ଫେବ୍ରୁଆରୀ ୭ରେ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । ଏହି ଟୁର୍ଣ୍ଣାମେଣ୍ଟ ଭାରତ ତା'ର ପ୍ରଥମ ମ୍ୟାଚ୍‌ ୭ ତାରିଖରେ ଆମେରିକା ବିପକ୍ଷରେ ଖେଳିବ । ଏହା ପରେ କାନାଡା ଓ ତୃତୀୟ ମ୍ୟାଚ୍‌ ଫେବ୍ରୁଆରୀ ୧୫ରେ ପାକିସ୍ତାନ ବିପକ୍ଷରେ । କିନ୍ତୁ ପାକିସ୍ତାନ ଫେବ୍ରୁଆରୀ ୧୫ରେ ହେବାକୁ ଥିବା ମ୍ୟାଚ୍‌ ଖେଳିବାକୁ ମନା କରିଛି । ତେବେ ପାକିସ୍ତାନ କ୍ରିକେଟ୍ ଦଳର ଅଧିନାୟକ ସଲମାନ ଅଲି ଆଗା ସ୍ପଷ୍ଟ କରିଛନ୍ତି ଯେ ଯଦି ସେମାନେ ଟି-୨୦ ବିଶ୍ୱକପର ନକଆଉଟ୍ ପର୍ଯ୍ୟାୟରେ ଭାରତ ସହିତ ମୁକାବିଲା କରନ୍ତି । ତେବେ ଦଳ ସରକାରଙ୍କ ପରାମର୍ଶ ଅନୁଯାୟୀ ଆଗକୁ ବଢ଼ିବ।
ଭାରତ-ପାକିସ୍ତାନ ମ୍ୟାଚ୍‌କୁ ନେଇ ରାଜନୈତିକ ଉତ୍ତେଜନା ପୂର୍ବରୁ ରହିଛି । ବାଂଲାଦେଶକୁ ଟୁର୍ଣ୍ଣାମେଣ୍ଟରୁ ବାଦ୍‌ ଦିଆଯିବା ଏବଂ ଭାରତ ବିପକ୍ଷରେ ଗ୍ରୁପ୍ ମ୍ୟାଚ୍ ବର୍ଜନ କରିବା ପରେ ଏହି ପ୍ରସଙ୍ଗ ଆହୁରି ସମ୍ବେଦନଶୀଳ ହୋଇଯାଇଛି ।

ଗୁରୁବାର ଅଧିନାୟକଙ୍କ ସାମ୍ବାଦିକ ସମ୍ମିଳନୀରେ ଆଗା କହିଛନ୍ତି, "ଭାରତ ବିପକ୍ଷରେ ଖେଳିବା ଆମ ହାତରେ ନାହିଁ । ଏହା ସରକାରଙ୍କ ନିଷ୍ପତ୍ତି ଥିଲା ଏବଂ ଯଦି ଆମେ ସେମିଫାଇନାଲ୍ କିମ୍ବା ଫାଇନାଲରେ ଭାରତ ସହିତ ମୁକାବିଲା କରୁ, ତେବେ ଆମେ ପୁଣି ସରକାରଙ୍କ ସହିତ ପରାମର୍ଶ କରିବୁ ।"

ସେ ସ୍ପଷ୍ଟ କରିଛନ୍ତି ଯେ ଦଳର ଧ୍ୟାନ କେବଳ କ୍ରିକେଟ୍ ଉପରେ ଏବଂ ଆମେ ବାହ୍ୟ କାରଣଗୁଡ଼ିକ ପ୍ରତି ଧ୍ୟାନ ଦେଉନାହୁଁ । ପାକିସ୍ତାନ ବାଂଲାଦେଶକୁ ସମର୍ଥନ କରି ଫେବୃଆରୀ ୧୫ରେ ଭାରତ ବିପକ୍ଷରେ ଗ୍ରୁପ୍ ମ୍ୟାଚ୍ ବର୍ଜନ କରିଥିଲା । ଭାରତ ବାହାରେ ମ୍ୟାଚ୍ ଆୟୋଜନ କରିବାକୁ ବିସିବିର ଦାବି ପ୍ରତ୍ୟାଖ୍ୟାନ ହେବା ପରେ ଆଇସିସି ବାଂଲାଦେଶକୁ ଟୁର୍ଣ୍ଣାମେଣ୍ଟରୁ ବହିଷ୍କାର କରିଥିଲା ।

