ଦରମା ମିଳିଲାନି । ଶେଷରେ ଜୀବନ ହାରିଲେ ବ୍ୟକ୍ତି । ଦିନେ କି ଦୁଇ ଦିନ ନୁହେଁ, ଏକାବେଳକେ ୨୭ ମାସ ପର୍ଯ୍ୟନ୍ତ ତାଙ୍କୁ ଦରମା ମିଳିନଥିଲା । ତେଣୁ ବାଧ୍ୟ ହୋଇ ସେ ନିଜ ଜୀବନ ହାରିଲେ । ଆଉ ଶେଷରେ କହିଦେଇଗଲେ... 'ମୋ ମରିବା ପଛରେ ବଡ଼ ବଡ଼ ଅଫିସର ମାନେ ବି ଦାୟୀ, ମୋତେ ସେମାନେ ଅନେକ ମାନସିକ ନିର୍ଯାତନା ମଧ୍ୟ ଦେଇଛନ୍ତି' ।

ଏହି ମୃତ ବ୍ୟକ୍ତି ଜଣକ ହେଉଛନ୍ତି ଚିକୁସା ନାୟକ । ସେ ଯେଉଁ ସୁଇସାଇଡ ନୋଟ ଛାଡ଼ିଯାଇଛନ୍ତି, ସେଥିରେ ଉଲ୍ଲେଖ ରହିଛି ଯେ ୨୦୧୬ ମସିହାରୁ ହୋଙ୍ଗାନୁରୁ ଗ୍ରାମ ପଞ୍ଚାୟତରେ ଚିକ୍‌ସୁ କାର୍ଯ୍ୟ କରୁଥିଲେ। ତାଙ୍କର ବକେୟା ଦରମା ପ୍ରଦାନ ପାଇଁ ବାରମ୍ବାର ଅନୁରୋଧ କରିବା ଏବଂ ଅସୁସ୍ଥ ସ୍ୱାସ୍ଥ୍ୟ କାରଣରୁ ଇସ୍ତଫା ଦେବା ସତ୍ତ୍ୱେ, ଅଧିକାରୀମାନେ ତାଙ୍କ କଥା ଶୁଣି ନଥିଲେ।

ଏହାସହ ପଢ଼ନ୍ତୁ:- ଡାକ୍ତର ନା ରୋଡ୍ ସାଇଡ୍ ରୋମିଓ, କ୍ଲିନିକ୍‌ରେ ଯୁବତୀଙ୍କୁ ଏକା ପାଇ...

୨୦୧୬ରୁ କାମ କରୁଥିଲେ

ସୁଇସାଇଡ ନୋଟରେ କର୍ମଚାରୀ ଲେଖିଛନ୍ତି, "ମୁଁ ୨୦୧୬ ମସିହାରୁ ଜଳ କର୍ମଚାରୀ ଭାବରେ କାମ କରୁଛି। ମୁଁ ପଞ୍ଚାୟତ ଉନ୍ନୟନ ଅଧିକାରୀ (PDO) ଏବଂ ଗ୍ରାମ ପଞ୍ଚାୟତ ଅଧ୍ୟକ୍ଷଙ୍କୁ ମୋର ୨୭ ମାସର ବକେୟା ଦରମା ଦେବାକୁ ଅନୁରୋଧ କରିଥିଲି, କିନ୍ତୁ ସେମାନେ ମୋ କଥାକୁ ଗୁରୁତ୍ୱ ଦେଇନଥିଲେ । ମୁଁ ଜିଲ୍ଲା ପଞ୍ଚାୟତର ସିଇଓଙ୍କ ସହିତ ମଧ୍ୟ ଯୋଗାଯୋଗ କରିଥିଲି, କିନ୍ତୁ କିଛି ସୁଫଳ ମିଳିଲା ନାହିଁ।"

