ଆଉ ଦିନ କେଇଟା ପରେ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ବକପ୍‌ । କିନ୍ତୁ ଏପର୍ଯ୍ୟନ୍ତ ଏହାକୁ ନେଇ ବିବାଦ ଥମିବାରେ ନାଁ ନେଉନାହିଁ । ଫେବ୍ରୁଆରୀ ୧୫ରେ ହେବାକୁ ଥିବା ଭାରତ ବିପକ୍ଷ ମ୍ୟାଚ୍‌କୁ ବୟକଟ୍‌ କରିବ ବୋଲି କହିଛି ପାକିସ୍ତାନ । ଆଉ ଏହା ପରେ ଆଇସିସି ଆକ୍ସନ ମୋଡ଼କୁ ଆସିଛି । ପାକିସ୍ତାନ ଯଦି ଭାରତ ବିପକ୍ଷ ମ୍ୟାଚ୍‌କୁ ବୟକଟ୍‌ କରେ ତେବେ ଆଇସିସି ପାକ୍‌ ଉପରେ କଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଚେତାବନୀ ଦେଇଛି । ଆଉ ଏହା ପରେ ପାକିସ୍ତାନ ତା'ର ଅସଲ ରୂପ ଦେଖାଇଛି ।

ପାକିସ୍ତାନ ସାରା ବିଶ୍ୱରେ "ଆତଙ୍କୀସ୍ତାନ" ଭାବରେ ଜଣାଶୁଣା । ଆଉ ଏବେ ପାକିସ୍ତାନର ଜଣେ ୟୁଟ୍ୟୁବର ଏମିତି ଏକ ବୟାନ ଦେଇଛନ୍ତି ଯାହା ଆପଣଙ୍କୁ ପାକିସ୍ତାନର ଅସଲ ରୂପ ଦେଖାଇଦେବ । ଅନ୍ତର୍ଜାତୀୟ କ୍ରିକେଟ ପରିଷଦ (ICC) ପାକିସ୍ତାନ କ୍ରିକେଟ୍ ବୋର୍ଡ (PCB) ଆଗରେ ମୁଣ୍ଡ ନୁଆଁଇବାକୁ ମନା କରିବାରୁ କ୍ରୋଧିତ ହୋଇ ସେ ଆଇସିସି କାର୍ଯ୍ୟାଳୟକୁ ବୋମା ପକାଇବାକୁ ଧମକ ଦେଇଛନ୍ତି । ଯଦି ପାକିସ୍ତାନ କ୍ରିକେଟ୍ ଦଳ ଫେବୃଆରୀ ୧୫ ତାରିଖରେ ଭାରତ ବିପକ୍ଷ ମ୍ୟାଚ୍ ବୟକଟ କରେ ତେବେ ICC କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚେତାବନୀ ଦେବା ପରେ ଏହି ଧମକ ଆସିଛି ।

ପାକିସ୍ତାନୀ ୟୁଟ୍ୟୁବର ଅର୍ସଲାନ ନାସିର ICC ଏବଂ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ଅଧିକାରୀଙ୍କ ବିରୁଦ୍ଧରେ ଅପମାନଜନକ ମନ୍ତବ୍ୟ ଦେଇଥିଲେ ଏବଂ ତା'ପରେ ସିଧାସଳଖ ICC କାର୍ଯ୍ୟାଳୟକୁ ବୋମା ପକାଇବାକୁ ଧମକ ଦେଇଥିଲେ । ସେ ଏକ ଭିଡିଓରେ ଏହି ଧମକ ଦେଇଛନ୍ତି, ଯାହା ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।

