ସତ କହିଲେ ମୁଣ୍ଡକାଟ । ପ୍ରଭାତ ବିଶ୍ବାଳଙ୍କୁ ବହିଷ୍କାର ପରେ ଶ୍ରୀମୟୀ ମିଶ୍ରଙ୍କ ନିଶାନା । ଯିଏ ସତ କହିବ, ଛାମୁ ମୁଣ୍ଡକାଟ କରିବେ ବୋଲି ସୋସିଆଲ୍ ମିଡିଆରେ ଲେଖିଛନ୍ତି ଶ୍ରୀମୟୀ ମିଶ୍ର । ସେ ଆହୁରି ଲେଖିଛନ୍ତି , ଏମିତି ସରପ୍ରାଇଜ୍ ଦେଇ ଦେଇ ୨୦୨୪ରେ ନିଜେ ସରପ୍ରାଇଜ୍ ହୋଇଗଲେ । ତେଲିଆଙ୍କୁ ମୁଣ୍ଡେଇ ଥାଅ, ଇତିହାସ ରଚିବା ନିଶାରେ। ଅଳ୍ପ ଦିନରେ ନିଜେ ଇତିହାସ ହୋଇଯିବେ ବୋଲି ଶ୍ରୀମୟୀ ମିଶ୍ର ବିଜେଡିକୁ କଟାକ୍ଷ କରି ସୋସିଆଲ ମିଡିଆରେ ଲେଖିଛନ୍ତି ।

ସୂଚନା ଅନୁସାରେ, ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସହ ଉଚ୍ଚବାଚ ବରିଷ୍ଠ ବିଜେଡି ନେତା ପ୍ରଭାତ ବିଶ୍ବାଳଙ୍କୁ ମହଙ୍ଗା ପଡ଼ିଛି । ବିଜେଡିରୁ ବହିଷ୍କୃତ ହେଲେ ବରିଷ୍ଠ ନେତା ପ୍ରଭାତ ବିଶ୍ବାଳ । ବିଶୃଙ୍ଖଳା ଓ ଦଳ ବିରୋଧୀ କାର୍ଯ୍ୟ ପାଇଁ ବିଜେଡିରୁ ବିଦା ହୋଇଛନ୍ତି । ରାଜ୍ୟସଭା ପ୍ରାର୍ଥୀ ଘୋଷଣାକୁ ବିରୋଧ କରିଥିଲେ ପ୍ରଭାତ । ନବୀନଙ୍କୁ ଚ୍ୟାଲେଞ୍ଜ ଦେଇଥିଲେ ପ୍ରଭାତ ବିଶ୍ବାଳ । ଆଉ ପ୍ରଭାତଙ୍କୁ ଏବେ ଏହି ଚ୍ୟାଲେଞ୍ଜ ମହଙ୍ଗା ପଡ଼ିଛି । ବିଜେଡିରୁ ବିଦା ହୋଇଛନ୍ତି ପ୍ରଭାତ ବିଶ୍ବାଳ । କଟକ ଚୌଦ୍ବାରରୁ ୨ ଥର ବିଧାୟକ ପ୍ରଭାତ ବିଶ୍ବାଳ ।

ରାଜ୍ୟସଭା ପାର୍ଥୀ ଘୋଷଣା ନେଇ ନବୀନ ନିବାସ ଭିତରେ ହୋଇଛି ହାଇଡ୍ରାମା । ସଂତୃପ୍ତ ମିଶ୍ରଙ୍କ ପାର୍ଥୀତ୍ୱକୁ ବିରୋଧ କରି ନବୀନଙ୍କ ସହ ମୁଁହାମୁଁହି ହେଲେ ବିଜେଡି ବରିଷ୍ଠ ନେତା ପ୍ରଭାତ ବିଶ୍ୱାଳ । ରାଜ୍ୟସଭା ପାର୍ଥୀ ଲାଗି ସୁଜାତାଙ୍କ ସପକ୍ଷରେ ବାଢିଲେ ଯୁକ୍ତି । ଯୁକ୍ତି ତର୍କ ଭିତରେ ପ୍ରଭାତଙ୍କ ଉପରେ ନିଆଁବାଣ ହେଲେ ନବୀନ । ଖାଲି ସେତିକି ନୁହେଁ ପୁଅ ତଥା ବିଜେଡି ବିଧାୟକ ସୌଭିକ ବିଶ୍ୱାଳଙ୍କ ଉପସ୍ଥିତରେ ପ୍ରଭାତଙ୍କୁ କିଛି ନେତା ଦୁର୍ବ୍ୟବହାର କଲେ । ଯାହାକୁ ନେଇ ନବୀନ ଓ କୁଚକ୍ରୀ ଗୋଷ୍ଠୀଙ୍କ ଉପରେ ବର୍ଷିଛନ୍ତି ପ୍ରଭାତ । ଚିଠି ଲେଖି ବିଜେଡିରୁ ଓହରି ଯିବାକୁ ଚେତାବନୀ ଦେଇଛନ୍ତି । ପାଲଟା ଜବାବ ରଖିଛନ୍ତି ସଂତୃପ୍ତ ।