IPL ୨୦୨୫ ପରେ ବାଙ୍ଗାଲୋରର ଏମ. ଚିନ୍ନାସ୍ୱାମୀ ଷ୍ଟାଡିୟମରେ ଏକ ବଡ଼ ଦୁର୍ଘଟଣା ଘଟିଥିଲା । RCB ଖେଳାଳିମାନେ ଫାଇନାଲ ଜିତିବା ପରେ ଚିନ୍ନାସ୍ବାମୀ ଷ୍ଟାଡିୟମରେ ବିଜୟ ଉତ୍ସବ ପାଳନ କରିଥିଲା । ତେବେ ଏହି ଉତ୍ସବରେ ସାମିଲ ହେବା ପାଇଁ ଏତେ ଭିଡ଼ ହୋଇଥିଲା ଯେ ଲୋକଙ୍କ ମଧ୍ୟରେ ଦଳାଚକଟା ହୋଇଥିଲା । ଯାହା ଫଳରେ ୧୧ ଜଣଙ୍କର ମୃତ୍ୟୁ ହୋଇଥିଲା । ସେହି ଘଟଣା ପରଠାରୁ, BCCI ଚିନ୍ନାସ୍ୱାମୀ ଷ୍ଟାଡିୟମରେ କୌଣସି ବଡ଼ କାର୍ଯ୍ୟକ୍ରମ ଉପରେ ପ୍ରତିବନ୍ଧକ ଲଗାଇଛି। ରିପୋର୍ଟ ଅନୁଯାୟୀ, IPL ୨୦୨୬ ସମୟରେ RCB ଚିନ୍ନାସ୍ୱାମୀ ଷ୍ଟାଡିୟମରେ କୌଣସି ମ୍ୟାଚ୍ ଖେଳିନପାରେ । ଯାହାଫଳରେ ଚାମ୍ପିଅନ୍ ହେବା ପରେ ଏବେ ଆରସିବି ସେମାନଙ୍କର ହୋମ୍‌ ଗ୍ରାଉଣ୍ଡ ପରିବର୍ତ୍ତନ କରିବାକୁ ବାଧ୍ୟ ହେବ ।

RCB ଏହି ଷ୍ଟାଡିୟମରୁ ପ୍ରସ୍ତାବ ପାଇଛି

ଏମ. ଚିନ୍ନାସ୍ୱାମୀ ଷ୍ଟାଡିୟମକୁ ନେଇ ବିବାଦ ଯୋଗୁଁ ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ଏକ ପ୍ରସ୍ତାବ ଦେଇଛି । ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, IPL ୨୦୨୬ ପାଇଁ RCB ପୁଣେର ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ଷ୍ଟାଡିୟମକୁ ନିଜର ହୋମ୍‌ ଗ୍ରାଉଣ୍ଡ କରିପାରେ । ଏନେଇ RCB ଏବଂ MCA ମଧ୍ୟରେ ଆଲୋଚନା ଆରମ୍ଭ ହୋଇଛି ।

ଅଧିକ ପଢ଼ନ୍ତୁ: IPL ୨୦୨୬ ପୂର୍ବରୁ ବଡ଼ ପରିବର୍ତ୍ତନ, ନିଜ ଅଧିନାୟକଙ୍କୁ ଛାଡିପାରେ ଏହି ୩ ଫ୍ରାଞ୍ଚାଇଜ୍‌ !

ଏ ସମ୍ପର୍କରେ, MCA ସଚିବ କମଲେଶ ପିସାଲ କହିଛନ୍ତି, "ପୁଣେରେ RCB ମ୍ୟାଚ୍ ଆୟୋଜନ ନେଇ ଆଲୋଚନା ଜାରି ରହିଛି । କିନ୍ତୁ ଏହା ଏପର୍ଯ୍ୟନ୍ତ ସ୍ପଷ୍ଟ ହୋଇନି । ଚିନ୍ନାସ୍ବାମୀ ଷ୍ଟାଡିୟମରେ ଦଳାଚକଟା ଯୋଗୁଁ ଆରସିବି ଏବେ ସମସ୍ୟାର ସମ୍ମୁଖୀନ ହେଉଛନ୍ତି । ତେଣୁ, ସେମାନେ ଏକ ଅନ୍ୟ ଷ୍ଟାଡିୟମ ଖୋଜୁଛନ୍ତି, ଏବଂ ଆମେ ସେମାନଙ୍କୁ ଆମର ଷ୍ଟାଡିୟମ ପ୍ରଦାନ କରିଛୁ । ପ୍ରାରମ୍ଭିକ ଆଲୋଚନା ଚାଲିଛି, ଏବଂ କିଛି ବୈଷୟିକ ସମସ୍ୟା ଅଛି ଯାହା ସମାଧାନ କରିବାକୁ ପଡିବ। ଯଦି ସବୁକିଛି ଠିକ୍ ରୁହେ, ତେବେ ପୁଣେରେ ଆରସିବିର ମ୍ୟାଚ୍‌ ଆୟୋଜନ ହେବା ନେଇ ସମ୍ଭାବନା ରହିଛି'।

ସେପଟେ ଚାମ୍ପିଅନ ହେବା ପରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଦଳ ମିନି-ନିଲାମ ପାଇଁ ପ୍ରସ୍ତୁତିକୁ ଜୋରଦାର କରିଛି। RCB ଲିଆମ୍ ଲିଭିଂଷ୍ଟୋନ୍ ସମେତ ପାଞ୍ଚ ଜଣ ଖେଳାଳିଙ୍କୁ ରିଲିଜ୍‌ କରିପାରେ । ତେବେ ଏହି ସିଜିନରେ RCBର ଦଳ ସ୍ଥିର ରହିଛି ଏବଂ ମିନି ନିଲାମରେ ଅଧିକ କିଛି ପରିବର୍ତ୍ତନ ହେବାର ସମ୍ଭାବନା ନାହିଁ । RCB ୧୮ ବର୍ଷ ପରେ ଗତ ସିଜିନ୍‌ରେ ଆଇପିଏଲ ଟ୍ରଫି ଉଠାଇଥିଲେ ।