Argus News - ଚଳିତବର୍ଷ ଇଣ୍ଡୋନେସିଆକୁ ଐତିହାସିକ କଟକ ବାଲିଯାତ୍ରାର ସହଯୋଗୀ ରାଷ୍ଟ୍ର ଘୋଷଣା

କଟକ: ନଭେମ୍ବର ୫ ତାରିଖରୁ ଆରମ୍ଭ ହେବାକୁ ଯାଉଛି ଐତିହାସିକ କଟକ ବାଲିଯାତ୍ରା । ଓଡ଼ିଶାର ସର୍ବବୃହତ ତଥା ଦକ୍ଷିଣପୂର୍ବ ଏସିଆର ବୃହତ ବାଣିଜ୍ୟ ମେଳା ଓ ସାଂସ୍କୃତିକ ମେଳାର ସହଯୋଗୀ ରାଷ୍ଟ୍ର ଭାବେ ଇଣ୍ଡୋନେସିଆ ନାଁ ଘୋଷଣା କରାଯାଇଛି ।

ପୁରାତନ କଳିଙ୍ଗ ଏବେର ଓଡ଼ିଶା ସହ କାଳ କାଳରୁ ରହିଛି ଇଣ୍ଡୋନେସିଆ (ବାଲି)ର ସମ୍ପର୍କ । ନୌବାଣିଜ୍ୟର ସ୍ଵର୍ଣ୍ଣିଂମ ଇତିହାସ ସହ ଓଡ଼ିଶାର କଳା ସଂସ୍କୃତିର ସମ୍ପର୍କ ମଧ୍ୟ ଇଣ୍ଡୋନେସିଆ ସହ ରହିଛି । ଯାହାକୁ ନେଇ ଐତିହାସିକ କଟକ ବାଲିଯାତ୍ରାର ପ୍ରଥମ ସହଯୋଗୀ ରାଷ୍ଟ୍ର ଭାବେ ଇଣ୍ଡୋନେସିଆକୁ ଚୟନ କରାଯାଇଛି । ଏନେଇ ସୂଚନା ଦେଇଛନ୍ତି କଟକର ଅତିରିକ୍ତ ଜିଲ୍ଲାପାଳ ଶିବୋ ଟପ୍ପୋ ।

ଏଥିସହ ପଢ଼ନ୍ତୁ: ପ୍ରଥମ ଓଡ଼ିଆ ନ୍ୟୁଜ୍ ଚ୍ୟାନେଲ୍ ଭାବେ ଐତିହାସିକ କଟକ ବାଲିଯାତ୍ରା ସହ ଯୋଡ଼ି ହେଲା ଅର୍ଗସ ନ୍ୟୁଜ୍

ଐତିହାସିକ କଟକ ବାଲିଯାତ୍ରାରେ ଇଣ୍ଡୋନେସିଆ ସହ ସହଭାଗୀତା ପାରମ୍ପାରିକ ବାଣିଜ୍ୟ ସମ୍ପର୍କକୁ ଆଉଥରେ ଯୋଡ଼ିବ । ମନେ ପକାଇବ କଳିଙ୍ଗ ସହ ବାଲି ଦ୍ଵୀପର ପୁରୁଣା ସ୍ମୃତି । ଏଥିସହ ବାଲିଯାତ୍ରାରେ ଭାଗ ନେବେ ଇଣ୍ଡୋନେସିଆରୁ ଆସିଥିବା ଅତିଥି ।

ବାଲିଯାତ୍ରାର ସହଯୋଗୀ ରାଷ୍ଟ୍ର ଇଣ୍ଡୋନେସିଆ ପାଇଁ ବାଲିଯାତ୍ରା ପଡ଼ିଆରେ ସ୍ଵତନ୍ତ୍ର ପ୍ୟାଭିଲିୟନ ରହିବ । ଯେଉଁଠି ଇଣ୍ଡୋନେସିଆର ହସ୍ତଶିଳ୍ପ ସହ ଅନ୍ଯ କଳାକୃତି ଓ କାରିଗରୀ ପ୍ରଦର୍ଶନୀ କରାଯିବ । ବାଲିଯାତ୍ରାକୁ ବୁଲି ଆସୁଥିବା ଲୋକେ ଇଣ୍ଡୋନେସିଆର କଳା, ସଂସ୍କୃତି ଓ ପରମ୍ପରା ବାବଦରେ ଜାଣିପାରିବେ । ଏହାଦ୍ଵାରା ସାଂସ୍କୃତିକ ଭାବ ବିନିମୟ ହୋଇ ପାରିବ ।

