Argus News - ରାଜ୍ୟସଭା ନିର୍ବାଚନ ପାଇଁ ବାଜିଲା ବିଗୁଲ, ୩ ଆସନ ଦଖଲ ନେଇ ବିଜେପିର ଦମ୍ଭୋକ୍ତି

ରାଜ୍ୟସଭା ନିର୍ବାଚନ ପାଇଁ ବିଗୁଲ ବାଜିଛି । ବିଜ୍ଞପ୍ତି ପ୍ରକାଶ ପରେ ସରଗରମ ହୋଇଛି ରାଜ୍ୟ ରାଜନୀତି । ୨୬ ରୁ ନାମାଙ୍କନ ଦାଖଲ ହେବାକୁ ଥିବା ବେଳେ ମାର୍ଚ୍ଚ ୧୬ରେ ହେବ ନିର୍ବାଚନ । ଏହି ନିର୍ବାଚନରେ ବିଜେପି ୩ଟି ଆସନ ଦଖଲ କରିବ ବୋଲି ଦମ୍ଭୋକ୍ତି ପ୍ରକାଶ କରିଛି । ବିଜେଡିର କହିବା ହେଲା, ହାତେଇବ ୨ ଆସନ ।
ସୁଜିତ କୁମାର, ମମତା ମହନ୍ତ, ନିରଞ୍ଜନ ବିଶି ଓ ମୁନ୍ନା ଖାନ । ଉଭୟ ବିଜେପି ଓ ବିଜେଡିର ଦୁଇ ଜଣ ଲେଖାଏଁ ରାଜ୍ୟସଭା ସାଂସଦଙ୍କ କାର୍ଯ୍ୟକାଳ ଶେଷ ହେଉଥିବା ହେଲେ ନିର୍ବାଚନ ଗଣିତ କିନ୍ତୁ ଅଲଗା କହୁଛି । ଦୁଇଟି ଆସନ ପାଇଁ ବିଜେପି ଓ ଗୋଟିଏ ଆସନ ପାଇଁ ବିଜେଡି ପାଖରେ ରହିଛି ସଂଖ୍ୟା । କିନ୍ତୁ ଚତୁର୍ଥ ଆସନ କାହା ପାଖକୁ ଯିବ ତାକୁ ନେଇ ରାଜ୍ୟ ରାଜନୀତିରେ ଜୋରଦାର ଚର୍ଚ୍ଚା । ବିଗୁଲ ବାଜିବା ପରେ ଆଜି ବି ଚତୁର୍ଥ ଆସନ ହାତେଇବା ନେଇ ଦମ୍ଭୋକ୍ତି ବାଢ଼ିଛି ବିଜେପି । ପ୍ରାର୍ଥୀ କିଏ ହେବ ତାକୁ ନେଇ ସଭାପତି ମନମୋହନ ସାମଲ କହିଛନ୍ତି ସଂସଦୀୟ ବୋର୍ଡ ନେବ ନିଷ୍ପତ୍ତି । ବିଜେଡି କହିଛି ଦୁଇଟି ଆସନ ହାତେଇବା ସୁନିଶ୍ଚିତ । ସଂଖ୍ୟା ନ ଥିଲେ ବି କଂଗ୍ରେସ ପ୍ରାର୍ଥୀ ଦେଇ ରାଜ୍ୟସଭା ନିର୍ବାଚନକୁ ଅଧିକ ରୋଚକ କରିବା ପାଇଁ ପ୍ରୟାସ ଆରମ୍ଭ କରିଛି ।

ବିଜେଡି ଖାତାକୁ ଯାଉଥିବା ଗୋଟିଏ ଆସନ ପାଇଁ ଦଳ ଭିତରେ କଳି ବଢିବାରେ ଲାଗିଛି । ଆସନ ଏକକୁ ଆଶାୟୀ ଏକାଧିକ । ଦେବୀ ମିଶ୍ର, ପ୍ରଣବ ପ୍ରକାଶ ଦାସ, ସଂତୃପ୍ତ ମିଶ୍ର, ସୁଜାତା କାର୍ତ୍ତିକେୟାନ ପାଣ୍ଡିଆନ ଓ ଲେନିନି ମହାନ୍ତିଙ୍କ ନାଁକୁ ନେଇ ବିଜେଡି ଅନ୍ଦର ମହଲରେ ଚାଲିଛି ଚର୍ଚ୍ଚା । ତେବେ ଏ ସବୁ ଭିତରେ ଅଶୋକ ପଣ୍ଡାଙ୍କ ପରେ ବଦ୍ରି ପାତ୍ର ବି ମାରିଛନ୍ତି ବାଣ । କହିଛନ୍ତି ଦଳ ପାଇଁ ଖଟିଥିବା ରାଜନୈତିକ ବ୍ୟକ୍ତି ପ୍ରାର୍ଥୀ ହେବା ଦରକାର ।

ରାଜ୍ୟସଭା ଗଣିତ କହୁଛି ବିଧାନସଭାର ଆସନ ସଂଖ୍ୟା (୧୪୭) ଗୁଣନ (x) ୧୦୦ ବିଭକ୍ତ (/) ରାଜ୍ୟ ସଭା ପାଇଁ ଖାଲିଥିବା ଆସନ ସଂଖ୍ୟା (୪) ଯୁକ୍ତ(+) ୧ .....ଯାହା ଫଳ ବାହାରିବ ତାହା ସହ ଯୁକ୍ତ (+) ୧ । ଅର୍ଥାତ୍ (୧୪୭ ×୧୦୦/୪+୧) +୧ ହିସାବରେ ଯାହା ବାହାରିବ ସେତିକି ଭୋଟ୍ ଜଣେ ପ୍ରାର୍ଥୀକୁ ଆବଶ୍ୟକ ପଡିବ । ଏହାକୁ ହିସାବ କଲେ ଫଳ ୨୯୪୧ ବାହାରୁଛି । ତେଣୁ ଜଣେ ପ୍ରାର୍ଥୀଙ୍କୁ ଜିତିବା ଲାଗି ୩୦ ଖଣ୍ଡ ଭୋଟର ଆବଶ୍ୟକତା ପଡ଼ିବ । ବିଧାନସଭାରେ ବର୍ତ୍ତମାନ ବିଜେପିର ସଦସ୍ୟ ସଂଖ୍ୟା ୭୯ ଥିବା ବେଳେ ବିଜେଡିର ୪୮, କଂଗ୍ରେସ ୧୪, ସିପିଆଇଏମ ୧, ସ୍ୱାଧୀନ ୩ ଓ ବିଜେଡିର ନିଲମ୍ବିତ ୨ ବିଧାୟକ । ତେଣୁ ୪ର୍ଥ ଆସନ ଲାଗି କୌଣସି ଦଳର ସଂଖ୍ୟା ହେବ ନାହିଁ । ଏହି ଆସନ ସକାଶେ ବିଜେପି ସପକ୍ଷରେ ୧୯ ଏବଂ ବିଜେଡି ସପକ୍ଷରେ ୧୮ ଖଣ୍ଡ ଭୋଟ ରହିବ । ଏଭଳି ସ୍ଥିତିରେ କିଏ ହାତେଇବ ଚତୁର୍ଥ ଆସନ ତାକୁ ନେଇ ବେଶ ରୋଚକ ହୋଇପାରେ ରାଜ୍ୟସଭା ନିର୍ବାଚନ ।