ୍କ ବଡ଼ ଦାବି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅଭିଯୋଗ ଆଣି କହିଛନ୍ତି, "ମୋତେ ମାରିବା ଲାଗି ଅଲୀ ଖାମେନେଇ ଦୁଇ ଦୁଇଥର ପ୍ରୟାସ କରିଥିଲେ । ତେଣୁ ମୋତେ ମାରିବା ଆଗରୁ ମୁଁ ପ୍ରଥମେ ଖାମେନେଇଙ୍କୁ ସଫା କରିଦେଲି ।"

ରବିବାର ସନ୍ଧ୍ୟାରେ ଆମେରିକାର ଏବିସି ନ୍ୟୁଜ୍‌କୁ ପ୍ରତିକ୍ରିୟା ଦେଇ ଏଭଳି କହିଛନ୍ତି ଡୋନାଲ୍ଡ ଟ୍ରମ୍ପ । ଆମେରିକା ରାଷ୍ଟ୍ରପତିଙ୍କୁ ଖାମେନେଇଙ୍କ ମୃତ୍ୟୁ ନେଇ ପ୍ରଶ୍ନ କରିଥିଲେ ସାମ୍ବାଦିକ । ଯାହାର ଉତ୍ତରରେ ଟ୍ରମ୍ପ କହିଛନ୍ତି, "ମୋତେ ମାରିବାକୁ ସେ ଦୁଇ ଦୁଇଥର ପ୍ରୟାସ କରିଥିଲେ, ମୁଁ ପ୍ରଥମେ ରାସ୍ତାରୁ ହଟାଇ ଦେଲି ।"

ଏଥିସହ ପଢ଼ନ୍ତୁ: ଇରାନ ନେଲା ବଡ଼ ପ୍ରତିଶୋଧ; ଇସ୍ରାଏଲ୍ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଉପରେ ଘନ ଘନ ମିସାଇଲ୍ ମାଡ଼

ଏପରିକି ୨୦୨୪ରେ ଡୋନାଲ୍ଡ ଟ୍ରମ୍ପଙ୍କୁ ହତ୍ୟା ପାଇଁ ଖାମେନେଇ ପ୍ରୟାସ କରିଥିବା ସେ ଦାବି କରିଛନ୍ତି । ଏପରିକି ଇତିହାସରେ ଖାମେନେଇ ସବୁଠୁ ଦୁଷ୍ଟ ବ୍ୟକ୍ତି ବୋଲି ଟ୍ରମ୍ପ ଅଭିହିତ କରିଛନ୍ତି । ଖାମନେଇଙ୍କ ମୃତ୍ୟୁ କେବଳ ଇରାନ ନାଗରିକଙ୍କୁ ନ୍ୟାୟ ଦେଇନି ବରଂ ଆମେରିକୀୟଙ୍କୁ ମହାନ କରିଥିବା କହିଛନ୍ତି ଡୋନାଲ୍ଡ ଟ୍ରମ୍ପ ।

ପୂର୍ବରୁ ଆମେରିକୀୟ ଗୁଇନ୍ଦା ସଂସ୍ଥାର ଦାବି କରିଥିଲା ଯେ, ଇରାନ ସରକାର ଟ୍ରମ୍ପଙ୍କୁ ହତ୍ୟା ପାଇଁ ଷଡ଼ଯନ୍ତ୍ର କରିଛନ୍ତି । ଯାହାକୁ ନେଇ ସାମ୍ବାଦିକଙ୍କ ପ୍ରଶ୍ନରେ ଟ୍ରମ୍ପ ଏଭଳି ରୋଚକ ଉତ୍ତର ଦେଇଛନ୍ତି । କହିଛନ୍ତି, "ଆକ୍ରମଣ ବହୁତ ସଠିକ୍ ଓ ସଫଳ ଥିଲା । ଆକ୍ରମଣରେ ଏକାଧିକ ଅଧିକାରୀ ଓ ସମ୍ଭାବ୍ୟ ଉତ୍ତରାଧିକାରୀ ମଧ୍ୟ ନିହତ ହୋଇଛନ୍ତି । ଆମେ ଯେଉଁମାନଙ୍କୁ ଟାର୍ଗେଟ୍ କରିଥିଲୁ, ସମସ୍ତେ ନିହତ ହୋଇଛନ୍ତି ।"

କେତେ ଲମ୍ବା ଚାଲିବ ଯୁଦ୍ଧ ?

ଇରାନ ସହ ଯୁଦ୍ଧ କେତେ ଲମ୍ବା ଚାଲିବ ? ଏ ପ୍ରଶ୍ନର ଉତ୍ତରରେ ଟ୍ରମ୍ପ କହିଛନ୍ତି, "ଆରମ୍ଭରୁ ଆଶା କରୁଥିଲି ଯୁଦ୍ଧ ୪ରୁ ୫ ସପ୍ତାହ ମଧ୍ୟରେ ସରିଯିବ ।" କିନ୍ତୁ ଏବେ ଯୁଦ୍ଧ ଆବଶ୍ୟକ ପଡ଼ିଲେ ଦୀର୍ଘ ସମୟ ଚାଲିବା ନେଇ ସଂକେତ ଦେଇଛନ୍ତି ଆମେରିକା ରାଷ୍ଟ୍ରପତି ।

ଏଥିସହ ପଢ଼ନ୍ତୁ: ଟ୍ରମ୍ପଙ୍କ ବଡ଼ ବୟାନ: ଆହୁରି ୪ ସପ୍ତାହ ଚାଲିବ ଯୁଦ୍ଧ

ସେ ଆହୁରି କହିଛନ୍ତି, "ବିଗତ କିଛି ସୈନ୍ୟ ଅପରେସନ୍ ଯେଭଳି ଭେନେଜୁଏଲା, ୨୦୨୫ରେ ଇରାନ ଓ ଏବେର ସୈନ୍ୟ କାର୍ଯ୍ୟାନୁଷ୍ଠାନରେ ଆମେରିକାର ମାତ୍ର ୩ ଜଣ ଯବାନ ସହିଦ ହୋଇଛନ୍ତି । ଏହା ହେଉଛି ଆମେରିକାର କମାଲ୍ ।"

ଆମେରିକା ଓ ଇସ୍ରାଏଲ୍ ମିଳିତ ଭାବେ ଫେବ୍ରୁଆରୀ ୨୮ ତାରିଖରେ ଇରାନ୍‌ ଉପରେ ଆକ୍ରମଣ କରିଥିଲେ । ଆକ୍ରମଣର ପ୍ରଥମ ଦିନରେ ଇସ୍ରାଏଲ୍ ତେହରାନରେ ଅୟାତୁଲ୍ଲା ଅଲୀ ଖାମେନେଇଙ୍କ ବାସଭବନ ଓ କାର୍ଯ୍ୟାଳୟ ଉପରେ ବୋମାବର୍ଷା କରିଥିଲା । ଯେଉଁଥିରେ ଖାମେନେଇଙ୍କ ମୃତ୍ୟୁ ହୋଇଥିବା ରବିବାର ରାତିରେ ଇରାନ ସୋସିଆଲ୍ ମିଡିଆରେ ସୂଚନା ଦେଇଥିଲା ।