Shreemayee Mishra / ପୁଣି ବିଜେଡି ନେତୃତ୍ବକୁ ଟାର୍ଗେଟ କଲେ ଶ୍ରୀମୟୀ, ପରୋକ୍ଷରେ ପୁଣି ଉଠାଇଲେ ମହିଳା ଅସମ୍ମାନ କଥା

ନାରୀଙ୍କୁ ସମ୍ମାନ ପ୍ରସଙ୍ଗରେ ପୁଣି ପରୋକ୍ଷରେ ବିଜେଡିକୁ ଆକ୍ରମଣ । ସୋସିଆଲ୍ ମିଡିଆରେ ପୁଣି ବିଜେଡି ନେତୃତ୍ବକୁ ଟାର୍ଗେଟ୍ କଲେ ବିଜେଡି ନେତ୍ରୀ ଶ୍ରୀମୟୀ ମିଶ୍ର । ପରୋକ୍ଷରେ ଶ୍ରୀମୟୀ ପୁଣି ଉଠାଇଲେ ବିଜେଡିର ମହିଳା ଅସମ୍ମାନ କଥା । ପରୋକ୍ଷରେ ଲେଖିଛନ୍ତି ମହିଳାଙ୍କୁ ଅସମ୍ମାନ ଯୋଗୁଁ ବିଫଳ ହେଲା ବିଜେଡି ।

ଅନ୍ୟପଟେ ନାରୀର ସମ୍ମାନ ପାଇଁ ସମାଜ ଆଗେଇ ଆସିବାକୁ କହିଛନ୍ତି ଶ୍ରୀମୟୀ । ଶ୍ରୀମୟୀ ଲେଖିଛନ୍ତି ଯେଉଁଠି ନାରୀଙ୍କୁ ସମ୍ମାନ ଦିଆଯାଏ ନାହିଁ, ସେଠାରେ ସବୁ କାର୍ଯ୍ୟ ନିଷ୍ଫଳ ହୁଏ । ଶ୍ରୀମୟୀ ମା' ଦୁର୍ଗାଙ୍କ ପୂଜା ଅବସରରେ ଶ୍ଲୋକ ଲେଖି ମହିଳା ସମ୍ମାନ ପ୍ରସଙ୍ଗ ଉଠାଇଛନ୍ତି । ଯାହାର ଅର୍ଥ ହେଲା ଯେଉଁ ସ୍ଥାନରେ ନାରୀ ସମ୍ମାନିତ ହୁଅନ୍ତି, ସେଠାରେ ଦେବତାମାନେ ଆନନ୍ଦରେ ବାସ କରନ୍ତି । କିନ୍ତୁ ଯେଉଁଠି ନାରୀଙ୍କୁ ସମ୍ମାନ ଦିଆଯାଏ ନାହିଁ, ସେଠାରେ ସବୁ କାର୍ଯ୍ୟ ନିଷ୍ଫଳ ହୁଏ ।

ଶ୍ରୀମୟୀ ଲେଖିଛନ୍ତି ଓଡ଼ିଶାର ସାଂସ୍କୃତିକ ପରମ୍ପରାରେ ବି ନାରୀଙ୍କୁ ମା’, ଦେବୀ ଓ ଶକ୍ତି ରୂପେ ପୂଜା କରାଯାଏ, ଯେପରି ଦୁର୍ଗା ପୂଜାରେ ମା’ ଦୁର୍ଗାଙ୍କୁ ଆରାଧନା କରାଯାଇଥାଏ । ଯଦା ଯଦା ନାରୀ ଉପରେ ଅତ୍ୟାଚାର ହେଲା, ଶକ୍ତି ରୂପେ ଦେବୀ ଆସି ଅନ୍ୟାୟ ଦୂର କଲା । ବାସ୍ତବରେ ମହିଳା ସହନଶୀଳା । କିନ୍ତୁ କ’ଣ ପ୍ରତ୍ୟେକ ପରିସ୍ଥିତିରେ ସେମାନଙ୍କ ସହନଶୀଳତାର ପରୀକ୍ଷା ନିଆଯିବ କି ବୋଲି ପ୍ରଶ୍ନ କରିଛନ୍ତି ଶ୍ରୀମୟୀ ।

ସେ ଆହୁରି ଲେଖିଛନ୍ତି, ମା’ ଦୁର୍ଗାଙ୍କ ଆଗମନ ନାରୀ ଶକ୍ତିର ଜୟଗାନ ଓ ଅନ୍ୟାୟର ବିରୋଧରେ ସଂଘର୍ଷର ପ୍ରତୀକ । ଏହା ଆମକୁ ଶିକ୍ଷା ଦେଇଥାଏ ଯେ ନାରୀଙ୍କ ଉପରେ ଅତ୍ୟାଚାର କେବେ ସହ୍ୟ କରାଯିବା ଉଚିତ ନୁହେଁ, ଏବଂ ସେମାନଙ୍କ ସମ୍ମାନ ଓ ସଶକ୍ତିକରଣ ପାଇଁ ସମାଜ ସବୁବେଳେ ଆଗେଇ ଆସିବା ଦରକାର ।