ଆଇପିଏଲର ଆଗାମୀ ସିଜିନ୍‌ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ତା'ର ହୋମ୍‌ ମ୍ୟାଚ୍‌ ଚିନ୍ନାସ୍ବାମୀ ଷ୍ଟାଡିୟମରେ ଖେଳିବ କି ନାହିଁ ତାକୁ ନେଇ ଲାଗି ରହିଛି କଳ୍ପନାଜଳ୍ପନା । ତେବେ ଏହାରି ମଧ୍ୟରେ ଏକ ବଡ଼ ବୟାନ ଦେଇଛନ୍ତି କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡିକେ ଶିବକୁମାର । ସେ କହିଛନ୍ତି, ୨୦୨୬ରେ ଆଇପିଏଲ ମ୍ୟାଚ୍‌ ବେଙ୍ଗାଲୁରୁରୁ ସ୍ଥାନାନ୍ତରିତ ହେବ ନାହିଁ । ଏହି ବର୍ଷ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୁରୁ (ଆରସିବି) ଟାଇଟଲ୍ ବିଜୟ ପରେ ଚିନ୍ନାସ୍ୱାମୀ ଷ୍ଟାଡିୟମରେ ହୋଇଥିଲା ବିଜୟ ଉତ୍ସବ । ଆଉ ଏହି ବିଜୟ ଉତ୍ସବରେ ଷ୍ଟାଡିୟମ ବାହାରେ ଦଳାଚକଟା ହୋଇଥିଲା । ଆଉ ଏଥିରେ ଏକାଧିକ ଲୋକଙ୍କ ମୃତ୍ୟୁ ହୋଇଥିଲା । ତେଣୁ ଆଗାମୀ ଆଇପିଏଲ୍ ସିଜିନ୍‌ରେ ବେଙ୍ଗାଲୁରୁରେ ହେବାକୁ ଥିବା ମ୍ୟାଚ୍‌ଗୁଡ଼ିକୁ ଅନ୍ୟ ସହରକୁ ସ୍ଥାନାନ୍ତରିତ କରାଯାଇପାରେ ବୋଲି ଅନୁମାନ କରାଯାଉଥିଲା । କିନ୍ତୁ କର୍ଣ୍ଣାଟକ ସରକାର ଏବେ ଏହି ଆଶଙ୍କାକୁ ସମ୍ପୂର୍ଣ୍ଣ ଦୂର କରିଛନ୍ତି ।

ଡିକେ ଶିବକୁମାର କହିଛନ୍ତି ଯେ ଏବେଠାରୁ ଉନ୍ନତ ଭିଡ଼ ପରିଚାଳନା, କଠୋର ସୁରକ୍ଷା ମାନଦଣ୍ଡ ଏବଂ ସମ୍ପୂର୍ଣ୍ଣ ଆଇନଗତ ପ୍ରକ୍ରିୟା ଅନୁସରଣ କରାଯିବ । ଶିବକୁମାର କହିଛନ୍ତି, "କର୍ଣ୍ଣାଟକରେ ବିଶେଷକରି ବେଙ୍ଗାଲୁରୁରେ ଘଟିଥିବା ଘଟଣାଗୁଡ଼ିକୁ ଦୃଷ୍ଟିରେ ରଖି ଆମେ ନିଶ୍ଚିତ କରିବୁ ଯେ ଏପରି ଘଟଣା ପୁନରାବୃତ୍ତି ନହୁଏ । ଆଗକୁ ଚିନ୍ନାସ୍ୱାମୀ ଷ୍ଟାଡିୟମରେ ଇଭେଣ୍ଟଗୁଡ଼ିକ ଅନୁଷ୍ଠିତ ହେବ ଯାହା ବେଙ୍ଗାଲୁରୁର ପ୍ରତିଷ୍ଠା ବଜାୟ ରଖିବ । କିନ୍ତୁ ଆମେ ଏହି ଇଭେଣ୍ଟଗୁଡ଼ିକୁ ଉପଯୁକ୍ତ ଆଇନଗତ ଢାଞ୍ଚାରେ ଏବଂ ଏହି ଷ୍ଟାଡିୟମ ବ୍ୟବହାର କରିବା ସମୟରେ ଭିଡ଼ ପରିଚାଳନା ଉପରେ ଅଧିକ ଧ୍ୟାନ ଦେବୁ।"

