ରବିବାର ଟି-୨୦ ବିଶ୍ବକପ୍‌ରେ ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଦୁଇ ପାରମ୍ପାରିକ ପ୍ରତିଦ୍ବନ୍ଦୀ ଭାରତ-ପାକିସ୍ତାନ । ଶ୍ରୀଲଙ୍କାର କଲମ୍ବୋରେ ଖେଳାଯିବ ଏହି ହାଇଭୋଲଟେଜ୍ ମ୍ୟାଚ୍‌ । ପାକିସ୍ତାନ ଅଧିନାୟକ ସଲମାନ ଅଲି ଆଗା ଶନିବାର ମ୍ୟାଚ୍ ପୂର୍ବରୁ ଏକ ସାମ୍ବାଦିକ ସମ୍ମିଳନୀ କରି ଭାରତୀୟ ଖେଳାଳିଙ୍କ ସହ ହାତ ମିଳାଇବା ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି । ପାକିସ୍ତାନ ଅଧିନାୟକ ସଲମାନ ଅଲି ଆଗା ରବିବାର ମ୍ୟାଚ୍ ପୂର୍ବରୁ ଭାରତୀୟ ଖେଳାଳିଙ୍କ ସହ ହାତ ମିଳାଇବା ପ୍ରଶ୍ନର ସିଧାସଳଖ ଉତ୍ତର ଦେଇ ନଥିଲେ, କିନ୍ତୁ ଆଶା ପ୍ରକାଶ କରିଛନ୍ତି ଯେ ଉଭୟ ଦଳର ଖେଳାଳିମାନେ ଖେଳର ଭାବନା ବଜାୟ ରଖିବେ ।

ଜାଣନ୍ତୁ ସଲମାନ ଅଲି ଆଗା କ’ଣ କହିଛନ୍ତି ?

ହାତ ମିଳାଇବାର ପରମ୍ପରା ବିଷୟରେ ପ୍ରଶ୍ନ ସମ୍ପର୍କରେ ସଲମାନ ଅଲି ଆଗା କହିଛନ୍ତି, "ଆମେ କାଲି ଏହା ବିଷୟରେ ଦେଖିବୁ।" ଟୁର୍ଣ୍ଣାମେଣ୍ଟ ଆରମ୍ଭରୁ ପାକିସ୍ତାନର ପ୍ରାରମ୍ଭିକ ବୟକଟ ପରେ ମ୍ୟାଚକୁ ନେଇ ସୃଷ୍ଟି ହୋଇଥିବା ସମ୍ବେଦନଶୀଳ ପରିସ୍ଥିତି ମଧ୍ୟରେ ସଲମାନ ଅଲି ଆଗା କୌଣସି ବିବାଦକୁ ଏଡାଇବାକୁ ଚେଷ୍ଟା କରିଥିଲେ ଏବଂ କହିଥିଲେ ଯେ ସେ ମ୍ୟାଚ୍ କ୍ରିକେଟର ଭାବନାରେ ଖେଳାଯାଉ । ସେ ଆହୁରି ମଧ୍ୟ କହିଛନ୍ତି, "ମୁଁ ଆଶା କରୁଛି ଯେ ଏହି ଖେଳ ଆରମ୍ଭରୁ ଯେଉଁ ଭାବନାରେ ଖେଳାଯାଉଛି ସେହି ଭାବନାରେ ଖେଳାଯିବ ।"

ଏସିଆ କପ୍ ସମୟରେ ଭାରତୀୟ ଖେଳାଳିମାନେ ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇ ନଥିଲେ

ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଗତ ସେପ୍ଟେମ୍ବରରେ ଦୁବାଇରେ ଅନୁଷ୍ଠିତ ଏସିଆ କପ୍ ସମୟରେ ଘୋଷଣା କରିଥିଲେ ଯେ ଏପ୍ରିଲରେ ପହଲଗାମ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ଭାରତୀୟ ନାଗରିକଙ୍କ ପ୍ରତି ସମ୍ମାନାର୍ଥେ ତାଙ୍କ ଦଳ ପାକିସ୍ତାନ ସହିତ ହ୍ୟାଣ୍ଡସେକ୍ କରିବ ନାହିଁ । ଟସ୍‌ ସମୟରେ ଏବଂ ମ୍ୟାଚ୍‌ ପରେ ମଧ୍ୟ ଭାରତୀୟ ଖେଳାଳି ପାକିସ୍ତାନୀ ଖେଳାଳିଙ୍କ ସହ ହାତ ମିଳାଇ ନଥିଲେ । ଏମିତିକି ଏସିଆ କପ୍‌ ଟ୍ରଫି ଜିତିବା ପରେ ଟିମ୍ ଇଣ୍ଡିଆ ମୋହସିନ୍ ନକଭୀଙ୍କଠାରୁ ଟ୍ରଫି ମଧ୍ୟ ଗ୍ରହଣ କରିନଥିଲା । ଯାହାକୁ ନେଇ ବହୁ ବିବାଦ ଉପୁଜିଥିଲା । ଏ ପର୍ଯ୍ୟନ୍ତ ବି ଏସିଆ କପ୍‌ ଟ୍ରଫି ଭାରତକୁ ମିଳିପାରିନି ।

ତେବେ ଜାତୀୟ ଗଣମାଧ୍ୟମର ସୂଚନା ଅନୁଯାୟୀ ରବିବାର ମଧ୍ୟ ସମାନ ପ୍ରୋଟୋକଲ ଅନୁସରଣ କରାଯିବାର ସମ୍ଭାବନା ରହିଛି ଏବଂ ଦୁଇ ଅଧିନାୟକ ଟସ୍ ସମୟରେ କିମ୍ବା ମ୍ୟାଚ୍ ଶେଷରେ ହାତ ମିଳାବେଇବେ ନାହିଁ ।