ଆଗା ବାଂଲାଦେଶର ବାଦ ଦେବା ଉପରେ ଦୁଃଖ ପ୍ରକାଶ କରି କହିଛନ୍ତି, "ଏହା ଦୁର୍ଭାଗ୍ୟଜନକ ଯେ ବାଂଲାଦେଶ ଏଠାରେ ନାହିଁ।" ସେମାନଙ୍କ ଦଳ ବହୁତ ଶକ୍ତିଶାଳୀ । ଆଶା କରୁଛି, ସେମାନେ ଆମକୁ ସମର୍ଥନ କରିବେ । ଆଗା ତାଙ୍କର ପ୍ରଥମ T-୨୦ ବିଶ୍ୱକପ୍ ଅଧିନାୟକତ୍ୱ କରିବା ବିଷୟରେ ଉତ୍ସାହ ପ୍ରକାଶ କରିଥିଲେ ଏବଂ କହିଥିଲେ ଯେ ଗତ ଛଅ ମାସ ମଧ୍ୟରେ ଦଳର ପ୍ରଦର୍ଶନ ନିରନ୍ତର ଉନ୍ନତ ହୋଇଛି ।

ସେ କହିଥିଲେ, "ଆମେ ଏସିଆ କପ୍ ପରଠାରୁ କୌଣସି ସିରିଜ୍ ହାରିନାହୁଁ । ଦଳ ଆତ୍ମବିଶ୍ୱାସରେ ପରିପୂର୍ଣ୍ଣ ।" ସେ ଏହା ମଧ୍ୟ କହିଛନ୍ତି ଯେ ବିଶ୍ୱକପ୍‌ରେ କୌଣସି ଦଳକୁ ହାଲୁକା ଭାବରେ ନିଆଯାଇପାରିବ ନାହିଁ ଏବଂ ବର୍ତ୍ତମାନ ନେଦରଲ୍ୟାଣ୍ଡ୍ସ ବିପକ୍ଷ ପ୍ରଥମ ମ୍ୟାଚ୍ ଉପରେ ଧ୍ୟାନ ଦିଆଯାଇଛି ।

ପାକିସ୍ତାନ ଫେବୃଆରୀ ୭ ତାରିଖରେ ନେଦରଲ୍ୟାଣ୍ଡ୍ସ ବିପକ୍ଷରେ ତା'ର ଅଭିଯାନ ଆରମ୍ଭ କରିବ। ଏହା ପରେ ଫେବୃଆରୀ ୧୦ ତାରିଖରେ ଆମେରିକା ଏବଂ ଫେବୃଆରୀ ୧୮ ତାରିଖରେ ନାମ୍ବିଆ ବିପକ୍ଷରେ ମ୍ୟାଚ୍ ଖେଳାଯିବ । ସମସ୍ତ ଗ୍ରୁପ୍ ମ୍ୟାଚ୍ କଲମ୍ବୋରେ ଖେଳାଯିବ । ଫେବୃଆରୀ ୧୫ ତାରିଖରେ ପାକିସ୍ତାନ ଭାରତ ବିପକ୍ଷରେ ଏକ ଲିଗ୍ ମ୍ୟାଚ୍ ମଧ୍ୟ ରହିଛି, ଯାହାକୁ ପାକିସ୍ତାନ ସରକାରଙ୍କ ହସ୍ତକ୍ଷେପ ପରେ ସେ ବୟକଟ କରିବାକୁ ନିଷ୍ପତ୍ତି ନେଇଛି ।