Argus News - ଅର୍ଥନୈତିକ ସର୍ଭେ ରିପୋର୍ଟ, ବଢିଛି ମୁଣ୍ଡପିଛା ଆୟ

ଭୁବନେଶ୍ବର: ବିଧାନସଭାରେ ଉପସ୍ଥାପିତ ହେଲା ୨୦୨୫-୨୬ର ଅର୍ଥନୈତିକ ସର୍ଭେ ରିପୋର୍ଟ । ରାଜ୍ୟର ଆର୍ଥିକ ଅଭିବୃଦ୍ଧି ୭.୯ ପ୍ରତିଶତ ରହିବା ନେଇ ଆକଳନ କରାଯାଇଛି । ୨୦୨୫-୨୬ ରେ ରାଜ୍ୟର ମୁଣ୍ଡପିଛା ଆୟ ୯.୨ ପ୍ରତିଶତ ବୃଦ୍ଧି ପାଇ ୧ ଲକ୍ଷ ୮୬ ହଜାର ୭୬୧ ଟଙ୍କାରେ ପହଞ୍ଚିଛି । ଯାହାକି ଜାତୀୟ ହାରଠାରୁ ଅଧିକ । ସର୍ବଭାରତୀୟ ସ୍ତରରେ ଏହି ସମୟରେ ମୁଣ୍ଡ ପିଛା ଆୟ ୬.୯ ପ୍ରତିଶତ ଥିବା ବେଳେ ଓଡ଼ିଶାରେ ଏହା ୯.୨ ପ୍ରତିଶତ ରହିଛି ।

ବର୍ତ୍ତମାନର ମୂଲ୍ୟରେ ଓଡିଶାର ଅର୍ଥନୀତିର ଆକାର ୨୦୨୫-୨୬ରେ ୯.୯ ଲକ୍ଷ କୋଟି ଟଙ୍କା ହେବ ବୋଲି ଆକଳନ କରାଯାଇଛି । ଏହା ୨୦୨୪-୨୫ର ୯ ଲକ୍ଷ କୋଟି ଟଙ୍କାଠାରୁ ୯.୫% ବୃଦ୍ଧି ପାଇଛି । ୨୦୨୫-୨୬ରେ ବାସ୍ତବ ଆର୍ଥିକ ଅଭିବୃଦ୍ଧି ହାର ୭.୯ ପ୍ରତିଶତ ରହିବା ନେଇ ଆକଳନ କରାଯାଇଛି। ଯାହା ୨୦୨୪-୨୫ର ୭.୨ ପ୍ରତିଶତ ବୃଦ୍ଧି ହାରଠାରୁ ଅଧିକ । ଏହା ମଧ୍ୟ ସର୍ବଭାରତୀୟ ସ୍ତରର ହାରାହାରି ଅଭିବୃଦ୍ଧି ହାର ୭. ୪ ପ୍ରତିଶତ ଠାରୁ ଅଧିକ । କୃଷି ଏବଂ ଆନୁଷଙ୍ଗିକ କ୍ଷେତ୍ରର ଅବଦାନ ୨୦୨୫-୨୬ରେ ରାଜ୍ୟ ଅର୍ଥବ୍ୟବସ୍ଥାରେ ୧୯.୬ ପ୍ରତିଶତ ଆକଳନ କରାଯାଇଛି। ଯାହା ସର୍ବଭାରତୀୟ ସ୍ତରରେ ଥିବା ୧୬.୮ ପ୍ରତିଶତ ଠାରୁ ଅଧିକ । କୃଷି ଏବଂ ଆନୁସଙ୍ଗିକ କ୍ଷେତ୍ରରେ 2025-26 ରେ 5.3% ଅଭିବୃଦ୍ଧି କରାଯାଇଛି । ଯାହା ସର୍ବ ଭାରତୀୟ ସ୍ତରରେ 3.1 ପ୍ରତିଶତ ଥିଲା ।

ଦେଖନ୍ତୁ ଏହି ଖବର: ବିଧାନସଭା ବଜେଟ ଅଧିବେଶନର ତୃତୀୟ ଦିନ, ଆଗତ ହେବ ଅର୍ଥନୈତିକ ସର୍ଭେ ରିପୋର୍ଟ
                                     
