ଟି-୨୦ ବିଶ୍ୱକପ୍‌ ୨୦୨୬ର ସୁପର-୮ ଗ୍ରୁପ୍‌-୧ରୁ ଦକ୍ଷିଣ ଆଫ୍ରିକା ସେମିଫାଇନାଲ୍‌ରେ ନିଜର ସ୍ଥାନ ପକ୍କା କରିସାରିଛି । ସେପଟେ ଗତକାଲି ଭାରତ ଠାରୁ ପରାଜିତ ହୋଇ ଜିମ୍ବାୱେର ଯାତ୍ରା ଟି-୨୦ ବିଶ୍ଵକପରୁ ଶେଷ ହୋଇଛି । ଭାରତ ଏବଂ ୱେଷ୍ଟଇଣ୍ଡିଜ୍ ଏହି ଗ୍ରୁପ୍‌ରୁ ସେମିଫାଇନାଲ୍‌ ଦୌଡ଼ରେ ଅଛନ୍ତି । ଉଭୟ ଦଳ ଦୁଇଟି ମ୍ୟାଚ୍‌ରେ ୧-୧ ମ୍ୟାଚ୍‌ ଜିତିଛନ୍ତି ଏବଂ ୨-୨ ପଏଣ୍ଟ୍‌ ପାଇଛନ୍ତି ।

ଭାରତ ଏବଂ ୱେଷ୍ଟଇଣ୍ଡିଜ୍‌ ମଧ୍ୟରେ ମ୍ୟାଚ୍‌ ଆସନ୍ତା ମାର୍ଚ୍ଚ ୧ ତାରିଖ ରବିବାରରେ କୋଲକାତାର ଇଡେନ୍‌ ଗାର୍ଡେନ୍ସରେ ଖେଳାଯିବ । ଏହି ମ୍ୟାଚ୍‌ରେ ଜିତିଥିବା ଦଳ ସେମିଫାଇନାଲ୍‌ରେ ପହଞ୍ଚିବ । ସୁପର-୮ର ଶେଷ ମ୍ୟାଚ୍‌ ଉଭୟ ଦଳ ପାଇଁ ବେଶ ଗୁରୁତ୍ଵ ବହନ କରୁଛି ।

• ଭାରତ-ୱେଷ୍ଟଇଣ୍ଡିଜ୍ ମ୍ୟାଚ୍ ବାତିଲ ହେଲେ କଣ ହେବ ?

ପ୍ରାୟତଃ ବର୍ଷା କ୍ରିକେଟ୍ ମ୍ୟାଚ୍‌ରେ ବାଧା ସାଜିବାର ଆଶଙ୍କା ରହିଥାଏ । କାରଣ ପାଣିପାଗରେ ପରିବର୍ତ୍ତନ ମ୍ୟାଚ୍‌ ଫଳାଫଳରେ ଏକ ବଡ଼ ଭୂମିକା ଗ୍ରହଣ କରେ । ଯଦି ଭାରତ-ୱେଷ୍ଟଇଣ୍ଡିଜ୍ ମ୍ୟାଚ୍ ସମୟରେ ବର୍ଷା ହୁଏ, ତେବେ ଏହାକୁ ବାତିଲ କରିବା ବ୍ୟତୀତ ଅନ୍ୟ କୌଣସି ବିକଳ୍ପ ରହିବ ନାହିଁ । ଆଇସିସି ସୁପର-୮ ମ୍ୟାଚ୍ ପାଇଁ ଏକ ରିଜର୍ଭ ଡେ' ସ୍ଥିର କରିନାହିଁ । ଉଭୟ ଦଳ ପ୍ରତ୍ୟେକଙ୍କୁ ଗୋଟିଏ ପଏଣ୍ଟ ମିଳିବ । ଅର୍ଥାତ ଉଭୟ ଦଳ ପାଖରେ ୩-୩ ପଏଣ୍ଟ ରହିବ । ସବୁଠାରୁ ବଡ଼ ପ୍ରଶ୍ନ ହେଉଛି, ଯଦି ଭାରତ-ୱେଷ୍ଟଇଣ୍ଡିଜ୍ ମ୍ୟାଚ୍ ବାତିଲ ହୁଏ ତେବେ କେଉଁ ଦଳ ସେମିଫାଇନାଲକୁ ଯିବ ?

ପଢନ୍ତୁ ଏହି ଖବର: ଭାରତ ଜିତିଲା ସତ କିନ୍ତୁ ମିଳିଲାନି ଫାଇଦା: ଏବେ ବି ଟେନ୍‌ସନ୍‌ରେ ଟିମ୍‌ ଇଣ୍ଡିଆ

ମ୍ୟାଚ୍ ବାତିଲ ହେଲେ କିଏ ସେମିଫାଇନାଲକୁ ଯିବ ?