ଡିକେ ଶିବକୁମାର କହିଛନ୍ତି, "ଏହା ବ୍ୟତୀତ, ଆମେ ବିକଳ୍ପ ଭାବରେ ଏକ ବଡ଼ ଷ୍ଟାଡିୟମ ମଧ୍ୟ ନିର୍ମାଣ କରିବୁ । ବିଜୟ ଉତ୍ସବରେ ଘଟିଥିବା ଅଘଟଣ ପରେ IPLକୁ ଅନ୍ୟତ୍ର ସ୍ଥାନାନ୍ତର କରିବା ବିଷୟରେ ଆଲୋଚନା ହୋଇଥିଲା। କିନ୍ତୁ IPL ସ୍ଥାନାନ୍ତର କରାଯିବ ନାହିଁ; ଆମେ ଏହାକୁ ଏଠାରେ ଆୟୋଜନ କରିବୁ। ଏହା କର୍ଣ୍ଣାଟକ ଏବଂ ବେଙ୍ଗାଲୁରୁର ଗର୍ବ ଏବଂ ଆମେ ଏହାକୁ ସୁରକ୍ଷା ଦେବୁ''।

କର୍ଣ୍ଣାଟକ ସରକାର ନିର୍ଦ୍ଦେଶ ଦେଇଥିଲେ ଯେ ଏମ. ଚିନ୍ନାସ୍ୱାମୀ ଷ୍ଟାଡିୟମର ଗଠନମୂଳକ ସୁରକ୍ଷା ପାଇଁ ଯାଞ୍ଚ କରାଯିବ। ପବ୍ଲିକ୍ ୱାର୍କସ୍ ବିଭାଗ (PWD) କର୍ଣ୍ଣାଟକ ରାଜ୍ୟ କ୍ରିକେଟ୍ ଆସୋସିଏସନ୍ (KSCA)କୁ ଏକ ନୋଟିସ ପଠାଇଥିଲା। KSCA କୁ NABL-ପ୍ରମାଣିତ ବିଶେଷଜ୍ଞଙ୍କ ଦ୍ୱାରା ପ୍ରସ୍ତୁତ ଷ୍ଟାଡିୟମର ଏକ ବିସ୍ତୃତ ସୁରକ୍ଷା ରିପୋର୍ଟ ଦାଖଲ କରିବାକୁ ବାଧ୍ୟ କରାଯାଇଥିଲା । ଆଉ ଏହି ରିପୋର୍ଟ ସୂଚାଇବ ଯେ ଷ୍ଟାଡିୟମର ଗ୍ୟାଲେରୀ, ଢାଞ୍ଚା ଏବଂ ଦର୍ଶକ କ୍ଷମତା ସୁରକ୍ଷିତ କି ନାହିଁ । ଏହି ରିପୋର୍ଟ ଆଧାରରେ ୨୦୨୬ରୁ ଏଠାରେ IPL ମ୍ୟାଚ୍ ଆୟୋଜନ କରାଯାଇପାରିବ କି ନାହିଁ ତାହା ନିଷ୍ପତ୍ତି ନିଆଯାଇଥିଲା ।

ଚିନ୍ନାସ୍ୱାମୀ ଷ୍ଟାଡିୟମଟି ପବ୍ଲିକ୍ ୱାର୍କସ୍ ବିଭାଗରୁ ଲିଜ୍ ନିଆଯାଇଥିବା ୧୭ ଏକର ଜମିରେ ନିର୍ମିତ । ଜୁନ୍ ୨୦୨୪ରେ ଚିନ୍ନାସ୍ୱାମୀ ଷ୍ଟାଡିୟମ ବାହାରେ ଦଳାଚକଟା ଘଟି ୧୧ ଜଣଙ୍କ ମୃତ୍ୟୁ ହୋଇଥିଲା ଏବଂ ୫୦ ରୁ ଅଧିକ ଆହତ ହୋଇଥିଲେ। ସେବେଠାରୁ ଷ୍ଟାଡିୟମକୁ କୌଣସି ଅନ୍ତର୍ଜାତୀୟ ମ୍ୟାଚ୍ ଆୟୋଜନ କରିବାର ଅଧିକାର ଦିଆଯାଇ ନାହିଁ। ସୁରକ୍ଷା ପ୍ରମାଣପତ୍ର ସମାପ୍ତ ହେବା ପରେ ୨୦୨୬ରେ ଏଠାରେ IPL ମ୍ୟାଚ୍ ଅନୁଷ୍ଠିତ ହେବ ।