ରାଜରାସ୍ତାରେ ଚାଲୁଥିବା ଏକ କାରକୁ ଧକ୍କା ଦେଲା ବିମାନ । ଏହା ଆପଣଙ୍କୁ ଟିକେ ଆଶ୍ଚର୍ଯ୍ୟ ଲାଗୁଥାଇପାରେ କିନ୍ତୁ ଏହା ସତ । ସୋମବାର ସନ୍ଧ୍ୟାରେ ଆମେରିକାର ଫ୍ଲୋରିଡା ରାଜ୍ୟ ମେରିଟ୍ ଦ୍ୱୀପ ନିକଟରେ ବ୍ୟସ୍ତ ବହୁଳ I-95 ରାଜପଥରେ ଜରୁରୀକାଳୀନ ଅବତରଣ କରିଥିଲା ଏକ ବିମାନ । ଆଉ ଏର୍ମଜେନ୍ସୀ ଲ୍ୟାଣ୍ଡିଂ କରୁଥିବା ସମୟରେ ଏହି ବିମାନଟି ରାସ୍ତାରେ ଯାଉଥିବା ଏକ କାରକୁ ଧକ୍କା ଦେଇଥିଲା । ମଝି ଆକାଶରେ ବିମାନରେ ବୈଷୟିକ ସମସ୍ୟା ଦେଖାଦେବାରୁ ପାଇଲଟ୍‌ ରାଜପଥରେ ଅବତରଣ କରିବାକୁ ବାଧ୍ୟ ହୋଇଥିଲେ । କିନ୍ତୁ ଭିଡ଼ ରାସ୍ତାରେ ଅବତରଣ କରିବା ସମୟରେ ବିମାନଟି ଏକ ୨୦୨୩ ମଡେଲର ଟୟୋଟା କାର ସହିତ ଧକ୍କା ହୋଇଥିଲା ।

ବିମାନଟି ବିଚ୍‌କ୍ରାଫ୍ଟ ୫୫ ମଡେଲର ଥିଲା । ଯେଉଁଥିରେ ୨୭ ବର୍ଷୀୟ ପାଇଲଟ୍ ଏବଂ ତାଙ୍କ ସାଥୀ ଥିଲେ । କିନ୍ତୁ ଏହି ଦୁର୍ଘଟଣାରେ ଉଭୟ ସୁରକ୍ଷିତ ଅଛନ୍ତି । ଫ୍ଲୋରିଡା ହାଇୱେ ପାଟ୍ରୋଲ୍ (FHP) ଅନୁଯାୟୀ, ବିମାନର ଉଭୟ ଇଞ୍ଜିନ୍ ହଠାତ୍ ପାଓ୍ବାର ଲେସ୍‌ ହୋଇଯିବାରୁ ପାଇଲଟ୍‌ ରାସ୍ତାରେ ଜରୁରୀକାଳୀନ ଅବତରଣ କରିବାକୁ ବାଧ୍ୟ ହୋଇଥିଲେ ।

ଅଧିକ ପଢ଼ନ୍ତୁ: ୧୬ ବର୍ଷରୁ କମ୍ ପିଲାଙ୍କ ପାଇଁ ସୋସିଆଲ ମିଡିଆ ବ୍ୟାନ୍, ଅଷ୍ଟ୍ରେଲିଆ ସରକାରଙ୍କ ଐତିହାସିକ ନିଷ୍ପତ୍ତି

ସେହିପରି ଟୟୋଟା କାର ଚଲାଉଥିବା ୫୭ ବର୍ଷୀୟ ମହିଳା ସାମାନ୍ୟ ଆହତ ହୋଇଥିଲେ । ତାଙ୍କୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଥିଲା ।
ରାଜପଥରେ ପ୍ରବଳ ଯାତାୟାତ ସମୟରେ ସୋମବାର ସନ୍ଧ୍ୟା ପ୍ରାୟ ୫:୪୫ ସମୟରେ ଏହି ଦୁର୍ଘଟଣା ଘଟିଥିଲା । କାର ସହ ଧକ୍କା ପରେ ବିମାନଟି ରାସ୍ତାରେ ଅଟକି ଯାଇଥିଲା । ଯାହାଫଳରେ ସ୍ଥାନୀୟ ଅଞ୍ଚଳରେ କିଛି ସମୟ ପାଇଁ ଆତଙ୍କିତ ପରିସ୍ଥିତି ସୃଷ୍ଟି ହୋଇଥିଲା ।

INSANE footage: plane lands RIGHT on a car in Brevard County, Florida https://t.co/u8Va7MENN3 pic.twitter.com/TXM1NI41vY

— RT (@RT_com) December 9, 2025

ଦୁର୍ଘଟଣା ପରେ ୨୦୧ ମାଇଲ୍ ମାର୍କର ନିକଟରେ I-95ର ଦକ୍ଷିଣ ଦିଗକୁ ଯାଉଥିବା ଲେନ୍‌ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା। ଉଦ୍ଧାର ଏବଂ ରିଲିଫ୍ ଟିମ୍‌ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ରାସ୍ତା କିଛି ଘଣ୍ଟା ପାଇଁ ବନ୍ଦ ରହିବା ପରେ ସକାଳ ପ୍ରାୟ ୯ଟାରେ ଖୋଲିଥିଲା ।

ମିଳିଥିବା ସୂଚନା ଅନୁସାରେ, ସେହି ଦିନ ଫ୍ଲୋରିଡାରେ ଏହା ଦ୍ବିତୀୟ ବିମାନ ଦୁର୍ଘଟଣା ଥିଲା । ଏହା ପୂର୍ବରୁ ଏକ Cessna 172 ବିମାନ ଅର୍ଲାଣ୍ଡୋରୁ ୪୬ ମାଇଲ ଦୂରରେ ଡିଲ୍ୟାଣ୍ଡରେ ଜରୁରୀକାଳୀନ ଅବତରଣ କରିଥିଲା । ଏଥିରେ ଥିବା ଦୁଇ ଜଣ ଆହତ ହୋଇଥିଲେ, କିନ୍ତୁ ଉଭୟଙ୍କ ଅବସ୍ଥା ଏବେ ସ୍ଥିର ଥିବା ଜଣାପଡ଼ିଛି ।