୨୦୨୫-୨୬ର ଅର୍ଥନୈତିକ ସର୍ଭେ ରିପୋର୍ଟରେ ବଢୁଛି ରାଜ୍ୟ ଅର୍ଥନୀତିର ଆକାର। ୨୦୨୫-୨୬ରେ ଓଡିଶାର ଜିଏସଡିପି ୯.୯ ଲକ୍ଷ କୋଟି ଟଙ୍କା ହେବା ଆକଳନ କରାଯାଉଛି।। ବାସ୍ତବ ଆର୍ଥିକ ବୃଦ୍ଧିହାର ୭.୯%, ଯାହା ଜାତୀୟ ହାରଠାରୁ ଅଧିକ। ରାଜ୍ୟରେ ସରକାରୀ ଓ ବେସରକାରୀ ପୁଞ୍ଜିନିବେଶର ବୃଦ୍ଧି ଘଟିଛି। ସେହିପରି ମୁଣ୍ଡପିଛା ଆୟ ୧ ଲକ୍ଷ ୮୬ ହଜାର ୭୬୧ ଟଙ୍କାକୁ ବୃଦ୍ଧି ହୋଇଛି। କୃଷି କ୍ଷେତ୍ରରେ ବି ରାଜ୍ୟ ସରକାରଙ୍କ ଭଲ ଉପଲବ୍ଧି ରହିଛି। ରାଜ୍ୟ ଅର୍ଥନୀତିରେ କୃଷିର ଅବଦାନ ୧୯.୬% ରହିଥିବା ବେଳେ ଖାଦ୍ୟଶସ୍ୟ ଉତ୍ପାଦନ ୧୫୦.୫ ଲକ୍ଷ ମେଟ୍ରିକ୍ ଟନ୍ ରହିଛି। ଧାନ, ମାଣ୍ଡିଆ କ୍ରୟ ବୃଦ୍ଧି; କୃଷକଙ୍କୁ ଉଚ୍ଚ ଏମଏସପି ଓ ସବସିଡି ଦିଆଯାଉଛି। ଫସଲ ବିବିଧକରଣ ଓ ଜଳସେଚନ କ୍ଷମତା ବୃଦ୍ଧି ଘଟିଛି। ଦୁଗ୍ଧ, ଅଣ୍ଡା ଓ ମାଛ ଉତ୍ପାଦନରେ ଉଲ୍ଲେଖନୀୟ ବୃଦ୍ଧି ଘଟିଛି। ଓଡିଶା ଦେଶର ଚତୁର୍ଥ ସର୍ବବୃହତ୍ ମତ୍ସ୍ୟ ଉତ୍ପାଦକ ସାମୁଦ୍ରିକ ରପ୍ତାନିରେ ବୃଦ୍ଧି ହୋଇଛି।

ଜିଏସଭିଏରେ ଶିଳ୍ପର ଅବଦାନ ୪୧.୩ ପ୍ରତିଶତ ରହିଛି। ୨୪୪ଟି ନୂଆ ପ୍ରକଳ୍ପକୁ ଅନୁମୋଦନ ମିଳିଛି। ବ୍ୟବସାୟ ସୁଧାର ଓ ନୂତନ ଶିଳ୍ପ ନୀତି ପ୍ରବର୍ତ୍ତନ କରିଛନ୍ତି ରାଜ୍ୟ ସରକାର। ସେବା କ୍ଷେତ୍ର ଓ ଡିଜିଟାଲ ଉନ୍ନତି ହୋଇଛି। ସେବା କ୍ଷେତ୍ରର ବୃଦ୍ଧି ୯.୩ ପ୍ରତିଶତ ରହିଛି। ଆଇଟି, ଡାଟା ସେଣ୍ଟର, ଏଆଇ ଓ ସେମିକଣ୍ଡକ୍ଟର ନୀତି ଲାଗୁ ହୋଇଛି।  ରାଜ୍ୟରେ ବନ୍ଦର କ୍ଷମତା ବୃଦ୍ଧି ଘଟିଛି। ପାରାଦୀପ ପ୍ରମୁଖ ବନ୍ଦର ହୋଇଛି। ରେଳ ଓ ବିମାନ ସଂଯୋଗରେ ବି ବୃଦ୍ଧି ଘଟିଛି। ବିମାନ ଯାତ୍ରୀ ଓ ରେଳ ଯାତ୍ରୀ ସଂଖ୍ୟାରେ ବୃଦ୍ଧି ଘଟିଛି।

ରାଜ୍ୟ ସରକାର ଆୟୁଷ୍ମାନ ଭାରତ ଓ ରାଜ୍ୟ ସ୍ୱାସ୍ଥ୍ୟ ବୀମା ଯୋଜନା ଲାଗୁ କରିଛନ୍ତି। ଶିକ୍ଷା ବଜେଟରେ ୩୮% ବୃଦ୍ଧି ହୋଇଛି।  ବିଦ୍ୟାଳୟ ଭିତ୍ତିଭୂମି ଓ ଡିଜିଟାଲ ସୁବିଧା ବୃଦ୍ଧି କରିଛନ୍ତି। ବିଶ୍ୱ କୌଶଳ କେନ୍ଦ୍ର ମାଧ୍ୟମରେ ଉଚ୍ଚ ନିଯୁକ୍ତି ହାର ବଢିଛି।  ମହିଳାଙ୍କୁ ସୁଭଦ୍ରା ଓ ଲକ୍ଷପତି ଦିଦି ଯୋଜନା ମାଧ୍ୟମରେ ଆର୍ଥିକ ସ୍ୱାଧୀନତା ଦିଆଯାଇଛି। ଅନୁସୂଚିତ ଜାତି ଓ ଜନଜାତିଙ୍କ ପାଇଁ ଶିକ୍ଷା ଓ ନିଯୁକ୍ତିରେ ଉନ୍ନତି ଘଟିଛି। ଉଚ୍ଚ ଶିକ୍ଷାରେ ୩୪ ପ୍ରତିଶତ ଅନୁସଚିତ ଜାତି ଓ ଜନଜାତୀଙ୍କୁ ଭତ୍ତି କରାଯାଇଛି।