ଯଦି ଭାରତ ଏବଂ ୱେଷ୍ଟଇଣ୍ଡିଜ୍ ମଧ୍ୟରେ ସୁପର-୮ ମ୍ୟାଚ୍ ବର୍ଷା ଯୋଗୁଁ ବାତିଲ ହୁଏ, ତେବେ ୱେଷ୍ଟଇଣ୍ଡିଜ୍ ସେମିଫାଇନାଲରେ ପ୍ରବେଶ କରିବ । ଏପରି ହେଲେ ଡିଫେଣ୍ଡିଂ ଭାରତୀୟ ଦଳ ଭର୍ଚୁଆଲ୍ କ୍ୱାର୍ଟର ଫାଇନାଲରେ ହାରିବା ବିନା ଟି-୨୦ ବିଶ୍ୱକପ୍ ୨୦୨୬ରୁ ବାଦ ହୋଇଯିବ । କାରଣ ନେଟ୍ ରନ୍ ରେଟ୍ ଦୃଷ୍ଟିରୁ ୱେଷ୍ଟଇଣ୍ଡିଜ୍ ଭାରତଠାରୁ ଆଗରେ ଅଛି । ବର୍ତ୍ତମାନ ୱେଷ୍ଟଇଣ୍ଡିଜ୍ ନେଟ୍ ରନ୍ ରେଟ୍ +୧.୭୯୧ ରହିଛି ।

ଭାରତୀୟ ଦଳ ନିକଟରେ ମଧ୍ୟ ଦୁଇଟି ମ୍ୟାଚ୍‌ରୁ ଦୁଇଟି ପଏଣ୍ଟ ଅଛି କିନ୍ତୁ ଦଳର ନେଟ୍ ରନ୍‌ ରେଟ୍‌ କେବଳ -୦.୧୦୦ । ଏହା ବିଯୁକ୍ତ ଚିହ୍ନରେ ଅଛି । ପ୍ରଥମ ମ୍ୟାଚ୍‌ରେ ୱେଷ୍ଟଇଣ୍ଡିଜ୍ ଜିମ୍ବାୱେକୁ ୧୦୭ ରନ୍‌ରେ ପରାସ୍ତ କରିଥିଲା । ଦ୍ୱିତୀୟ ମ୍ୟାଚ୍‌ରେ ଦକ୍ଷିଣ ଆଫ୍ରିକା ବିପକ୍ଷରେ ୨୩ ବଲ୍ ବାକି ଥାଇ ୯ ୱିକେଟ୍‌ରେ ପରାସ୍ତ ହୋଇଥିଲା, କିନ୍ତୁ ଏପର୍ଯ୍ୟନ୍ତ ନେଟ୍ ରନ୍‌ରେଟ୍‌ ଦଳର ଭଲ ରହିଛି ।

ଭାରତ କଥା କହିଲେ, ଗୁରୁବାର ଜିମ୍ବାୱେ ଠାରୁ ୭୨ ରନର ବିଜୟ ପରେ ମଧ୍ୟ ସେମାନଙ୍କର ନେଟ୍ ରନ ରେଟ୍ ପ୍ଲସ୍ ଜୋନ୍ ଭିତରକୁ ଯାଇପାରିନାହିଁ, କାରଣ ଭାରତୀୟ ଦଳ ପୂର୍ବ ମ୍ୟାଚରେ ଦକ୍ଷିଣ ଆଫ୍ରିକା ବିପକ୍ଷରେ ୭୬ ରନରେ ପରାସ୍ତ ହୋଇଥିଲା ।

• କୋଲକାତାରେ ବର୍ଷା ହେବ କି ?

ଏଠାରେ ଆପଣଙ୍କୁ ସ୍ପଷ୍ଟ କରିବାକୁ ଚାହୁଁଛୁ ଯେ, ପଶ୍ଚିମବଙ୍ଗର କ୍ୟାପିଟାଲ ସିଟି କୋଲକାତାର ପାଗ ସମ୍ପୂର୍ଣ୍ଣ ସ୍ଵଚ୍ଛ ଅଛି । ମାର୍ଚ୍ଚ ୧ ତାରିଖରେ ମ୍ୟାଚ୍ ସନ୍ଧ୍ୟା ୭:୦୦ଟାରେ ଆରମ୍ଭ ହେବ । ପାଣିପାଗ ବିଭାଗ ଅନୁଯାୟୀ, ଏହି ଦିନ ବର୍ଷା ହେବାର କୌଣସି ସମ୍ଭାବନା ନାହିଁ, ଯାହା ଫଳରେ ମ୍ୟାଚ୍ ହେବାର ସମ୍ଭାବନା ଅଧିକ ଅଛି । ୧ ମାର୍ଚ୍ଚ ସନ୍ଧ୍ୟାରେ କୋଲକାତାର ତାପମାତ୍ରା ପ୍ରାୟ ୨୫ ଡିଗ୍ରୀ ସେଲସିୟସ୍ ରହିବ ବୋଲି ଆଶା କରାଯାଉଛି, ଯାହାକି ଭାରତୀୟ କ୍ରିକେଟ ପ୍ରେମୀଙ୍କ ପାଇଁ ଏକ ଭଲ ଖବର ।

ଏଥିସହ ପଢ଼ନ୍ତୁ: ଟି-୨୦ ବିଶ୍ୱକପ୍ ମଧ୍ୟରେ ଚିକିତ୍ସା ସମୟରେ ରିଙ୍କୁ ସିଂହଙ୍କ ବାପାଙ୍କ ପରଲୋକ... କ୍ୟାନସର୍‌ରେ ଥିଲେ ପୀଡ଼ିତ