Instagram and Facebook Closed / ରାତି 12ଟାରୁ ସକାଳ 6ଟା ପର୍ଯ୍ୟନ୍ତ ବନ୍ଦ ରହିବ ଇନଷ୍ଟା-ଫେସବୁକ୍

ନୂଆଦିଲ୍ଲୀ,୨୭/୦୮: ଏଣିକି ଆଉ  ରାତିରେ ପିଲା ଦେଖିପାରିବେ ନାର୍ହି ଫେସବୁକ ଓ ଇନଷ୍ଟାଗ୍ରାମ୍। ରାତି ୧୨ଟାରୁ ସକାଳ ୬ଟା ପର୍ଯ୍ୟନ୍ତ ବନ୍ଦ ରହିବ ଇନଷ୍ଟା-ଫେସବୁକ୍। ମେଟା ଏହି ବଡ଼ ନିଷ୍ପତ୍ତି ନେଇଛି।  ପିଲାଙ୍କୁ ସୋସିଆଲ ମିଡିଆ ପ୍ରତି ଅତ୍ୟଧିକ ଆକର୍ଷିତ କରୁଥିବା ଅଭିଯୋଗରେ ଟେକ୍ କମ୍ପାନୀ ମେଟା ବିରୋଧରେ ଆମେରିକାରେ ହୋଇଥିବା ବଡ଼ ଆଇନଗତ ଲଢ଼େଇର ସମାଧାନ ହୋଇଛି। ଏହି ସମାଧାନ ଅନୁଯାୟୀ, ମେଟା ପ୍ରାୟ ୧୭ ବିଲିୟନ ଡଲାର ଦେଇପାରେ ଏବଂ ଫେସବୁକ୍ ଓ ଇନଷ୍ଟାଗ୍ରାମରେ ୧୮ ବର୍ଷରୁ କମ୍ ବୟସ୍କ ବ୍ୟବହାରକାରୀଙ୍କ ପାଇଁ ଅନେକ କଡ଼ା ପରିବର୍ତ୍ତନ କରାଯିବାର ଯୋଜନା ରହିଛି।

ଏହି ମାମଲାର କେନ୍ଦ୍ରବିନ୍ଦୁରେ ରହିଛି ପିଲାମାନଙ୍କ ସୋସିଆଲ ମିଡିଆ ବ୍ୟବହାର ଏବଂ ସେମାନଙ୍କ ମାନସିକ ସୁରକ୍ଷା। ଆମେରିକାର ଅନେକ ରାଜ୍ୟ ୨୦୨୩ ମସିହାରେ ମେଟା ବିରୋଧରେ ମାମଲା ରୁଜୁ କରିଥିଲେ। ଅଭିଯୋଗ ଥିଲା ଯେ ଫେସବୁକ୍ ଓ ଇନଷ୍ଟାଗ୍ରାମରେ ଏଭଳି କିଛି ଫିଚର ରହିଛି, ଯାହା ପିଲା ଓ କିଶୋରମାନଙ୍କୁ ଦୀର୍ଘ ସମୟ ଧରି ଆପ୍‌ରେ ରହିବାକୁ ଉତ୍ସାହିତ କରୁଛି।

ରାଜ୍ୟଗୁଡ଼ିକ ପକ୍ଷରୁ କୁହାଯାଇଥିଲା ଯେ ଅତ୍ୟଧିକ ସୋସିଆଲ ମିଡିଆ ବ୍ୟବହାର ପିଲାମାନଙ୍କ ମାନସିକ ଏବଂ ଶାରୀରିକ ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇପାରେ। କମ୍ପାନୀ ଏହି ସମ୍ଭାବ୍ୟ ବିପଦ ସମ୍ପର୍କରେ ଅଭିଭାବକ ଏବଂ ସାଧାରଣ ଲୋକଙ୍କୁ ଭ୍ରମିତ କରିଥିବା ଅଭିଯୋଗ ମଧ୍ୟ ଉଠିଥିଲା। ଅଗଷ୍ଟ ୨୦୨୬ରେ କାଲିଫର୍ନିଆର ଏକ ଫେଡେରାଲ୍ କୋର୍ଟରେ ଏହି ମାମଲାର ବିଚାର ଆରମ୍ଭ ହୋଇଥିଲା।

ପଢନ୍ତୁ ଏହି ଖବର: WhatsAppରେ ବଡ଼ ସୁରକ୍ଷା ଅପଗ୍ରେଡ୍: ୬ ଅଙ୍କର PIN ବଦଳରେ ପାସୱାର୍ଡ, ଜାଣନ୍ତୁ ନୂଆ ନିୟମ

କେତେ ଟଙ୍କା ଦେବ ମେଟା?

