ଏସିଆ କପ୍ ୨୦୨୫ରେ ଭାରତ ପାକିସ୍ତାନକୁ ହରାଇ ନବମ ଥର ପାଇଁ ଟ୍ରଫି ନିଜ ନାମରେ କରିଛି । ଚଳିତ ଏସିଆ କପରେ ଭାରତ କେବଳ ଟ୍ରଫି ଜିତିନଥିଲା ପୂରା ଟୁର୍ଣ୍ଣାମେଣ୍ଟରେ ଅପରାଜେୟ ରହିଥିଲା । ତେବେ ଏସିଆ କପରେ ଭାରତର ଏକାଧିକ ଖେଳାଳିଙ୍କ ଦମଦାର ପ୍ରଦର୍ଶନ କରିଥିଲେ । କିନ୍ତୁ ସବୁଠୁ ଅଧିକ ଚର୍ଚ୍ଚାରେ ଥିଲେ ଅଭିଷେକ ଶର୍ମା । ତାଙ୍କ ଧୁଆଁଧାର ବ୍ୟାଟିଂ ପାଇଁ ସେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଥିଲେ । ସେ ଟୁର୍ଣ୍ଣାମେଣ୍ଟର ଶ୍ରେଷ୍ଠ ଖେଳାଳି ପୁରସ୍କାର ମଧ୍ୟ ଜିତିଥିଲେ । ପୁରସ୍କାର ସ୍ବରୂପ ତାଙ୍କୁ ଏକ HAVAL H9 SUV ଉପହାର ଦିଆଯାଇଥିଲା । ସବୁଠୁ ରୋଚକ କଥା ହେଉଛି, କଡ଼ା ଆଇନ କାରଣରୁ ଏହି ଏସୟୁଭି କାରକୁ ଭାରତ ଆଣିପାରିବେ ନାହିଁ ଅଭିଷେକ ଶର୍ମା ।

HAVAL H9 SUV ହେଉଛି ଏକ ଲେଫ୍ଟ ହ୍ୟାଣ୍ଡ ଡ୍ରାଇଭ୍ ଭର୍ଜନ । କିନ୍ତୁ ଭାରତରେ କେବଳ ରାଇଟ୍ - ହ୍ୟାଣ୍ଡ ଡ୍ରାଇଭ୍ ଭର୍ଜନ କାରଗୁଡ଼ିକୁ ଅନୁମତି ଦିଆଯାଇଛି । ଭାରତର ସଡ଼କ ସୁରକ୍ଷା ଏବଂ ଯାନବାହନ ପଞ୍ଜୀକରଣ ଆଇନ ଅନୁଯାୟୀ, ଲେଫ୍ଟ-ହ୍ୟାଣ୍ଡ ଡ୍ରାଇଭ୍ କାରଗୁଡ଼ିକୁ ଭାରତରେ ପଞ୍ଜିକରଣ କିମ୍ବା ଚଲାଇହେବ ନାହିଁ । ଯାହାଫଳରେ ଅଭିଷେକ ଶର୍ମା ଏହି ନୂଆ SUVକୁ ଭାରତ ଆଣିପାରିବେ ନାହିଁ ।

ରିପୋର୍ଟ ଅନୁସାରେ, HAVAL ନଭେମ୍ବର ୨୦୨୫ ସୁଦ୍ଧା ଭାରତରେ ଏହି SUVର ରାଇଟ୍-ହ୍ୟାଣ୍ଡ ଡ୍ରାଇଭ୍ ସଂସ୍କରଣରେ ଲଞ୍ଚ କରିପାରେ । ଯଦି ଏହା ହୁଏ, ତେବେ ଅଭିଷେକ ଶର୍ମାଙ୍କୁ ଭାରତରେ ଚାଲୁଥିବା ମଡେଲ୍ SUV କାର ଉପହାର ସ୍ବରୂପ ମିଳିପାରେ । କିନ୍ତୁ କମ୍ପାନୀ ପକ୍ଷରୁ ଏନେଇ କୌଣସି ବିବୃତ୍ତି ଜାରି କରାଯାଇନାହିଁ ।

HAVAL H9 ଫିଚର୍‌

HAVAL H9 ଏହାର ବିଳାସପୂର୍ଣ୍ଣ ଲୁକ୍ ଏବଂ ଆଡଭାନ୍ସ ଫିଚର୍ ପାଇଁ ବେଶ୍ ଜଣାଶୁଣା । ଏହି ଯାନରେ ସୁରକ୍ଷା ଏବଂ ଆରାମକୁ ସତର୍କତାର ସହ ବିଚାର କରାଯାଇଛି । ୭ ସିଟର ଲେଆଉଟ୍ ସହିତ ଏହି ଏସୟ୍ୟୁଭିରେ ଲେଦର୍ ସିଟ୍ ଏବଂ ଇଲେକ୍ଟ୍ରିକ୍ ଆଡଜଷ୍ଟେବଲ୍ ସିଟ୍, Apple CarPlay, ଏକ ଟଚସ୍କ୍ରିନ୍ ଇନଫୋଟେନମେଣ୍ଟ ସିଷ୍ଟମ୍ ଏବଂ ଏକ ପାନୋରାମିକ୍ ସନରୁଫ୍ ରହିଛି । ଏହା ସହ 360-ଡିଗ୍ରୀ କ୍ୟାମେରା, ଛଅଟି ଏୟାରବ୍ୟାଗ୍, ପାର୍କିଂ ଆସିଷ୍ଟ୍ ଏବଂ ABS-EBD ଭଳି ଫିଚର୍ ରହିଛି ।

ଯାନର ମୂଲ୍ୟ କେତେ?

HAVAL H9 ଭାରତୀୟ ବଜାରରେ ବିକ୍ରି ହୁଏ ନାହିଁ । ତଥାପି, ଆନ୍ତର୍ଜାତୀୟ ବଜାରରେ ଏହାର ମୂଲ୍ୟ ୧୪୨,୨୦୦ ସାଉଦି ରିୟାଲ୍ (SAR)। ଭାରତୀୟ ମୂଲ୍ୟରେ ଯଦି କହିବା ତେବେ କାରର ଦାମ୍ ପ୍ରାୟ ୩୩.୬୦ ଲକ୍ଷ ଅଟେ । ରିପୋର୍ଟ ଅନୁସାରେ, ଭାରତରେ ଏହାର ଆନୁମାନିକ ଏକ୍ସ ସୋ-ରୁମ୍ ମୂଲ୍ୟ ୨୫ରୁ ୩୦ ଲକ୍ଷ ହୋଇପାରେ । ଏହି SUV ଟୟୋଟା ଫର୍ଚୁନର ଭଳି ଯାନ ସହିତ ପ୍ରତିଯୋଗିତା କରେ ।