ଡିସେମ୍ବର ୧୩ରେ ଭାରତ ଆସୁଛନ୍ତି ଆର୍ଜେଣ୍ଟିନା ଫୁଟବଲ୍ କିମ୍ବଦନ୍ତୀ ଲିଓନେଲ୍ ମେସି । ଏଥିପାଇଁ ବେଶ୍‌ ଉତ୍ସାହିତ ଅଛନ୍ତି ଫୁଟବଲ୍‌ ପ୍ରେମୀ । ମେସିଙ୍କ ଭାରତ ଗସ୍ତ ସମୟରେ ଅନେକ୍‌ ପ୍ରଶଂସକ ତାଙ୍କ ସହ ସେଲ୍ଫି ନେବାକୁ କିମ୍ବା ହ୍ୟାଣ୍ଡସେକ୍‌ କରିବାକୁ ମନ ବଳାଇଛନ୍ତି । ଆଉ ମେସିଙ୍କ ସହ ହାତ ମିଳାଇବାକୁ ଚାହୁଁଥିବା ଯେକୌଣସି ପ୍ରଶଂସକଙ୍କୁ ଏକ ମୋଟା ଅଙ୍କର ମୂଲ୍ୟ ଦେବାକୁ ପଡ଼ିବ ।

ଫୁଟବଲ୍ ସୁପରଷ୍ଟାରଙ୍କ GOAT ଇଣ୍ଡିଆ ଟୁର୍‌ର ଅଂଶ ଭାବରେ ଆୟୋଜକମାନେ ଏକ ଆଶ୍ଚର୍ଯ୍ୟଜନକ ମୂଲ୍ୟ ସହିତ ଏକ "ମିଟ୍‌ ଆଣ୍ଡ ଗ୍ରିଟ୍‌' ପ୍ୟାକେଜ୍‌ ଘୋଷଣା କରିଛନ୍ତି । ଏଥିପାଇଁ ଆପଣଙ୍କୁ ୧୦ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡ଼ିବ । ହଁ, ଆପଣ ଠିକ୍ ଶୁଣିଛନ୍ତି ! ମେସିଙ୍କ ସହ ହ୍ୟାଣ୍ଡସେକ୍‌ ଟିକେ କରିବାକୁ ଏତେ ଟଙ୍କା ଦରକାର ଯେ ଆପଣଙ୍କୁ ଆପଣଙ୍କ ଘର ବିକ୍ରି କରିବାକୁ ପଡ଼ିପାରେ କିମ୍ବା ଋଣ ନେବାକୁ ପଡ଼ିପାରେ ।

ଫ୍ୟାନ୍ସମାନେ ମେସିଙ୍କ ସହ କେଉଁଠାରେ ହ୍ୟାଣ୍ଡସେକ୍‌ କରିପାରିବେ ?

ମେସି ଡିସେମ୍ବର ୧୩ ତାରିଖରେ ଅପରାହ୍ନ ୧:୩୦ ରେ କୋଲକାତାରେ ପହଞ୍ଚିବେ । ତିନି ଦିନ ଧରି ସେ ଚାରୋଟି ସହରରେ ବିଭିନ୍ନ କାର୍ଯ୍ୟକ୍ରମରେ ସାମିଲ ହେବେ । ଯେଉଁମାନେ ମୋଟା ଅଙ୍କର ଟଙ୍କା ଦେଇପାରିବେ ସେମାନେ ହିଁ ଆର୍ଜେଣ୍ଟିନାର ଏହି ଫୁଟବଲ କିମ୍ବଦନ୍ତୀଙ୍କୁ ମୁହାଁମୁହିଁ ଭାବେ ଭେଟିପାରିବେ । ଦିଲ୍ଲୀରେ ରହୁଥିବା ଲୋକଙ୍କ ଲୀଲା ପ୍ୟାଲେସ୍‌ ହୋଟେଲରେ ମେସିଙ୍କ ସହ ସାକ୍ଷାତ ଓ ଅଭିବାଦନ କାର୍ଯ୍ୟକ୍ରମ ଆୟୋଜନ କରାଯାଇଛି । ତେବେ ଏହି କାର୍ଯ୍ୟକ୍ରମର ମୂଲ୍ୟ ଏତେ ଅଧିକ ଯେ କିଛି କିଛି ବଛା ବଛା ଲୋକ ହିଁ ଟିକେଟ୍‌ ବୁକ୍‌ କରି ଏହି କାର୍ଯ୍ୟକ୍ରମରେ ସାମିଲ ହୋଇପାରିବେ ।

ଯଦି ଆପଣ ଲିଓନେଲ ମେସିଙ୍କ ସହ ହାତ ମିଳାଇବାକୁ ଏବଂ ସେଲଫି କ୍ଲିକ୍ କରିବାକୁ ଚାହାଁନ୍ତି, ତେବେ ଆପଣ "ଡିଷ୍ଟ୍ରିକ୍ଟ ବାଏ ଜୋମାଟୋ" ମୋବାଇଲ୍ ଆପ୍ କିମ୍ବା ୱେବସାଇଟରେ ଆପଣଙ୍କର ସ୍ଲଟ୍ ବୁକ୍ କରିପାରିବେ । ଯଦି ଜଣେ ବାପା ଏବଂ ପୁଅ ମେସିଙ୍କୁ ଏକାଠି ଭେଟନ୍ତି ତେବେ ଏହାର ମୂଲ୍ୟ ୧୨.୫ ଲକ୍ଷ ରହିଛି । ଏଥିରେ ମିଟ୍‌ ଆଣ୍ଡ ଗ୍ରୀଟ୍‌, ଫଟୋ ସୁଟ୍‌, ଦୁଇ ଜଣଙ୍କ ପାଇଁ ଅଟୋଗ୍ରାଫ୍‌ ଜର୍ସି, ଭୋଜନ ଏବଂ ମେସିଙ୍କ ପେନାଲ୍ଟି ଦକ୍ଷତାର ପ୍ରଦର୍ଶନ ରହିଛି । ଯେଉଁମାନେ ପୂରା ପରିବାର ସହ ମେସିଙ୍କୁ ଭେଟିବାକୁ ଚାହାନ୍ତି, ତେବେ ସେମାନଙ୍କୁ ୨୫ ଲକ୍ଷ ଟଙ୍କା ଦେବାକୁ ପଡ଼ିବ । ମେସିଙ୍କୁ ଭେଟିବାର ସୁଯୋଗ ପାଇଥିବା ଯେ କୌଣସି ବ୍ୟକ୍ତି ଏହି ମୁହୂର୍ତ୍ତକୁ ଜୀବନସାରା ମନେ ରଖିବେ ।