ଉତ୍ତର ପ୍ରଦେଶର ପିଲିଭୀତ ସହରର ଟନକପୁର ରାଜପଥରେ ଏକ ଦୁର୍ଘଟଣା ଘଟିଥିଲା । ଯାହା ସମଗ୍ର ଅଞ୍ଚଳରେ ଆତଙ୍କ ସୃଷ୍ଟି କରିଥିଲା । ସହରର ପ୍ରମୁଖ୍ୟ ଗୌହାନିଆ ପୋଖରୀ ନିକଟରେ ଏକ କାର ନିୟନ୍ତ୍ରଣ ହରାଇ ହଠାତ୍ ପୋଖରୀ ଭିତରକୁ ଖସିପଡ଼ିଲା । ଆଉ ଦେଖୁ ଦେଖୁ ଏହି ବୁଡ଼ିବାକୁ ଲାଗିଲା । ଆଉ କାର ଭିତରେ ଥିବା ଶିବମ୍ ନାମକ ଜଣେ ଯୁବକ ଫସି ଯାଇଥିଲେ ।

ପୋଖରୀ ଭିତରେ କାର ବୁଡ଼ୁଥିବାର ଦେଖି ଜଣେ ନାବିକ ଏବଂ ଜଣେ ପଥଚାରୀ ନିଜ ଜୀବନକୁ ବାଜି ଲଗାଇ କାର ଭିତରେ ଫସି ରହିଥିବା ଡ୍ରାଇଭରଙ୍କୁ ଉଦ୍ଧାର କରିଥିଲେ । ତେବେ ଏହି ଦୃଶ୍ୟ କୌଣସି ଚଳଚ୍ଚିତ୍ର ଦୃଶ୍ୟଠାରୁ କମ୍ ନଥିଲା । ଏବେ ପୋଖରୀ ଭିତରୁ ଡ୍ରାଇଭରଙ୍କୁ ରେସ୍କ୍ୟୁ ସମୟର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ।

ଗୁରୁବାର ସକାଳ ପ୍ରାୟ ୧୦:୪୦ ସମୟରେ ଏହି ଘଟଣା ଘଟିଥିଲା । କାଂଶୀରାମ କଲୋନିରୁ ପଟରୁ ଆସୁଥିବା ଏକ ଏର୍ଟିଗା କାର ଗୌହାନିଆ ପୋଖରୀ ନିକଟରେ ନିୟନ୍ତ୍ରଣ ହରାଇ ଥିଲା । ପୋଖରୀ ଚାରିପାଖରେ କୌଣସି ବ୍ୟାରିକେଡ୍ ନଥିବାରୁ କାରଟି ସିଧା ପାଣିରେ ଖସି ପଡ଼ିଲା ଏବଂ ଦ୍ରୁତ ଗତିରେ ବୁଡ଼ିବାକୁ ଲାଗିଲା । ଆଉ କାର ଭିତରେ ଫସି ରହିଥିବା ଡ୍ରାଇଭର ଜଣକ ତାଙ୍କ ଜୀବନ ବଞ୍ଚାଇବାକୁ ସଂଘର୍ଷ କରୁଥିଲେ ।



ବୁଡ଼ି ଯାଉଥିବା କାର ଭିତରର ଦୃଶ୍ୟ ଅତ୍ୟନ୍ତ ଭୟଙ୍କର ଥିଲା । କାରରେ ପାଣି ଭର୍ତ୍ତି ହୋଇଯାଇଥିଲା ଏବଂ ଡ୍ରାଇଭର ଭଲ ନିଶ୍ୱାସ ମଧ୍ୟ ନେଇପାରୁନଥିଲେ । ଆଉ ଏହି ସମୟରେ ପୋଖରୀରେ ମାଛ ଧରିଥିବା ଜଣେ ନାବିକ ଏବଂ ରାସ୍ତାରେ ଯାଉଥିବା ଜଣେ ଯୁବକ ଦିନେଶ କୁଶୱାହା ବିଳମ୍ବ ନ କରି ପାଣିକୁ ଡେଇଁ ପଡ଼ିଲେ । ନାବିକ କାର ପାଖରେ ପହଞ୍ଚି ଓ୍ବିଣ୍ଡୋ ଦେଇ ଡ୍ରାଇଭରଙ୍କୁ ବାହାର କରିବାକୁ ଚେଷ୍ଟା କରିଥିଲେ । କିଛି ସମୟର ସଂଘର୍ଷ ପରେ ଶେଷରେ କାର ଭିତରେ ଫସି ରହିଥିବା ଡ୍ରାଇଭରଙ୍କୁ ବାହାର କରିଥିଲେ ।