ସମାଧାନ ରାଶିକୁ ନେଇ ଭିନ୍ନ ଭିନ୍ନ ତଥ୍ୟ ସାମ୍ନାକୁ ଆସିଛି। କାଲିଫର୍ନିଆ ଆଟର୍ଣ୍ଣି ଜେନେରାଲଙ୍କ ଅନୁଯାୟୀ, ରାଜ୍ୟଗୁଡ଼ିକ ସମାଧାନ ବାବଦରେ ୧୭ ବିଲିୟନ ଡଲାର ପର୍ଯ୍ୟନ୍ତ ପାଇପାରନ୍ତି। ଅନ୍ୟପକ୍ଷରେ ମେଟା ମୋଟ ଦେୟ ପ୍ରାୟ ୧୮ ବିଲିୟନ ଡଲାର ହୋଇପାରେ ବୋଲି କହିଛି।

ରିପୋର୍ଟ ଅନୁଯାୟୀ, ଏହି ରାଶିର ଏକ ବଡ଼ ଅଂଶ ନିଶ୍ଚିତ ଥିବାବେଳେ ୫ ବିଲିୟନ ଡଲାରରୁ ଅଧିକ ଅର୍ଥ କିଛି ସର୍ତ୍ତ ପୂରଣ ଉପରେ ନିର୍ଭର କରିବ। ମେଟା କହିଛି ଯେ ୨୦୨୬ର ତୃତୀୟ ତ୍ରୟମାସ ସୁଦ୍ଧା ଏହି ସମାଧାନ ସହ ଜଡ଼ିତ ପ୍ରାୟ ୧୦ ବିଲିୟନ ଡଲାରର ଆଇନଗତ ଖର୍ଚ୍ଚ ରିପୋର୍ଟ କରାଯିବ।

ବଦଳିବ ଫେସବୁକ୍-ଇନଷ୍ଟାଗ୍ରାମ

ଏହି ସମାଧାନ ପରେ ୧୮ ବର୍ଷରୁ କମ୍ ବୟସ୍କ ବ୍ୟବହାରକାରୀଙ୍କ ପାଇଁ ଅନେକ ନୂଆ ନିୟମ ଲାଗୁ ହେବାର କଥା କୁହାଯାଇଛି। ଫେସବୁକ୍ ଏବଂ ଇନଷ୍ଟାଗ୍ରାମ ପାଇଁ ଦିନକୁ ଦୁଇ ଘଣ୍ଟାର ଡିଫଲ୍ଟ ବ୍ୟବହାର ସୀମା ରଖାଯିବ। ଏହି ସୀମା ଅତିକ୍ରମ କରିବା ପାଇଁ ଅଭିଭାବକଙ୍କ ଅନୁମତି ଆବଶ୍ୟକ ହେବ।

ସେହିପରି କିଶୋରମାନଙ୍କ ପାଇଁ ରାତି ୧୨ଟାରୁ ସକାଳ ୬ଟା ପର୍ଯ୍ୟନ୍ତ ଆପ୍ ବ୍ୟବହାର ଉପରେ ପ୍ରତିବନ୍ଧକ ଲଗାଯିବ। ସ୍କୁଲ ସମୟରେ ଅନାବଶ୍ୟକ ବିଜ୍ଞପ୍ତି ମଧ୍ୟ ବନ୍ଦ ରହିବ। ସକାଳ ୮ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ନୋଟିଫିକେସନ୍ ଡିଫଲ୍ଟ ଭାବେ ମ୍ୟୁଟ୍ କରାଯିବ। ତେବେ ଜରୁରୀ ସୁରକ୍ଷା ସତର୍କତା ଏବଂ ସିଧାସଳଖ ବାର୍ତ୍ତା ଉପରେ ଏହି ନିୟମ ଲାଗୁ ନ ହୋଇପାରେ।