ମାନସିକ ନିର୍ଯାତନା

ଏହି ସୁଇସାଇଡ ନୋଟ୍‌ରେ ଆହୁରି ଅଭିଯୋଗ କରାଯାଇଛି ଯେ ପିଡିଓ ରାମେ ଗୌଡା ଏବଂ ଗ୍ରାମ ପଞ୍ଚାୟତ ସଭାପତିଙ୍କ ସ୍ୱାମୀ ମୋହନ କୁମାର ତାଙ୍କୁ ନିରନ୍ତର ମାନସିକ ନିର୍ଯାତନା ଦେଉଥିଲେ। ଖାଲି ସେତିକି ନୁହେଁ ତାଙ୍କୁ ଛୁଟି ମଧ୍ୟ ମିଳୁନଥିଲା । ତାଙ୍କୁ ସକାଳ ୮ରୁ ସନ୍ଧ୍ୟାରେ ଛଟା ଯାଏଁ ଅଫିସରେ ବସିବାକୁ ବାଧ୍ୟ କରାଯାଉଥିଲା । ଏମିତିକି ବାହାରକୁ ମଧ୍ୟ ଯିବାକୁ ତାଗିଦ କରୁଥିଲେ ।

ଏହାସହ ପଢ଼ନ୍ତୁ:- ଧର୍ମ ସଂକଟରେ ଦଳ, RJD ନେତା କରିବେ ଲଣ୍ଠନ ଚିହ୍ନ ବିରୋଧରେ ପ୍ରଚାର..!

ସେ ଆହୁରି ଲେଖିଛନ୍ତି ଯେ ପିଡିଓ ଏବଂ ମୋହନ କୁମାରଙ୍କ ନିର୍ଯାତନା ଯୋଗୁଁ ସେ ଆତ୍ମହତ୍ୟା କରୁଛନ୍ତି। ସେଇ ବଡ଼ ବଡ଼ ବାବୁଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସୁଇସାଇଡ୍‌ ନୋଟ୍‌ରେ ଗୁହାରୀ କରିଛନ୍ତି ।

ଘଟଣା ପରେ କାର୍ଯ୍ୟାନୁଷ୍ଠାନ

ଘଟଣା ସାମ୍ନାକୁ ଆସିବା ପରେ, ପିଡିଓ ଓ ଗ୍ରାମ ପଞ୍ଚାୟତ ସଭାପତି ଏବଂ ତାଙ୍କ ସ୍ୱାମୀଙ୍କ ବିରୁଦ୍ଧରେ ଏସସି/ଏସଟି ଆଇନ ଅନୁଯାୟୀ ମାମଲା ରୁଜୁ କରିଛି ପୋଲିସ । ଚିକୁସାଙ୍କ ଆତ୍ମହତ୍ୟା ପରେ, ଜିଲ୍ଲା ପଞ୍ଚାୟତ ସିଇଓ, ସେବା ନିୟମ ଉଲ୍ଲଂଘନ ଅଭିଯୋଗ ଏବଂ କାମରେ ଅବହେଳା ଦର୍ଶାଇ ରାମ ଗୌଡାଙ୍କୁ ନିଲମ୍ବିତ କରିଛନ୍ତି।

କଂଗ୍ରେସ ସରକାରଙ୍କୁ ଘେରିଲା ବିଜେପି

ଅନ୍ୟପଟେ ବିଜେପି ଏହି ଘଟଣାର ତୀବ୍ର ନିନ୍ଦା କରିଛି। ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କୁ ସମାଲୋଚନା କରି ବିଜେପି କହିଛି ଯେ କଂଗ୍ରେସ ସରକାର ବେଳେ ଆଉ ଜଣେ ସରକାରୀ କର୍ମଚାରୀ ଆତ୍ମହତ୍ୟାର ଶିକାର ହେଲେ ।

ଶୁକ୍ରବାର, ବିଜେପି କହିଛି ଯେ ମାତ୍ର ଦୁଇ ଦିନ ପୂର୍ବରୁ, କାଲାବୁରାଗିର ଜଣେ ଲାଇବ୍ରେରିଆନ୍ ଦରମା ନପାଇବାରୁ ଆତ୍ମହତ୍ୟା କରିଥିଲେ। ସେହି ଘଟଣାର ଆଘାତ କମିବା ପୂର୍ବରୁ, କର୍ଣ୍ଣାଟକ ସରକାରଙ୍କ ଦେବାଳିଆ ଗୁଣ ଯୋଗୁଁ ଆଉ ଏକ ଜୀବନ ଚାଲିଯାଇଛି ।