ଆଉ କିଛି ଦିନ ପରେ ଶେଷ ହେବାକୁ ଯାଉଛି ନଭେମ୍ବର ମାସ । ଆରମ୍ଭ ହେବ ନୂଆ ମାସ । ତେବେ ନୂତନ ମାସ ଅନେକ ଆର୍ଥିକ ପରିବର୍ତ୍ତନ ଆଣିବ ଯାହା ସିଧାସଳଖ ଆପଣଙ୍କ ପକେଟକୁ ପ୍ରଭାବିତ କରିପାରେ । ଏହି ପରିବର୍ତ୍ତନଗୁଡ଼ିକ ମଧ୍ୟରେ LPG ଗ୍ୟାସ ସିଲିଣ୍ଡର, ପେନସନ, ଟିକସ ଏବଂ ଇନ୍ଧନ ସହିତ ଜଡିତ ନିୟମ ରହିଛି । ଡିସେମ୍ବର ପହିଲାରୁ ପାଞ୍ଚଟି ପ୍ରମୁଖ ନିୟମ ପରିବର୍ତ୍ତନ ହେଉଛି । ଆସନ୍ତୁ ଜାଣିବା କେଉଁ କେଉଁ କ୍ଷେତ୍ରରେ ପରିବର୍ତ୍ତନ ହେବ...

ପ୍ରଥମ ପରିବର୍ତ୍ତନ - LPG ଗ୍ୟାସ ସିଲିଣ୍ଡର ମୂଲ୍ୟ

ସରକାର ପ୍ରାୟତଃ ମାସର ପ୍ରଥମ ତାରିଖରେ LPG ମୂଲ୍ୟ ସଂଶୋଧନ କରନ୍ତି । ଏହି ପରିବର୍ତ୍ତନ କମର୍ସିଆଲ ଓ ରନ୍ଧନ ଗ୍ୟାସ୍ ସିଲିଣ୍ଡର ପାଇଁ ପ୍ରାଯୁଜ୍ୟ । ନଭେମ୍ବରରେ ତୈଳ କମ୍ପାନୀଗୁଡ଼ିକ କମର୍ସିଆଲ ଗ୍ୟାସ ସିଲିଣ୍ଡର ପାଇଁ ମୂଲ୍ୟ ସଂଶୋଧନ କରିଥିଲେ । ନଭେମ୍ବର ୧ରେ ୧୯ କିଲୋଗ୍ରାମ କମର୍ସିଆଲ ଗ୍ୟାସ ସିଲିଣ୍ଡରର ମୂଲ୍ୟ ୬.୫୦ ଟଙ୍କା ହ୍ରାସ କରାଯାଇଥିଲା । ସେହିପରି ରନ୍ଧନ ଗ୍ୟାସ୍‌ ମୂଲ୍ୟ ବହୁତ ଦିନ ଧରି ଅପରିବର୍ତ୍ତିତ ରହିଛି ।

ଦ୍ୱିତୀୟ ପରିବର୍ତ୍ତନ - UPS ଶେଷ ତାରିଖ

ସରକାରୀ କର୍ମଚାରୀଙ୍କ ପାଇଁ ୟୁନିଫାଏଡ୍ ପେନସନ ସ୍କିମ୍ (UPS) ବାଛିବା ପାଇଁ ଶେଷ ତାରିଖ ନଭେମ୍ବର ୩୦ ତାରିଖ ଧାର୍ଯ୍ୟ କରାଯାଇଛି । ପୂର୍ବରୁ ଏହା ସେପ୍ଟେମ୍ବର ୩୦ ଥିଲା । ଯେକୌଣସି ସରକାରୀ କର୍ମଚାରୀ NPS ଏବଂ UPS ମଧ୍ୟରୁ ବାଛିପାରିବେ। ଯଦି ଜଣେ ସରକାରୀ କର୍ମଚାରୀ NPS ଏବଂ UPS ମଧ୍ୟରୁ ବାଛିବାକୁ ଚାହାଁନ୍ତି, ତେବେ ସେମାନଙ୍କୁ ନଭେମ୍ବର ୩୦ ତାରିଖ ପୂର୍ବରୁ ଏହି ପ୍ରକ୍ରିୟା ସମାପ୍ତ କରିବାକୁ ପଡିବ । ଡିସେମ୍ବର ୧ ପରେ ଏହି ସୁଯୋଗ ଉପଲବ୍ଧ ନ ହୋଇପାରେ ।

ତୃତୀୟ ପରିବର୍ତ୍ତନ - ଲାଇଫ୍‌ ସାର୍ଟିଫିକେଟ୍ ଦାଖଲ

ପେନସନ ଲାଭ ପାଇବା ପାଇଁ ବରିଷ୍ଠ ନାଗରିକମାନଙ୍କୁ ଲାଇଫ୍‌ ସାର୍ଟିଫିକେଟ୍‌ ଦାଖଲ କରିବାକୁ ପଡିବ । ନଭେମ୍ବର ୩୦ ତାରିଖ ହେଉଛି ଲାଇଫ୍‌ ସାର୍ଟିଫିକେଟ୍ ଦାଖଲ କରିବାର ଶେଷ ତାରିଖ । ଲାଇଫ୍‌ ସାର୍ଟିଫିକେଟ୍‌ ଦାଖଲ ନ କଲେ ପେନସନ୍ ଉପଭୋକ୍ତାଙ୍କ ପେନସନ୍‌ ସ୍ଥଗିତ ରଖାଯାଇପାରେ ।

ଚତୁର୍ଥ ପରିବର୍ତ୍ତନ - ଟିକସ ନିୟମ

ଯଦି ଆପଣଙ୍କର ଅକ୍ଟୋବରରେ TDS କଟାଯାଇଥିଲା, ତେବେ ଆପଣଙ୍କୁ ଧାରା 194-IA, 194-IB, 194M, ଏବଂ 194S ଅନୁଯାୟୀ ଏକ ବିବରଣୀ ଦାଖଲ କରିବାକୁ ପଡିବ । ବିବରଣୀ ଦାଖଲ କରିବାର ଶେଷ ତାରିଖ ହେଉଛି ନଭେମ୍ବର ୩୦ । ଏହା ସହିତ, ଯେଉଁ ଟିକସଦାତାମାନଙ୍କୁ ଧାରା 92E ଅନୁଯାୟୀ ରିପୋର୍ଟ ଦାଖଲ କରିବାକୁ ପଡ଼େ, ସେମାନେ ମଧ୍ୟ ନଭେମ୍ବର ୩୦ ସୁଦ୍ଧା ଏହି କାର୍ଯ୍ୟ ସମାପ୍ତ କରିବାକୁ ପଡ଼ିବ ।

ପଞ୍ଚମ ପରିବର୍ତ୍ତନ - CNG-PNG ଏବଂ ଜେଟ୍ ଇନ୍ଧନ

ତୈଳ କମ୍ପାନୀଗୁଡ଼ିକ ପ୍ରତି ମାସରେ LPG, CNG, PNG ଏବଂ ATF ର ମୂଲ୍ୟ ସଂଶୋଧନ କରନ୍ତି। ଏହି ମାସରେ LPG, CNG, PNG ଏବଂ ଜେଟ୍ ଇନ୍ଧନ (AFT) ର ମୂଲ୍ୟ ମଧ୍ୟ ପରିବର୍ତ୍ତନ ହୋଇପାରେ।