Argus News - ରାତିକରେ ୟୁକ୍ରେନ୍ ଉପରେ ଋଷ ମାଡ଼ କଲା ୫୯୫ ଡ୍ରୋନ୍‍, ୪୮ ମିସାଇଲ୍

କିଭ୍: ୟୁକ୍ରେନ୍‌ ଉପରେ ପୁଣି ବଡ଼ ଆକ୍ରମଣ । ସାରା ରାତି ଅନିଦ୍ରା ରହିଲା ୟୁକ୍ରେନ୍ । ରାତିରେ ୫୯୫ ଡ୍ରୋନ୍‍, ୪୮ ମିସାଇଲ୍ ମାଡ଼ । ଯୁଦ୍ଧ ଭିତରେ ୟୁକ୍ରେନ୍ ଉପରେ ଋଷ କରିଛି ବଡ଼ ଆକ୍ରମଣ । ଯେଉଁଥିରେ ଶତାଧିକ ଲୋକ ଆହତ ହୋଇଥିବା ବେଳେ କ୍ଷତିଗ୍ରସ୍ତ ହୋଇଛି ବଡ଼ ବଡ଼ ଅଟ୍ଟାଳିକା । ୪ ଜଣ ଲୋକଙ୍କ ମୃତ୍ୟୁ ହୋଇଛି ।

ରବିବାର ରାତି ଅନିଦ୍ରା ରହିଛି ୟୁକ୍ରେନ୍ ରାଜଧାନୀ କିଭ୍ । ଋଷ ପକ୍ଷରୁ ଘନ ଘନ ଡ୍ରୋନ୍ ଓ ମିସାଇଲ୍ ମାଡ଼ କିଭ୍‌କୁ ଅସ୍ତବ୍ୟସ୍ତ କରି ରାତି ଉଜାଗର କରିବାକୁ ବାଧ୍ୟ କରିଛି । ଗତ ମାସରେ ୟୁକ୍ରେନ୍ ଉପରେ ଆକାଶ ମାର୍ଗରୁ ଋଷ ବଡ଼ ଧରଣର ଆକ୍ରମଣ କରିଥିଲା । ଯେଉଁଥିରେ ପ୍ରାଣ ହରାଇଥିଲେ ୨୧ ଜଣ । ଆଉ ଉକ୍ତ ଆକ୍ରମଣ ପରେ ଦ୍ଵିତୀୟ ବଡ଼ ଆକ୍ରମଣ କରିଛି ଋଷ ।

ଏଥିସହ ପଢ଼ନ୍ତୁ: Russia-Ukraine: ସରିବନି ଏ ଯୁଦ୍ଧ ! ପୁଣି ୟୁକ୍ରେନ୍‌ ଆକାଶରୁ ନିଆଁ ବର୍ଷା କଲା ଋଷ...

ଆକ୍ରମଣ ନେଇ କିଭ୍ ସହରର ପ୍ରଶାସନ ପ୍ରମୁଖ ତୈମୁର ତକାଚେଙ୍କୋ ରବିବାର କହିଛନ୍ତି, "ସହରର ଜନବସତି ଅଞ୍ଚଳରେ ଏହି ଆକ୍ରମଣ କରାଯାଇଛି । ମୃତକଙ୍କ ମଧ୍ୟରେ ୧୨ ବର୍ଷର ଜଣେ ଝିଅ ଅଛି ।" ରାତି ଅଧରେ କିଭ୍‌ ସହରର କେନ୍ଦ୍ର ଭାଗରେ ଋଷ ଏୟାରଷ୍ଟ୍ରାଇକ୍ କରିଛି । କିଭ୍‌ର ଆକାଶ ପୂରା ଧୂଆଁମୟ ହୋଇ ଉଠିଥିଲା ।

