ନୂଆପଡ଼ା ଉପ -ନିର୍ବାଚନ ଭୋଟିଂରେ ସୃଷ୍ଟି କରିଛି ନୂଆ ରେକର୍ଡ । ୮୩.୪୫ ପ୍ରତିଶତ ମତଦାନ ସହ ଏହି ସର୍ବକାଳୀନ ରେକର୍ଡ ତିଆରି ହୋଇଛି । ପୁରୁଷଙ୍କ ତୁଳନାରେ ଅଧିକ ସଂଖ୍ୟକ ମହିଳା ଭୋଟ ଦେଇଛନ୍ତି । ବଡ଼ ପ୍ରଶ୍ନ ହେଲା କାହା ସପକ୍ଷରେ ଯିବ ମହିଳା ଭୋଟ । ଉଭୟ ବିଜେପି ଓ ବିଜେଡିର ଦାବି ମହିଳା ଭୋଟ ଆମ ସପକ୍ଷରେ ଯିବ । ଅନ୍ୟପଟେ ଭୋଟ ସରିବା ପରେ ବି ଥମିନି ଇଭିଏମ ଟ୍ୟାମ୍ପରିଂ ରାଜନୀତି । ମୁହାଁମୁହିଁ ହୋଇଛନ୍ତି ବିଜେଡି-ବିଜେପି ।

ନୂଆପଡ଼ା ଉପ -ନିର୍ବାଚନ ସୃଷ୍ଟି କରିଛି ନୂଆ ରେକର୍ଡ । ମତ ସାବ୍ୟସ୍ତ କରିବାରେ ସବୁ ରେକର୍ଡ ଭାଙ୍ଗିଛନ୍ତି ନୂଆପଡ଼ାବାସୀ । ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ ନୂଆପଡ଼ାରେ ୨ ଲକ୍ଷ ୫୪ ହଜାର ୪୯୭ ଜଣ ଭୋଟର ଥିବା ବେଳେ ମତ ସାବ୍ୟସ୍ତ କରିଛନ୍ତି ୨ ଲକ୍ଷ ୧୨ ହଜାର ୩୮୫ ଜଣ । ଅର୍ଥାତ ମତଦାନ କ୍ଷେତ୍ରରେ ୮୩.୪୫ ଭୋଟିଂ ସହ ନୂଆପଡ଼ା ସୃଷ୍ଟି କରିଛି ନୂଆ ଇତିହାସ । ସେହିପରି ମତ ସାବ୍ୟସ୍ତ କରିବାରେ ପୁରୁଷଙ୍କଠୁ ବହୁ ଆଗରେ ରହିଛନ୍ତି ମହିଳା । ତଥ୍ୟ ଅନୁଯାୟୀ ନୂଆପଡ଼ାରେ ୧ ଲକ୍ଷ ୩ ହଜାର ୮୧୭ ଜଣ ପୁରୁଷ ନିଜର ମତ ସାବ୍ୟସ୍ତ କରିଥିବା ବେଳେ ସେହି ତୁଳନାରେ ମହିଳା ସଂଖ୍ୟା ହେଉଛି ୧ ଲକ୍ଷ ୮ ହଜାର ୫୬୩ । ଅର୍ଥାତ ପୁରୁଷଙ୍କ ସଂଖ୍ୟା ତୁଳନାରେ ଅଧିକ ୪ ହଜାର ୭୪୬ ଜଣ ମହିଳା ଭୋଟ ଦେଇଛନ୍ତି ।

ଅଧିକ ପଢ଼ନ୍ତୁ: EVMରେ ସିଲ୍ ହେଲା ୧୪ ପ୍ରାର୍ଥୀଙ୍କ ଭାଗ୍ୟ, ଷ୍ଟ୍ରଙ୍ଗରୁମ୍‌ ଜଗିଛନ୍ତି ସଶସ୍ତ୍ର ବାହିନୀ

ବିପୁଳ ସଂଖ୍ୟାରେ ମତଦାନ କରି ଗଣତନ୍ତ୍ରର ପର୍ବକୁ ସଫଳ କରିଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟ ନିର୍ବାଚନ ଅଧିକାରୀ ଓ ନୂଆପଡ଼ା ଜିଲାପାଳ ।
ସେପଟେ ଭୋଟ ସରିବା ପରେ ବି ଥମିନି ଇଭିଏମ ଟ୍ୟାମ୍ପରିଂ ରାଜନୀତି, ଇଭିଏମ ପ୍ରସଙ୍ଗକୁ ନେଇ ମୁହାଁମୁହିଁ ହୋଇଛନ୍ତି ବିଜେଡି-ବିଜେପି । ନିର୍ବାଚନ ଅଧିକାରୀଙ୍କ ସ୍ପଷ୍ଟୀକରଣ ପରେ ବି ବିଜେଡି ଫଳାଫଳ ପୂର୍ବରୁ ଇଭିଏମ ଟ୍ୟାମ୍ପରିଂ କଥା ପୁଣି ଥରେ ନିର୍ବାଚନ ପ୍ରକିୟାକୁ ନେଇ ପ୍ରଶ୍ନ ଉଠାଇଛି । ଅଭିଯୋଗର ଜବାବରେ ବିଜେପି କହିଛି ଏହା ହେଉଛି ପରାଜୟ ଜାଣିବା ପରେ ହତାଶା ଭାବର ପରିଚୟ ।

ବିଜେଡି ପଞ୍ଚମ ଥର ସରକାରକୁ ଆସିବାର କିଛି ମାସ ମଧ୍ୟରେ ୨୦୧୯ ଅକ୍ଟୋବର ମାସରେ ହୋଇଥିବା ବିଜେପୁର ଉପ ନିର୍ବାଚନରେ ୭୯.୧୭ ପ୍ରତିଶତ ଭୋଟିଂ ହୋଇଥିଲା । ସେହିପରି ରାଜ୍ୟ ରାଜନୀତିର ମୋଡ଼ ବଦଳାଇଥିବା ୨୦୨୨ ନଭେମ୍ବରରେ ହୋଇଥିବା ଧାମନଗର ଉପ ନିର୍ବାଚନରେ ୬୬.୬୩ ପ୍ରତିଶତ ଭୋଟିଂ ହୋଇଥିଲା । କିନ୍ତୁ ସାଧାରଣ ନିର୍ବାଚନର ଦେଢ଼ ବର୍ଷ ପରେ ଆଉ ପଞ୍ଚାୟତ ଓ ପୌର ନିର୍ବାଚନର ଦେଢ଼ ବର୍ଷ ପୂର୍ବରୁ ହୋଇଥିବା ଏହି ନୂଆପଡ଼ା ଉପ ନିର୍ବାଚନରେ ରେକର୍ଡ ସଂଖ୍ୟକ ଭୋଟିଂ ହୋଇଛି । ତେବେ ମହିଳାଙ୍କ ଅଧିକ ମତଦାନ କାହା ସପକ୍ଷରେ ଯାଉଛି ଆଉ ନୂଆପଡା ହାରଜିତର ଗଣିତ ରାଜ୍ୟ ରାଜନୀତିକୁ କେମିତି ପ୍ରଭାବିତ କରୁଛି ତାହା ଉପରେ ରାଜ୍ୟବାସୀଙ୍କ ନଜର ।