ସରକାରଙ୍କୁ ଘାରିଛି ଗୁଟଖା ଚିନ୍ତା । ରାଜଧାନୀରୁ ହଟିବ ଗୁଟଖା ବିଜ୍ଞାପନ । ଆକ୍ସନ ମୋଡରେ ବିଏମସି । ସାଧାରଣ ପରିଷଦ ବୈଠକରେ ନିଆଗଲା ବଡ଼ ନିଷ୍ପତ୍ତି । ନିୟମ ନ ମାନିଲେ ଲାଇସେନ୍ସ ରଦ୍ଦ ହେବ । ସେପଟେ ଏବେ ବି ରାଜ୍ୟରେ ଗୁଟୁଖାର ଚାଲିଛି କଳାବଜାରୀ । ଚଢା ଦରରେ ବିକ୍ରି ହେଉଛି ଗୁଟୁଖା ।

କ୍ୟାନସର ବିରୋଧରେ ବଡ଼ ଲଢେଇ । ରାଜ୍ୟରେ ଗୁଟଖା ବନ୍ଦ ପାଇଁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର । ଏନେଇ ପ୍ରାଶାସନିକ ସ୍ତରରେ ନିର୍ଦ୍ଦେଶ ପରେ ଭୁବନେଶ୍ଵର ମହାନଗର ନିଗମ ପକ୍ଷରୁ ମଧ୍ୟ ରାଜଧାନୀରେ ଗୁଟଖା ବନ୍ଦ ନିୟମକୁ କଡ଼ାକଡ଼ି କରାଯାଇଛି । ବିଏମସି ଠାରୁ ଲାଇସେନ୍ସ ପାଇଥିବା କୌଣସି ବି ଭେଣ୍ଡିଂ ଜୋନ୍ କିମ୍ବା ଓମ୍‌ଫେଡ୍‌ ବୁଥରେ ଗୁଟଖା ବିକ୍ରିର ଅଭିଯୋଗ ଆସିଲେ କଡ଼ା କାର୍ଯ୍ୟାନୁଷ୍ଠାନ ସ୍ବରୂପ ଜରିମାନା ଆଦାୟ ସହିତ ଲାଇସେନ୍ସକୁ ବାତିଲ କରାଯିବ ।

ସେହିପରି ଏନଫୋର୍ସମେଣ୍ଟ ଟିମ୍‌ର ଚଢ଼ାଉକୁ ଜୋରଦାର କରାଯିବ, ରାଜଧାନୀର ଛକ ବଜାରରେ ଗୁଟଖାକୁ ପ୍ରୋତ୍ସାହିତ କଲା ଭଳି ଲାଗିଥିବା ହୋର୍ଡିଂ ସବୁକୁ ହଟାଯିବ । ସମ୍ପୃକ୍ତ ଏଜେନ୍ସି ଉପରେ ମଧ୍ୟ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଏମସିର ୩୮ ତମ ସାଧାରଣ ପରିଷଦ ବୈଠକରେ ନିଷ୍ପତ୍ତି ନିଆଯାଇଛି ।

କୋରାପୁଟ ଜିଲ୍ଲାର ବାଣିଜ୍ୟ କାରବାର ଗନ୍ତାଘର କୁହା ଯାଉଥିବା ଜୟପୁର ସହର । ଏଠାରେ ଖୁଲମଖୁଲା ବିକ୍ରି ହେଉଛି ପାନ ପୁଡ଼ିଆ ଓ ଗୁଟଖା । ସବୁ ଦୋକାନରେ ଓହଳିଛି ନାମୀଦାମି କମ୍ପାନୀର ମାଳମାଳ ଗୁଟଖା । କଟକଣା ସତ୍ତ୍ବେ ବଜାରରେ ବିକ୍ରି ହେଉଛି ଗୁଟଖା ଓ ପାନ ମସଲା । କିଛି ଅସୁଧା ବ୍ୟବସାୟୀ ଗୁଟଖା ଉପରେ ରୋକ ଲାଗିବାର ଫାଇଦା ଉଠାଇ କଳାବଜାରୀ କରି ମାଲେମାଲ ହେଉଛନ୍ତି । ଗୁଟଖା ଏବେ ସମାଜ ପାଇଁ ସାଜିଛି ଚିନ୍ତାର କାରଣ । ମୁଖଗହ୍ୱର କ୍ୟାନସର ରୋଗୀଙ୍କ ସଂଖ୍ୟା ବୃଦ୍ଧି ଏବେ ସରକାରଙ୍କ ପାଇଁ ଚିନ୍ତାର କାରଣ ପାଲଚିଛି । ଆଉ ଏସବୁ ଭିତରେ ଆକ୍ସନ ମୋଡ଼କୁ ଆସିଛନ୍ତି ସରକାର ।