ଆକ୍ରମଣ ନେଇ ୟୁକ୍ରେନ୍‌ର ବାୟୁ ସେନା କହିଛି, "ଋଷ ମୋଟ ୫୯୫ ବିସ୍ଫୋରଣକାରୀ ଡ୍ରୋନ୍ ଓ ନକଲି ଅସ୍ତ୍ରଶସ୍ତ୍ର ଓ ୪୮ ମିସାଇଲ୍ ମାଡ଼ କରିଛି । ଆଉ ଏଥିରୁ ଆମ ଏୟାର ଡିଫେନ୍ସ ସିଷ୍ଟମ ୫୬୬ଟି ଡ୍ରୋନ୍ ଓ ୪୫ଟି ମିସାଇଲ୍‌କୁ ପ୍ରତିହତ କରିବାରେ ସଫଳ ହୋଇଛି ।"

ଏଥିସହ ପଢ଼ନ୍ତୁ: Ukraine-Russia war: ୟୁକ୍ରେନ୍‌ ସ୍ଵାଧୀନତାର ୩୪ ବର୍ଷ ପୂର୍ତ୍ତିରେ ଋଷର ପରମାଣୁ କେନ୍ଦ୍ର ଉପରେ ଆକ୍ରମଣ

ୟୁକ୍ରେନ୍ ରାଷ୍ଟ୍ରପତି ଜେଲେନସ୍କି କହିଛନ୍ତି, "କିଭ୍ ସହ ଜାପୋରିଜିଆ, ଖମେଲନିତ୍ସକି, ସୁମି, ମୟକୋଲାଇବ, ଚେର୍ନିହାଇବ ଓ ଓଡ଼େସାକୁ ଟାର୍ଗେଟ୍ କରିଛି ଋଷ । ଏହି ଆକ୍ରମଣରେ ପ୍ରାୟ ୪୦ରୁ ଅଧିକ ଲୋକ ଆହତ ହୋଇଛନ୍ତି ।"

ଜେଲେନସ୍କି ଆହୁରି କହିଛନ୍ତି, ଏହି ଆକ୍ରମଣ ଜାତିସଂଘ ମହାସଭା ସପ୍ତାହ ବୈଠକର ସମାପ୍ତ ସମୟରେ ହୋଇଛି । ଆଉ ଆକ୍ରମଣ କରି ଋଷ ନିଜ ଅସଲ ପରିଚୟ ପ୍ରମାଣିତ କରିଛି । ଯୁଦ୍ଧ ସହ ହତ୍ୟା ଜାରି ରଖିବାକୁ ମସ୍କୋ ଚାହୁଁଛି । ଋଷକୁ ଅଟକାଇବା ପାଇଁ ଚାରିଆଡ଼ୁ ଚାପ ପଡ଼ିବା ଆବଶ୍ୟକ ବୋଲି କହିଛନ୍ତି ଜେଲେନସ୍କି ।

ଏହା ପୂର୍ବରୁ ୟୁକ୍ରେନ୍ ୩୪ତମ ସ୍ଵାଧୀନତା ଦିବସ ପାଳୁଥିବା ବେଳେ ଋଷର ପରମାଣୁ କେନ୍ଦ୍ର ଉପରେ ଡ୍ରୋନ୍ ଆକ୍ରମଣ କରିଥିଲା । ଏହି ଆକ୍ରମଣ ଋଷର ପଶ୍ଚିମ କୁର୍ସ୍କରେ ଥିବା ଏକ ପରମାଣୁ କେନ୍ଦ୍ର ଉପରେ ହୋଇଥିଲା । ଡ୍ରୋନ୍ ଆକ୍ରମଣ ପରେ ପ୍ଲାଣ୍ଟରେ ନିଆଁ ଲାଗି ଯାଇଥିଲା । ଉକ୍ତ ଆକ୍ରମଣ ପାଇଁ ୟୁକ୍ରେନ୍‌କୁ ଦାୟୀ କରିଥିଲା ଋଷ ।