ପାକିସ୍ତାନୀ ୟୁଟ୍ୟୁବର ଅର୍ସଲାନ ନାସିର ପ୍ରାୟ ୧୫ ମିନିଟର ଏକ ଭିଡିଓ ଜାରି କରିଛନ୍ତି । ଯେଉଁଥିରେ ସେ ସିଧାସଳଖ ଧମକ ଦେଇଛନ୍ତି । ଯଦିଓ ଭିଡିଓର କ୍ୟାପସନରେ "ହାସ୍ୟପୂର୍ଣ୍ଣ କ୍ରିକେଟ୍ ସମୀକ୍ଷା" ଏବଂ "କମେଡି କମେଣ୍ଟ୍ରୀ" ଲେଖାଯାଇଛି, କିନ୍ତୁ ଅର୍ସଲାନଙ୍କ ସ୍ୱର ଧମକପୂର୍ଣ୍ଣ ରହିଛି । ଅର୍ସଲାନ କହିଛନ୍ତି, "ICC କାର୍ଯ୍ୟାଳୟ ସୁରକ୍ଷିତ କାରଣ ଏହା ଦୁବାଇରେ ଅଛି। ଯଦି ଏହା ଭାରତରେ ଥାଆନ୍ତା, ତେବେ ଆମର ଲୋକମାନେ ଏହାକୁ ଏବଂ ଏହାର ଆଖପାଖ ଅଞ୍ଚଳରେ ବୋମା ପକାଇ ଦେଇଥାଆନ୍ତେ ।"

ICC ପାକିସ୍ତାନକୁ ଚେତାବନୀ ଦେବାରେ ଅର୍ସଲାନ ବିରକ୍ତ ହୋଇଥିଲେ । ଫେବୃଆରୀ ୧୫ ତାରିଖରେ ଶ୍ରୀଲଙ୍କାର କଲମ୍ବୋରେ ଭାରତ ବିପକ୍ଷରେ T-୨୦ ବିଶ୍ୱକପ୍ ମ୍ୟାଚ୍ ବର୍ଜନ ଘୋଷଣା କରିବା ପରେ ICC ଏହି ଚେତାବନୀ ଜାରି କରିଥିଲା । ଅର୍ସଲାନ ICC ଏବଂ BCCI ଉଭୟ ଉପରେ ଭିଡିଓ ମାଧ୍ୟମରେ ଆକ୍ରମଣ କରିଥିଲେ । କିନ୍ତୁ ତାଙ୍କର ସବୁଠାରୁ ଅଶ୍ଳୀଳ ମନ୍ତବ୍ୟ ଭାରତୀୟ ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବ ଏବଂ ICC ଅଧ୍ୟକ୍ଷ ଜୟ ଶାହଙ୍କ ପ୍ରତି କେନ୍ଦ୍ରିତ ଥିଲା । ଅର୍ସଲାନ ୨୦୨୫ ଏସିଆ କପ୍ ସମୟରେ ହୋଇଥିବା ହ୍ୟାଣ୍ଡସେକ୍‌ ବିବାଦକୁ ଉଲ୍ଲେଖ କରି ଏହି ମନ୍ତବ୍ୟ ଦେଇଥିଲେ ।

Must Read : ଟି-୨୦ ବିଶ୍ବକପରେ ଭାରତ ସହ ଖେଳିବନି ପାକିସ୍ତାନ ! ICC ଉପରେ ପଡ଼ିବ ବଡ଼ ପ୍ରଭାବ

ICC ପାକିସ୍ତାନକୁ ମ୍ୟାଚ୍ ବର୍ଜନ କଲେ ଭାରୀ ଜରିମାନା ଦେବାକୁ ଧମକ ଦେଇଛି । ଏହି ଜରିମାନା ୩୫ ମିଲିୟନ ଡଲାର ପର୍ଯ୍ୟନ୍ତ ହୋଇପାରେ। ଆଇସିସି ରାଜସ୍ୱରୁ ପାକିସ୍ତାନର ଅଂଶ ମଧ୍ୟ ବନ୍ଦ କରାଯାଇପାରେ । ପାକିସ୍ତାନକୁ ଅନ୍ତର୍ଜାତୀୟ କ୍ରିକେଟରୁ ନିଷିଦ୍ଧ କରାଯିବାର ଧମକ ମଧ୍ୟ ଦିଆଯାଇଛି । ଏହା ସତ୍ତ୍ୱେ ପାକିସ୍ତାନ ନିଜ ଜିଦ୍‌ରେ ଅଟଳ ରହିଛି। ତଥାପି କିଛି ଗଣମାଧ୍ୟମ ରିପୋର୍ଟ ଦାବି କରୁଛି ଯେ ଏହି ପ୍ରସଙ୍ଗରେ ପିସିବି ଏବଂ ଆଇସିସି ମଧ୍ୟରେ ଆଲୋଚନା ଆରମ୍ଭ ହୋଇଛି ।