ନିରନ୍ତର ଭାବେ ଆପ୍ ବ୍ୟବହାର କରୁଥିବା କିଶୋରମାନଙ୍କୁ ସମୟ ସମୟରେ ବିରତି ନେବା ପାଇଁ ରିମାଇଣ୍ଡର ଦିଆଯିବ। ଏହା ସହ କଠୋର ବୟସ ଯାଞ୍ଚ, ସହଜ ଅଭିଭାବକ ନିୟନ୍ତ୍ରଣ ଏବଂ କ୍ଷତିକାରକ କଣ୍ଟେଣ୍ଟରୁ ପିଲାମାନଙ୍କୁ ସୁରକ୍ଷା ପାଇଁ ଅତିରିକ୍ତ ବ୍ୟବସ୍ଥା କରାଯିବ। ପବ୍ଲିକ୍ ଲାଇକ୍ କାଉଣ୍ଟ ଏବଂ କିଛି ବ୍ୟୁଟି ଫିଲ୍ଟର ଭଳି ଫିଚର ଉପରେ ମଧ୍ୟ ସୀମା ଲାଗିପାରେ।

YouTube ଓ TikTok ପାଇଁ ମଧ୍ୟ ସର୍ତ୍ତ

ମେଟାର କହିବା ଅନୁଯାୟୀ, କେବଳ ଫେସବୁକ୍ ଓ ଇନଷ୍ଟାଗ୍ରାମରେ କଡ଼ା ନିୟମ ଲାଗୁ କଲେ ସମସ୍ୟାର ସମାଧାନ ହେବ ନାହିଁ। କାରଣ ପିଲାମାନେ ଅନ୍ୟ ସୋସିଆଲ ମିଡିଆ ପ୍ଲାଟଫର୍ମକୁ ଯାଇପାରନ୍ତି। ସେଥିପାଇଁ YouTube ଓ TikTok ମଧ୍ୟ ସମାନ ଶିଶୁ ସୁରକ୍ଷା ପଦକ୍ଷେପ ଗ୍ରହଣ କରିବା ଆବଶ୍ୟକ ବୋଲି ସର୍ତ୍ତ ରଖାଯାଇଛି।

ଭାରତ ଉପରେ କ’ଣ ପ୍ରଭାବ ପଡ଼ିବ?

ଏହି ଆମେରିକୀୟ ସମାଧାନର ଭାରତରେ ସିଧାସଳଖ ଆଇନଗତ ପ୍ରଭାବ ନଥିଲେ ମଧ୍ୟ, ପିଲାମାନଙ୍କ ଅନଲାଇନ୍ ସୁରକ୍ଷାକୁ ନେଇ ବିଶ୍ୱସ୍ତରରେ ଟେକ୍ କମ୍ପାନୀ ଉପରେ ଚାପ ବଢ଼ିପାରେ। ଭାରତରେ ମଧ୍ୟ ଶିଶୁଙ୍କ ଡିଜିଟାଲ ସୁରକ୍ଷା, ବୟସ ଯାଞ୍ଚ, ଅଭିଭାବକ ନିୟନ୍ତ୍ରଣ ଏବଂ ସ୍କ୍ରିନ୍ ଟାଇମ୍ ନେଇ ଚର୍ଚ୍ଚା ଆହୁରି ଜୋରଦାର ହେବାର ସମ୍ଭାବନା ରହିଛି।

ତେବେ ଏହି ସମାଧାନ ଏବେ ମଧ୍ୟ କୋର୍ଟର ଚୂଡ଼ାନ୍ତ ଅନୁମୋଦନ ଅପେକ୍ଷାରେ ରହିଛି। ଅନୁମୋଦନ ମିଳିବା ପରେ ହିଁ ଏହାର ସର୍ତ୍ତାବଳୀ କାର୍ଯ୍ୟକାରୀ ହେବ। ମେଟା ବିରୋଧରେ ପିଲା ଓ ସୋସିଆଲ ମିଡିଆ ସୁରକ୍ଷା ସହ ଜଡ଼ିତ ଅନ୍ୟାନ୍ୟ ମାମଲା ମଧ୍ୟ ଚାଲିଛି।