Argus News - ଅନଲାଇନରେ ନକଲି ଶାଢୀ ଚିହ୍ନିବ 'ଧରୋହର'; QR କୋଡ୍ କହିବ ପ୍ରଡକ୍ଟର ମାନ

ଅନେକ ସମୟରେ ଓଡ଼ିଶାଠୁ ଦୂରରେ ଥିବା ଓଡ଼ିଆଟିଏ ଆମ ପାରମ୍ପରିକ ବସ୍ତ୍ର କିଣିବାକୁ ମନ ବଳାଇଥାଏ । ହେଲେ ସେ ସର୍ବଦା ସଫଳ ହୋଇପାରିନଥାଏ । ଅନଲାଇନରେ ସଠିକ ଉତ୍ପାଦ ମିଳୁନଥିବାରୁ ଗ୍ରାହକଟିକୁ ଅଫଲାଇନ ମାଧ୍ୟମ ଉପରେ ନିର୍ଭର କରିବାକୁ ପଡ଼ିଥାଏ । ସେଥିଲାଗି ବ୍ୟସ୍ତବହୁଳ ଜୀବନରୁ ସମୟ ବାହାର କରି ଅଫଲାଇନ ଦୋକାନୀଙ୍କୁ ଖୋଜିବାକୁ ପଡ଼େ । ଯଦି କେବେକେବେ ଆମେ ଅନଲାଇନରୁ ଶାଢୀ କିଣିଥାଉ, ତେବେ ଉକ୍ତ ପ୍ରଡକ୍ଟର ମାନ ମଧ୍ୟ ସଠିକ ମିଳିନଥାଏ । ଏଣୁ ଗ୍ରାହକଙ୍କୁ ସମୟ ଲାଗୁ ପଛେ, ଅଫଲାଇନ ମାଧ୍ୟମ ଉପରେ ଭରସା କରିଥାନ୍ତି । ହେଲେ ଏବେ ଆଉ ଏପରି ହେବନାହିଁ । କାରଣ ରେଭେନ୍ସା ବିଶ୍ବବିଦ୍ୟାଳୟର ସୂଚନା ଓ ପ୍ରଯୁକ୍ତିବିଦ୍ୟା ବିଭାଗର ତୃତୀୟ ବର୍ଷର ଛାତ୍ର ଏପରି ଏକ ୱେବସାଇଟ୍ ବିକଶିତ କରିଛନ୍ତି, ଯାହାକି ଅନଲାଇନରେ ନକଲି ଶାଢୀକୁ ଚିହ୍ନିବ । ଏଥିଲାଗି ତାଙ୍କୁ ରାଜ୍ୟ ସରକାର ପୁରସ୍କୃତ ମଧ୍ୟ କରିଛନ୍ତି ।

ଏହି ୱେବସାଇଟ୍‌ର ନାମ ହେଉଛି 'ଧରୋହର' । ତୃତୀୟ ବର୍ଷର ଛାତ୍ର ଦେବୀ ପ୍ରସାଦ ମିଶ୍ର ନିଜେ ଥରେ ଠକେଇର ଶିକାର ହେବା ପରେ ତାଙ୍କ ମନକୁ ଏପରି କିଛି ନୂଆ କରିବାର ଚିନ୍ତାଧାରା ଆସିଥିଲା । ସେ ଏକଦା ଅନଲାଇନରୁ ଓଡ଼ିଶାର ଏକ ପାରମ୍ପରିକ ବସ୍ତ୍ର କିଣିଥିଲେ । ବସ୍ତ୍ରର ପୁରା ପଇସା ଦେଇଥିଲେ ମଧ୍ୟ ତାହାର ମାନ ସଠିକ୍ ନଥିଲା । ଏଥିଲାଗି ସେ ନକଲି ଶାଢୀ ଓ ବସ୍ତ୍ର ଚିହ୍ନିବା ଲାଗି ଏପରି ଏକ ଅତ୍ୟାଧୁନିକ ୱେବସାଇଟ୍ ବିକଶିତ କରିଥିବା କହିଛନ୍ତି । 

• ଉପକୃତ ହେବେ ଉଭୟ ଗ୍ରାହକ ଓ ବୁଣାକାର

ଅନେକ ସମୟରେ ବହୁ ଗ୍ରାହକ ଶାଢୀର ଦାମ୍ ଅନୁଯାୟୀ ସଠିକ ମାନର ଶାଢୀ ପାଇପାରିନଥାନ୍ତି । ଗ୍ରାହକଙ୍କ ସହିତ ବୁଣାକାର ମଧ୍ୟ ନିଜ ଶାଢୀ ପାଇଁ ଉପଯୁକ୍ତ ପାରିଶ୍ରମିକ ନ ପାଇ ପାରି କ୍ଷତି ସହିଥାଏ । ଏହି ସବୁ ସମସ୍ୟାର ସମାଧାନ ପାଇଁ ଛାତ୍ର ଦେବୀ ପ୍ରସାଦ ଏହି ୱେବସାଇଟ୍ ଡିଜାଇନ୍ କରିଥିବା କହିଛନ୍ତି । ଏହି ୱେବସାଇଟ୍ ଗ୍ରାହକଙ୍କୁ ଅସଲି ହସ୍ତତନ୍ତ ବୁଣାକାର ତଥା ଶାଢୀ ବୁଣାକାରଙ୍କ ସହିତ ଯୋଡ଼ିବ । ଯାହା ଫଳରେ ଗ୍ରାହକ ଓ ବୁଣାକାର ମଝିରେ ଆସୁଥିବା ବ୍ୟବସାୟୀ ଗ୍ରାହକଙ୍କୁ ଠକି ପାରିବେ ନାହିଁ । ବୁଣାକାର ତାର ଉଚିତ ପାରିଶ୍ରମିକ ପାଇବ ଓ ଗ୍ରାହକ ସଠିକ ମାନର ଉତ୍ପାଦ ମଧ୍ୟ ପାଇବ । 

• କେମିତି ନକଲି ଶାଢୀ ଚିହ୍ନିବ 'ଧରୋହର' ?

