ଏ ଖବର ଆପଣଙ୍କୁ ତାଜୁବ୍ କରୁଥିବ ନିଶ୍ଚିତ, ହେଲେ ପୁରା ଘଟଣା ଜାଣିଲେ ଆପଣଙ୍କର ବି ହୋସ୍ ଉଡିଯିବ । ଆପଣ ଭାବୁଥିବେ ହୁଏତ ବ୍ୟକ୍ତିଜଣକ ଜଣେ ସାଧୁ ହୋଇଥାଇପାରନ୍ତି, ଯେଉଁଥିପାଇଁ ସେ ଜୀବନ୍ତ ସମାଧି ନେବାକୁ ଏପରି କରୁଛନ୍ତି । କିନ୍ତୁ ଏହା ସମ୍ପୁର୍ଣ୍ଣ ଭୁଲ, ସେହି ବ୍ୟକ୍ତି ଜଣକ ହେଉଛନ୍ତି ଜଣେ ଅବସରପ୍ରାପ୍ତ ଆର୍ମି ଅଫିସର । ହେଲେ ଏପରି ନିଷ୍ପତ୍ତି ସେ କାହିଁକି ନେଲେ, ଏହା ପଛରେ ରହିଛି ଏକ ଅଜବ କାରଣ ।

ସମସ୍ତଙ୍କର ନିଜ ମୃତ୍ୟୁକୁ ଭୟ ଥାଏ । ମୃତ୍ୟୁ, ଏକ ନିଷ୍ଠୁର ସତ ଜାଣିବା ପରେ ବି ସମସ୍ତେ ନିଜ ମୃତ୍ୟୁ କଥା ଭାବିବାକୁ ବି ଭୟ କରିଥାନ୍ତି । କିନ୍ତୁ ବିହାରର ୭୪ ବର୍ଷୀୟ ପୂର୍ବତନ ଆର୍ମି ଅଫିସର ମୋହନ ଲାଲଙ୍କ ଏହି ଘଟଣା ଏବେ ବେଶ ଚର୍ଚ୍ଚାରେ । ମୋହନ ଲାଲ ଜୀବିତ ଅବସ୍ଥାରେ ମୃତ୍ୟୁର କୋକେଇରେ ଶୋଇଥିଲେ । ପ୍ରକୃତରେ ସେ ଜାଣିବାକୁ ଚାହୁଁଥିଲେ, କେତେ ଲୋକ ତାଙ୍କ ମୃତ୍ୟୁ ପରେ ତାଙ୍କ ପାଇଁ ଆଖିରୁ ଲୁହ ଗଡାଉଛନ୍ତି । କେତେ ଆତ୍ମୀୟ ସ୍ଵଜନ ତାଙ୍କର ମୃତ୍ୟୁ ପରେ ତାଙ୍କୁ ଦେଖିବା ପାଇଁ ଆସୁଛନ୍ତି, ଆଉ ପ୍ରକୃତରେ ତାଙ୍କୁ କେତେଜଣ ଭଲ ପାଉଛନ୍ତି, ତାହା ଥିଲା ତାଙ୍କର ଏପରି ଜୀବିତ ଅବସ୍ଥାରେ ମୃତ ଅଭିନୟ ପଛର ମୁଖ୍ୟ କାରଣ । ସେ ନିଜ ପରିବାରକୁ ମଧ୍ୟ ଏପରି ଅଭିନୟ କରିବାକୁ କହିଥିଲେ ।

ଅଧିକ ପଢନ୍ତୁ : କେନ୍ଦ୍ର ସରକାର ଚାହୁଁନାହାନ୍ତି ପରିବର୍ତ୍ତନ, ଫାଶୀ ବଦଳରେ ବିଷ ଇଞ୍ଜେକ୍ସନ !