ଏହି ସମୟରେ ଦିନେଶ ମଧ୍ୟ ପୋଖରୀକୁ ଡେଇଁ ନାବିକଙ୍କ ସହାୟତାରେ ଆହତ ଡ୍ରାଇଭରଙ୍କୁ କୂଳକୁ ଆଣିବାରେ ସଫଳ ହୋଇଥିଲେ । ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଯେଉଁଥିରେ ଦେଖିବାକୁ ମିଳିଛି ଯେ ଦୁଇଜଣ ଯୁବକଙ୍କ ସାହାସିକତା କିପରି ଜଣେ ଯୁବକଙ୍କ ଜୀବନ ବଞ୍ଚାଇଥିଲେ ।
ଉଦ୍ଧାର ପରେ ତୁରନ୍ତ ଆହତ ଡ୍ରାଇଭର ଶିବମଙ୍କୁ ପୋଲିସ ସହାୟତାରେ ହସ୍ପିଟାଲରେ ଭର୍ତ୍ତି କରାଯାଇଛି । ଡାକ୍ତରମାନେ କହିଛନ୍ତି ଯେ ଡିହାଇଡ୍ରେସନ୍ ଏବଂ ଆତଙ୍କ ଯୋଗୁଁ ତାଙ୍କ ଅବସ୍ଥା ଗୁରୁତର ରହିଛି । ତାଙ୍କର ଚିକିତ୍ସା ଏବେ ଜାରି ରହିଛି ।


ସେପଟେ ଘଟଣା ବିଷୟରେ ସୂଚନା ପାଇ ସିଟି ମାଜିଷ୍ଟ୍ରେଟ୍ ବିଜୟ ବର୍ଦ୍ଧନ ତୋମାର, ସୁନଗାର୍ଢି ପୋଲିସ ଷ୍ଟେସନ୍ ମୁଖ୍ୟ ନରେଶ ତ୍ୟାଗୀ, ଅଗ୍ନିଶମ ବାହିନୀ ଏବଂ ଏକ ପୋଲିସ ଟିମ୍‌ ଘଟଣାସ୍ଥଳରେ ପହଞ୍ଚିଥିଲେ । କାରଟିକୁ କ୍ରେନ୍‌ ସାହାଯ୍ୟରେ ବାହାର କରାଯାଇଥିଲା ।

ସୂଚନା ଅନୁସାରେ, ଗୌହାନିଆ ପୋଖରୀ ସହରର ମଧ୍ୟଭାଗରେ ଅବସ୍ଥିତ ଏବଂ ଅନେକ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଏହାକୁ ଘେରି ରହିଛି । ଏଥିରେ ମନ୍ତ୍ରୀଙ୍କ ବାସଭବନ, ଡିଏମ ଏବଂ ଏସ୍‌ପି ବାସଭବନ, ମେଡିକାଲ କଲେଜ ଏବଂ ଅନେକ ସ୍କୁଲ ରହିଛି । ଏସବୁ ମଧ୍ୟରେ ପୋଖରୀଟି ତିନି ପାର୍ଶ୍ୱରେ ସମ୍ପୂର୍ଣ୍ଣ ଖୋଲା ଅଛି । କୌଣସି ବ୍ୟାରିକେଡ୍, ବାଡ଼ କିମ୍ବା ଚେତାବନୀ ସଙ୍କେତ ନାହିଁ। ଲୋକମାନେ ବର୍ଷ ବର୍ଷ ଧରି ସୁରକ୍ଷା ବ୍ୟବସ୍ଥା ପାଇଁ ଦାବି କରିଆସୁଛନ୍ତି, କିନ୍ତୁ ପୌର ନିଗମ ଠାରୁ ଜିଲ୍ଲା ପ୍ରଶାସନ ପର୍ଯ୍ୟନ୍ତ କେହି କୌଣସି ଦୃଢ଼ ପଦକ୍ଷେପ ନେଇ ନାହାଁନ୍ତି ।