ଏହି ୱେବସାଇଟ୍‌ରେ ବ୍ଲକ ଚେନ୍ ଟେକ୍ନୋଲୋଜିର ବ୍ୟବହାର କରାଯାଇଛି । ଯାହା ଫଳରେ ଏଥିରେ କୌଣସି ତଥ୍ୟ ରଖିଲେ ଏହାକୁ ସହଜରେ କେହି ବଦଳାଇପାରିବେ ନାହିଁ । ବୁଣାକାର ନିଜେ ପ୍ରସ୍ତୁତ କରୁଥିବା ବସ୍ତୁର ସମସ୍ତ ତଥ୍ୟ ଏଥିରେ ଦେଇପାରିବେ । ଯାହାକୁ ଗ୍ରାହକ ୱେବସାଇଟ୍‌ରେ ଦେଖି କିଣିପାରିବେ । ବୁଣାକାର ନିଜେ ହିଁ ନିଜ ଉତ୍ପାଦ ବିକ୍ରି କରିବା ପାଇଁ ଏହି ୱେବସାଇଟକୁ ବ୍ୟବହାର କରିପାରିବେ । ସେପଟେ କ୍ରେତା ମଧ୍ୟ ସିଧାସଳଖ ବୁଣାକାରଙ୍କଠାରୁ ଅସଲି ବସ୍ତ୍ର କିଣିପାରିବେ ।

• QR କୋଡ୍ କହିବ ପ୍ରଡକ୍ଟର ମାନ

ଏହି ୱେବସାଇଟ୍‌ରେ ଉପଲବ୍ଧ ପ୍ରତ୍ୟେକ ଶାଢୀ ଉପରେ QR କୋର୍ଡର ବ୍ୟବସ୍ଥା ରହିବ । ଏହା ଫଳରେ କ୍ରେତା କିଣୁଥିବା ଜିନିଷର ମାନ ବିଷୟରେ ଅବଗତ ହୋଇପାରିବେ । କେଉଁଠାରେ ମଧ୍ୟ ନକଲି ବସ୍ତୁ ସ୍ଥାନିତ ହେଲେ ଆପ୍ ଜରିଆରେ ସହଜରେ ଧରାଯାଇପାରିବ । ଏପରି ହେବା ଦ୍ବାରା ସଠିକ ଗ୍ରାହକ ଉପଯୁକ୍ତ ମାନର ଉତ୍ପାଦ ତିଆରି କରୁଥିବା ବ୍ୟକ୍ତିଙ୍କ ଠାରୁ ସଠିକ ଜିନିଷ କିଣିପାରିବେ । ବିଶେଷକରି କୁଟୀର ଶିଳ୍ପ, ହସ୍ତତନ୍ତ ଏବଂ ହସ୍ତଶିଳ୍ପ ଭଳି ଜିନିଷକୁ ସ୍ଥାନିତ କରିବା ପାଇଁ ଦେବୀ ପ୍ରସାଦ ଏହି ୱେବସାଇଟ୍ ପ୍ରସ୍ତୁତ କରିଥିବା କହିଛନ୍ତି ।

• ପୁରସ୍କୃତ କଲେ ରାଜ୍ୟ ସରକାର

ଦେବୀ ଅଗଷ୍ଟ ମାସରେ ଏହି ୱେବସାଇଟ୍‌କୁ ନେଇ କାମ ଆରମ୍ଭ କରିଥିବାବେଳେ ମାତ୍ର ୫ ମାସ ମଧ୍ୟରେ ଏହା ଶେଷ ପର୍ଯ୍ୟାୟରେ ପହଞ୍ଚିଥିଲା । ଏହି ୱେବସାଇଟ୍ ମାଧ୍ୟମରେ କୁଟୀରଶିଳ୍ପ, ହସ୍ତତନ୍ତ ଓ ହସ୍ତଶିଳ୍ପ ଶାଢ଼ୀଗୁଡିକୁ ଗ୍ରାହକ ଅତି ସହଜରେ କିଣିପାରିବେ । ଦେବୀଙ୍କର ଏହି ୱେବସାଇଟ ପାଇଁ ତାଙ୍କୁ ରାଜ୍ୟ ସରକାର ପୁରସ୍କୃତ ମଧ୍ୟ କରିଛନ୍ତି । ଉଚ୍ଚଶିକ୍ଷା ବିଭାଗ ତାଙ୍କ ପ୍ରୋଜେକ୍ଟକୁ ପ୍ରଶଂସା କରିବା ସହ ୫ ଲକ୍ଷ ଟଙ୍କା ପ୍ରଦାନ କରିଛନ୍ତି ।

ଏଥିସହ ପଢନ୍ତୁ: ଏୟାରଟେଲ୍ ଗ୍ରାହକଙ୍କୁ ବଡ଼ ଝଟକା; ବନ୍ଦ କଲା ଏହି ଫ୍ରି ସବସ୍କ୍ରିପସନ