ପରିବାର ଲୋକେ, ତାଙ୍କ କହିବା ମୁତାବକ ତାଙ୍କୁ କୋକେଇରେ ଶୁଆଇ ଦେଇ ଏକ ଧଳା ଚାଦର ବିଛାଇ ଦେଇଥିଲେ । ଆଉ ତାପରେ ଆରମ୍ଭ ହୋଇଥିଲା ଅସଲ ଅଭିନୟ । ବନ୍ଧୁ ପରିଜନ, ପଡୋଶୀଙ୍କ ପାଖକୁ ଯାଇଥିଲା ମୋହନ ଲାଲଲଙ୍କ ମୃତ୍ୟୁର ଫୋନ । ଆଉ ସମସ୍ତେ ଧାଇଁ ଆସିଥିଲେ ତାଙ୍କୁ ଶେଷ ଦର୍ଶନ କରିବା ପାଇଁ । ବ୍ୟାକ୍‌ ଗ୍ରାଉଣ୍ଡରେ ବାଜୁଥିଲା ଇମୋସନାଲ ମ୍ୟୁଜିକ । ତାଙ୍କ ଉପରେ ବିଛାଇ ହୋଇ ପଡିଥିଲା ଫୁଲମାଳ । ଆଉ ସେ ମଧ୍ୟ ଶୋଇ ରହିଥିଲେ ମୃତକଙ୍କ ଭଳି ।

ପରେ ଶହ ଶହ ଲୋକ ତାଙ୍କ ଶେଷ ଶୋଭାଯାତ୍ରାରେ ସାମିଲ ହେବାପାଇଁ ଆସିଥିଲେ । ଶ୍ମଶାନରେ ପହଞ୍ଚିବା ପରେ ହଠାତ କୋକେଇରୁ ଉଠି ପଡିଥିଲେ ମୋହନ । ଆଉ ସମସ୍ତଙ୍କୁ ନିଜ ମୃତ୍ୟୁ ଅଭିନୟ ପଛର କାରଣ କହିଥିଲେ । ସେ କହିଥିଲେ, ପ୍ରକୃତରେ ସେ ଜାଣିବାକୁ ଚାହୁଁଥିଲେ କେତେଲୋକ ତାଙ୍କୁ ସମ୍ମାନ କରନ୍ତି, ଆଉ ଭଲ ପାଆନ୍ତି । ପରେ ସେହି ସ୍ଥାନରେ ଏକ କୁଶ ପୁତ୍ତଳିକା ଜଳା ହୋଇଥିଲା । ଆଉ ମୋହନ ନିଜେ ସମସ୍ତଙ୍କ ପାଇଁ ଭୋଜିର ବ୍ୟବସ୍ଥା କରିଥିଲେ ।

ଗାଁ ଲୋକଙ୍କ ମୁତାବକ, ମୋହନ ଜଣେ ସମାଜ ସେବୀ ଅଟନ୍ତି । ଗତ କିଛିଦିନ ତଳେ ବର୍ଷା ଋତୁରେ ଶବଦାହ କରିବାରେ ଅସୁବିଧା ହେଉଥିବା ଦେଖି ସେ ନିଜ ଖର୍ଚ୍ଚରେ ଗାଁରେ ତିଆରି କରିଥିଲେ ଏକ ସୁସଜ୍ଜିତ ଶ୍ମଶାନ ଗୃହ । ଏହାର ଉଦଘାଟନ ମଧ୍ୟ ସେହି ଦିନ କରିଥିଲେ ମୋହନ । ସେ କହିଥିଲେ, ତାଙ୍କର ଅନ୍ତିମ ଯାତ୍ରାରେ ଗାଁ ଲୋକଙ୍କର ଅଂଶଗ୍ରହଣ କରିବା ତାଙ୍କୁ ଅତ୍ୟନ୍ତ ଖୁସି ଦେଇଥିଲା। ତେବେ ଯଦି ମୋହନ ଲାଲଙ୍କ ପରିବାର କଥା କୁହାଯାଏ, ତେବେ ତାଙ୍କର ପତ୍ନୀ ଦୀର୍ଘ ୧୪ ବର୍ଷ ତଳୁ ଚାଲି ଯାଇଛନ୍ତି । ଏବେ ତାଙ୍କର ଦୁଇଟି ପୁଅ ଏବଂ ଗୋଟେ ଝିଅ ଅଛନ୍ତି।