ନଭେମ୍ବର ୫ କାର୍ତ୍ତିକ ପୂର୍ଣ୍ଣିମାରୁ ବାଲିଯାତ୍ରା ଆରମ୍ଭ ହୋଇ ୧୨ ତାରିଖରେ ସରିବ । ଉପର ବାଲିଯାତ୍ରା ପଡ଼ିଆ ସହ ତଳ ବାଲିଯାତ୍ରା ପଡ଼ିଆ ମୋଟ ୬୦ ଏକରରେ ଆୟୋଜିତ ହେବ ମେଳା । ୮ ଦିନ ବ୍ୟାପି ହେଉଥିବା ବାଲିଯାତ୍ରାରେ ଓଡ଼ିଶା ସହ ଦେଶର କୋଣ ଅନୁକୋଣର ବିଭିନ୍ନ ଷ୍ଟଲରେ ଦେଖିବାକୁ ମିଳିବ ବିବିଧ ଭାରତର ପ୍ରତିଛବି । ଯେଉଁଥିରେ ଇଣ୍ଡୋନେସିଆ ବି ଭାଗ ନେବ ।

ଏଥିସହ ପଢ଼ନ୍ତୁ: ବାଲିଯାତ୍ରାରେ ବହିକୁ ଗୁରୁତ୍ଵ, ୭୫ ହଜାର ଓଡ଼ିଆ ବହି ମାଗଣାରେ ବାଣ୍ଟିବ ପ୍ରଶାସନ

ଚଳିତବର୍ଷ ଐତିହାସିକ କଟକ ବାଲିଯାତ୍ରାର ଉଦ୍‌ଘାଟନୀ ସମାରୋହରେ ଦକ୍ଷିଣପୂର୍ବ ଏସିଆ ଦେଶ ଗୁଡ଼ିକର ଅତିଥି ଭାଗ ନେବେ । ଇଣ୍ଡୋନେସିଆ, ଥାଇଲାଣ୍ଡ, ନେପାଳ, ଶ୍ରୀଲଙ୍କା ଏବଂ ଭୂଟାନ ଆଦି ଦେଶର କଳାକାର ନୃତ୍ୟ ପରିବେଷଣ କରିବାର କାର୍ଯ୍ୟକ୍ରମ ରହିଛି ।

ହଜାର ହଜାର ବର୍ଷର ପରମ୍ପରାକୁ ଉଜ୍ଜୀବିତ ରଖି କଟକର ମହାନଦୀ ପଠାରେ ଆୟୋଜିତ ହୁଏ ବାଲିଯାତ୍ରା । ଯାହାକି ଓଡ଼ିଶା ସହ ବାଲିର ସମ୍ପର୍କକୁ ପ୍ରତିଫଳିତ କରେ । ଦକ୍ଷିଣ-ଏସିଆର ଦେଶ ସହ ଓଡ଼଼ିଶାର ସୁଦୀର୍ଘ ସମ୍ପର୍କକୁ ମନେ ପକାଏ । ବାଲିଯାତ୍ରା ଆମକୁ ସେହି ନୌବାଣିଜ୍ୟ ଇତିହାସକୁ ଫେରାଇ ନିଏ । ବାଲିଯାତ୍ରା ମାଧ୍ୟମରେ ସୁଦୃଢ଼ ହୁଏ ସଂସ୍କୃତି, ପୁନର୍ଜୀବିତ ହୁଏ ପରମ୍ପରା, ଲୋକକଳାକୁ ମିଳେ ଆଦର, ଐତିହ୍ୟକୁ ମିଳେ ପରିଚୟ । ବାଲିଯାତ୍ରା କରେ କଳିଙ୍ଗର ଶୋଭା ବର୍ଦ୍ଧନ, ପର୍ଯ୍ୟଟନକୁ ଦିଏ ପ୍ରୋତ୍ସାହନ ।