Argus News - ୨୦ ଲକ୍ଷ ଟଙ୍କା ହଡ଼ପ ପାଇଁ ସାଙ୍ଘାତିକ ଷଡ଼ଯନ୍ତ୍ର, ନିଜ ସାଙ୍ଗ ରଚିଲା ଲୁଟ୍‌ ପ୍ଲାନ୍‌

ଗତ ଗୁରୁବାର ପାାହାଳ ଥାନା ଅଞ୍ଚଳରେ ହୋଇଥିବା ୨୦ ଲକ୍ଷ ଟଙ୍କା ଲୁଟ୍‌ ଘଟଣାର ପର୍ଦ୍ଦାଫାଶ କରିଛି ପାହାଳ ଥାନା ପୋଲିସ୍‌ । ବନ୍ଧାହେଲେ ଏହି ଘଟଣାର ୨ ଅଭିଯୁକ୍ତ ବବୁଲ ବେହେରା ଏବଂ ସରୋଜ ସୁତାର । ସେମାନଙ୍କ ନିକଟରୁ ନଗଦ ୫ ଲକ୍ଷ ୭୦ ହଜାର ଟଙ୍କା ମଧ୍ୟ ଜବତ ହୋଇଛି ।

ଅଭିଯୋଗକାରୀ ପ୍ରଭାତ କୁମାରଙ୍କ ସାଙ୍ଗ ହେଉଛନ୍ତି ଅଭିଯୁକ୍ତ ସରୋଜ ସୁତାର । ୨୪ ତାରିଖ ଦିନ ପ୍ରଭାତ ଅନ୍ୟ ଏକ ସାଙ୍ଗଙ୍କ ନିକଟରୁ ୨୦ ଲକ୍ଷ ଟଙ୍କା ଧାର ସୂତ୍ରରୁ ଆଣିଥିଲେ । ସେହି ସମୟରେ ପ୍ରଭାତଙ୍କ ସହ ସରୋଜ ଉପସ୍ଥିତ ଥିଲେ । ପରେ ସେହି ୨୦ ଲକ୍ଷ ଟଙ୍କା ଲୁଟ୍‌ ପାଇଁ ସରୋଜ ଅନ୍ୟ ସାଙ୍ଗମାନଙ୍କ ସହ ଯୋଜନା କରିଥିଲେ ।

ଆଉ ପାହାଳ ଥାନା ଜଲସା ବାର୍‌ ନିକଟରେ ଚା' ପିଇବା ବାହାନାରେ ସରୋଜ ଅଭିଯୋଗକାରୀ ପ୍ରଭାତଙ୍କୁ ଅଟକାଇଥିଲେ । ପୂର୍ବ ଯୋଜନା ମୁତାବକ ସେଠାରେ ଚା' ପିଉଥିବା ସମୟରେ ୨ଟି ଗାଡ଼ିରେ ଅଭିଯୁକ୍ତ ସରୋଜଙ୍କ ସାଙ୍ଗମାନେ ଆସିଥିଲେ । ଆଉ ୨୦ ଲକ୍ଷ ଟଙ୍କା ଲୁଟ୍‌ କରିବା ସହ ଅଭିଯୋଗକାରୀଙ୍କୁ ଖଣ୍ଡାରେ ଆକ୍ରମଣ କରିଥିଲେ । ସେହି ସମୟରେ ଅଭିଯୁକ୍ତ ସରୋଜ ମିଛ ନାଟକ କରିବା ସହ ଅଭିଯୋଗକାରୀଙ୍କ ସହ ଥାନାକୁ ଅଭିଯୋଗ କରିବାକୁ ମଧ୍ୟ ଆସିଥିଲେ । ଯାହାଫଳରେ ସରୋଜ ଉପରେ ପୋଲିସ୍‌ର ସନ୍ଦେହ ହୋଇନଥିଲା ।

