BCCI decision / ଟି-୨୦ ବିଶ୍ଵକପ୍ ୨୦୨୬; ଖେଳାଳିଙ୍କୁ ପରିବାରଠୁ ଦୂରେଇଲା BCCI

ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (ବିସିସିଆଇ) ଟି-୨୦ ବିଶ୍ଵକପ୍ ପାଇଁ କଡ଼ା ଆଭିମୁଖ୍ୟ ଗ୍ରହଣ କରିଛି । ବୋର୍ଡ ନିଜର ପୂର୍ବ ନିୟମକୁ ବଜାୟ ରଖି ଟୁର୍ଣ୍ଣାମେଣ୍ଟ ସମୟରେ ଭାରତୀୟ କ୍ରିକେଟରଙ୍କୁ ନିଜ ପରିବାରଠାରୁ ଦୂରେଇ ରହିବାକୁ ନିର୍ଦ୍ଦେଶ ଦେଇଛି । ଫଳରେ ଖେଳାଳିମାନେ ନିଜ ପତ୍ନୀ, ବାନ୍ଧବୀ ବା ଅନ୍ୟ କୌଣସି ପରିବାର ସଦସ୍ୟଙ୍କ ସହିତ ଖେଳ ମଝିରେ ରହିପାରିବେ ନାହିଁ । ଏକ ରିପୋର୍ଟ ଅନୁସାରେ ଭାରତୀୟ ଟିମ ମ୍ୟାନେଜମେଣ୍ଟ ଖେଳାଳିଙ୍କ ପରିବାରକୁ ସାମିଲ କରିବା ଲାଗି ଅନୁମତି ମାଗିଥିଲା । ହେଲେ ବୋର୍ଡ ସିଧାସିଧା ଏଥିଲାଗି ମନା କରିଦେଇଛି ।

• ପତ୍ନୀଙ୍କ ସହ ରହିପାରିବେନି କ୍ରିକେଟର

ଏକ ଜାତୀୟ ଗଣମାଧ୍ୟମର ରିପୋର୍ଟ ଅନସୁାରେ, ବିସିସିଆଇ ପ୍ରାୟ ୨ ମାସ ପର୍ଯ୍ୟନ୍ତ ଚାଲିବାକୁ ଥିବା ଏହି ଟୁର୍ଣ୍ଣାମେଣ୍ଟରେ ଭାରତୀୟ କ୍ରିକେଟରଙ୍କ ପରିବାରକୁ କେବଳ ୧୪ ଦିନ ପର୍ଯ୍ୟନ୍ତ ସାଥୀରେ ରହିବାକୁ ଅନୁମତି ଦେଇଛି । ବିସିସିଆଇ ଏହା ମଧ୍ୟ କହିଛି ଯେ ପରିବାର ସଦସ୍ୟ ଖେଳାଳିଙ୍କ ସହିତ ରହିବେ ନାହିଁ । ଯଦି ସେମାନେ ଆସିବାକୁ ଚାହାଁନ୍ତି ତେବେ ଅଲଗା ବ୍ୟବସ୍ଥା କରିପାରିବେ ।

• ନିଜ ନିୟମରେ ଅଟଳ ବିସିସିଆଇ

୨୦୨୬ ଟି-୨୦ ବିଶ୍ୱକପରେ, ଟିମ୍ ଇଣ୍ଡିଆ ଘରୋଇ ମାଟିରେ ୩ଟି ଗ୍ରୁପ୍ ଷ୍ଟେଜ୍ ମ୍ୟାଚ୍ ଖେଳିବାକୁ ଥିବାବେଳେ ଗୋଟିଏ ମ୍ୟାଚ୍ କଲମ୍ବୋରେ ଖେଳାଯିବ । ପୂର୍ବ ଦ୍ୱିପାକ୍ଷିକ ସିରିଜରେ, ଖେଳାଳିଙ୍କ ପରିବାରକୁ ଦଳ ସହିତ ରହିବାକୁ ଅନୁମତି ଦିଆଯାଇନଥିଲା । ତେବେ ବିସିସିଆଇ ୨୦୨୬ ଟି-୨୦ ବିଶ୍ୱକପ୍ ପାଇଁ ସମାନ ନୀତିକୁ ବଜାୟ ରଖିଛି ।

• ପୂର୍ବରୁ ବି ନିଆଯାଇଛି ନିଷ୍ପତ୍ତି

୨୦୨୫ ମସିହାରେ ଅଷ୍ଟ୍ରେଲିଆ ଗସ୍ତ ପରେ ବିସିସିଆଇ ଏହି ପ୍ରସଙ୍ଗ ଉପରେ ନୂଆ ଗାଇଡଲାଇନ ଆଣିଥିଲା । କୋଭିଡ ମହାମାରୀ ପରେ ଖେଳାଳିମାନଙ୍କୁ ପୁରା ଗସ୍ତ ସମୟରେ ସେମାନଙ୍କ ପରିବାର ସହିତ ରହିବାକୁ ଅନୁମତି ଦିଆଯାଇଥିଲା । କିନ୍ତୁ କିଛି ଖେଳାଳି ଏହାର ଅପବ୍ୟବହାର କରିବା ଆରମ୍ଭ କରିଥିଲେ । ଦଳର ସଦସ୍ୟମାନେ ବ୍ୟକ୍ତିଗତ ଭାବରେ BCCI ନିକଟରେ ଅଭିଯୋଗ କରିଥିଲେ ଯେ କ୍ରିକେଟରଙ୍କ ପତ୍ନୀ କିମ୍ବା ବାନ୍ଧବୀଙ୍କ ଉପସ୍ଥିତି ଯୋଗୁଁ କିଛି ଖେଳାଳି ଅନୌପଚାରିକ ଦଳ ବୈଠକରେ ଯୋଗ ଦେଉନଥିଲେ । ସେମାନେ କେବଳ ଅଫିସିଆଲ୍ ବୈଠକକୁ ଆସୁଥିଲେ । ଫଳସ୍ୱରୂପ, ବୋର୍ଡ ତାର ପୂର୍ବ ନୀତିକୁ ଫେରିବାକୁ ନିଷ୍ପତ୍ତି ନେଇଥିଲା ।