ଜାଗର ବ୍ରତାଧାରୀଙ୍କ ବହୁ ପ୍ରତୀକ୍ଷାର ଅନ୍ତ ଘଟିଛି । ଏକାମ୍ର କ୍ଷେତ୍ରର ଆରାଧ୍ୟ ଦେବତା ପ୍ରଭୁ ଶ୍ରୀଲିଙ୍ଗରାଜଙ୍କ ମନ୍ଦିରରେ ଉଠିଲା ମହାଦୀପ । ଏଥର ସଅଳ ମହାଦୀପ ଉଠିଥିବା ବେଳେ ହୁଳହୁଳି, ହରିବୋଲରେ କମ୍ପିଲା ମନ୍ଦିର ପରିସର । ମହାଦୀପ ଉଠିବା ପାଇଁ ପୂର୍ବରୁ ରାତି ୧୦ଟା ରଖାଯାଇଥିଲା । କିନ୍ତୁ ସମସ୍ତ ନୀତିକାନ୍ତି ଶୀଘ୍ର ସରିଯିବାରୁ ରାତି ୮ଟା ୩୮ ମିନିଟରେ ମହାଦୀପ ଉଠିଛି । ନିର୍ଦ୍ଧାରିତ ସମୟ ପୂର୍ବରୁ ମହାଦୀପ ଉଠିଥିବାରୁ ଶ୍ରଦ୍ଧାଳୁଙ୍କ ମଧ୍ୟରେ ଉତ୍ସାହଭାବ ଦେଖିବାକୁ ମିଳିଛି ।

ସେବାୟତମାନେ ଶ୍ରୀଲିଙ୍ଗରାଜ ମନ୍ଦିରର ଚୂଡ଼ାକୁ ମହାଦୀପ ଉଠାଇଛନ୍ତି । ଏହି ଦିବ୍ୟ ଦୃଶ୍ୟକୁ ଦେଖିବାକୁ ବହୁ ସମୟରୁ ଭାବ ଓ ଆବେଗର ସହ ଅପେକ୍ଷା କରିଥିବା ଶ୍ରଦ୍ଧାଳୁମାନେ କୃତ୍ୟ କୃତ୍ୟ ହୋଇଛନ୍ତି । ମନ୍ତ୍ରଧ୍ଵନିରେ ପ୍ରକମ୍ପିତ ହୋଇଉଠିଛି ପୁରା ମନ୍ଦିର ପରିସର । ମହାଦୀପ ଉଠିବା ପରେ ବ୍ରତଧାରୀମାନେ ବ୍ରତ ଭାଙ୍ଗିଛନ୍ତି ।

ଏହା ବି ପଢନ୍ତୁ: ଆସୁଛି ଚଳିତ ବର୍ଷର ପ୍ରଥମ ସୂର୍ଯ୍ୟପରାଗ; ଭାରତରେ ଦିଶିବ ନା ନାହିଁ ?

ଆଜି ଜାଗର ପାଇଁ ଏକାମ୍ର କ୍ଷେତ୍ର ଦିନସାରା ଚଳଚଞ୍ଚଳ ଥିଲା । ରାଜ୍ୟର ଏହି ପ୍ରମୁଖ ଶୈବ ପୀଠରେ ଭକ୍ତଙ୍କ ସମାଗମ ହୋଇଥିଲେ । ବହୁ ସଂଖ୍ୟାରେ ଭକ୍ତମାନେ ବଡ଼ି ଭୋରରୁ ପହଞ୍ଚି ମନ୍ଦିରରେ ପ୍ରଭୁ ଲିଙ୍ଗରାଜଙ୍କୁ ଦର୍ଶନ କରିଥିଲେ । ଏପରିକି ଶନିବାର ରାତିରୁ ଭକ୍ତମାନେ ଲିଙ୍ଗରାଜ ଦର୍ଶନ ପାଇଁ ଧାଡ଼ି ବାନ୍ଧି ଅପେକ୍ଷା କରିଥିଲେ ।

ଆଜି ଦିନତମାମ ମହାଦେବଙ୍କ ଦର୍ଶନ ଲାଗି ରହିଥିଲା ଏବଂ ସନ୍ଧ୍ୟାରୁ ଭଜନ ସମାରୋହ ଅନୁଷ୍ଠିତ ହୋଇଥିଲା । ସନ୍ଧ୍ୟା ହେବା ପରେ ମନ୍ଦିରରେ ଭକ୍ତଙ୍କ ଭିଡ଼ ଜମିଥିଲା । ବ୍ରତଧାରୀମାନେ ଦୀପକୁ ପ୍ରଜ୍ଜ୍ଵଳିତ କରି ମହାଦେବଙ୍କୁ ଆରାଧନା କରିଥିଲେ । ସେପଟେ ଭକ୍ତଙ୍କ ଶୃଙ୍ଖଳିତ ଦର୍ଶନ ଲାଗି ମନ୍ଦିର ପ୍ରଶାସନରୁ ଆରମ୍ଭ କରି ବିଏମ୍‌ସି ଓ କମିସନରେଟ୍‌ ପୁଲିସ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା ।

ସେପଟେ କଟକରୁ କୋରାପୁଟ, ବଲାଙ୍ଗିରରୁ ବାଲେଶ୍ବର ସବୁ ଶୈବପୀଠରେ ଭକ୍ତଙ୍କ ଭିଡ଼ ଜମିଛି । ମନ୍ତ୍ର ଉଚ୍ଚାରଣ ସାଙ୍ଗକୁ ଭଜନ କୀର୍ତ୍ତନରେ ଗଗନ ପବନ କମ୍ପି ଉଠିଛି । ପୁରଠୁ ପଲ୍ଲୀ ସବୁଠି ମହାଦେବଙ୍କ ଆରାଧନାରେ ତଲୀନ ଭକ୍ତ । ଦୀପ ଜାଳି ମହାଦେବଙ୍କ ଆଶିଷ ଭିକ୍ଷା କରୁଛନ୍ତି ଭକ୍ତ ମଣ୍ଡଳୀ ।

ଅଧିକ ଖବର ପଢନ୍ତୁ...