ଥାନାରେ ଅଭିଯୋଗ ପରେ ପୋଲିସ ଘଟଣା ସ୍ଥଳରେ ଲାଗିଥିବା ସିସିଟିଭି ଫୁଟେଜ ଓ କଲ୍‌ ସିଡିଆର ଯାଞ୍ଚ ପରେ ସତ ସାମ୍ନାକୁ ଆସିଥିଲା । ଡକାୟତି ମାମଲା ରୁଜୁ କରି ପୋଲିସ୍‌ ମୁଖ୍ୟ ଅଭିଯୁକ୍ତଙ୍କ ସମେତ ଦୁଇଜଣଙ୍କୁ ଗିରଫ କରିଛି । ସେମାନଙ୍କ ନିକଟରୁ ଘଟଣାରେ ବ୍ୟବହୃତ ଖଣ୍ଡା, KTM ବାଇକ୍‌ ଏବଂ ଲୁଟ ଟଙ୍କା ଜବତ ହୋଇଛି । ତେବେ ଏହି ଘଟଣାରେ ଫେରାର ଥିବା ଅନ୍ୟ ଅଭିଯୁକ୍ତମାନଙ୍କ ଧରିବା ପାଇଁ ପୋଲିସ୍‌ ବିଭିନ୍ନ ସ୍ଥାନରେ ରେଡ୍‌ କରୁଛି ।

ସୂଚନା ଅନୁସାରେ, ପ୍ରଭାତ କୁମାର ସାହୁଙ୍କ ଘର ବାଲେଶ୍ଵର ଜିଲ୍ଲା ସଦ ସଦର ଥାନା ଓଡଙ୍ଗୀ ଗାଁରେ । ବ୍ୟବସାୟ ପାଇଁ ତାଙ୍କର କିଛି ଟଙ୍କା ଆବଶ୍ୟକ ଥିଲା । ଏଥିପାଇଁ ସେ ତାଙ୍କ ଦୁଇ ସାଙ୍ଗ ସୁରେଶ ଓ ସରୋଜଙ୍କୁ ନେଇ ଭୁବନେଶ୍ବର ଆସିଥିଲେ । ଭୁବନେଶ୍ବରରୁ ପ୍ରଭାତ ତାଙ୍କ ସହଯୋଗୀଙ୍କଠାରୁ ୨୦ ଲକ୍ଷ ଟଙ୍କା ନେଇ ବାଲେଶ୍ବର ଫେରୁଥିଲେ । ଆଉ ଫେରିବା ବାଟରେ ସେମାନେ ପାହାଳ ଥାନାଠାରୁ କିଛି ଦୂରରେ କାର୍‌ ସାଇଡ୍‌ କରି ଚା' ପିଉଥିଲେ । ଠିକ୍ ଏହି ସମୟରେ ୨ଟି ବାଇକ୍‌ରେ ୫ ଜଣ ଅପରାଧୀ ସେମାନଙ୍କ ପାଖକୁ ଆସିଥିଲେ । ଆଉ ପ୍ରଭାତ, ସରୋଜ ଓ ସୁରୋଶ କିଛି ବୁଝିବା ଆଗରୁ ଅପରାଧୀମାନେ ଖଣ୍ଡା, ଭୁଜାଲି ଆଦି ମାରଣାସ୍ତ୍ରରେ ସେମାନଙ୍କୁ ଆକ୍ରମଣ କରିଥିଲେ । ଆଉ ତାଙ୍କଠୁ କାର ଚାବି ନେଇ ୨୦ ଲକ୍ଷ ଟଙ୍କା ଭର୍ତ୍ତି ବ୍ୟାଗ୍‌କୁ ନେଇ ଫେରାର୍‌ ହୋଇଯାଇଥିଲେ । ତେବେ ଲୁଟ୍‌ ବେଳେ ପ୍ରଭାତ ପ୍ରତିବାଦ କରିବାରୁ ଅପରାଧୀମାନେ ତାଙ୍କ ହାତକୁ ହାଣି ଦେଇଥିବା ସୂଚନା ମିଳିଥିଲା ।