Rinku Singh / ରିଙ୍କୁଙ୍କ ବାପାଙ୍କୁ ଲିଭର୍ କ୍ୟାନସର୍, ବିଶ୍ବକପର ବାକି ମ୍ୟାଚ୍ ଖେଳିପାରିବେ କି ଷ୍ଟାର କ୍ରିକେଟର ?

୨୦୨୬ ଟି-୨୦ ବିଶ୍ୱକପରେ ଟିମ୍ ଇଣ୍ଡିଆ ଏବେ ବ୍ୟାକଫୁଟ୍‌ରେ ରହିଛି । ସୁପର-୮ ର ପ୍ରଥମ ମ୍ୟାଚ୍‌ରେ ଦକ୍ଷିଣ ଆଫ୍ରିକା ବିପକ୍ଷରେ ପରାଜୟ ପରେ ଅଡ଼ୁଆରେ ଟିମ୍‌ ଇଣ୍ଡିଆ । ପାରିବାରିକ କାରଣରୁ ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍ ରିଙ୍କୁ ସିଂଙ୍କୁ ବିଶ୍ବକପ୍ ମଝିରୁ ଘରକୁ ଫେରିଛନ୍ତି । ରିଙ୍କୁଙ୍କ ପିତା ଖାନଚନ୍ଦ୍ର ସିଂଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିବାରୁ ସେ ବିଶ୍ବକପ୍ ଅଧାରୁ ଘରକୁ ଫେରିଛନ୍ତି ।

ଜାତୀୟ ଗଣମାଧ୍ୟମର ସୂଚନା ଅନୁଯାୟୀ, ତାଙ୍କ ପିତା ଯକୃତ କର୍କଟ ରୋଗରେ ପୀଡିତ ଏବଂ ତାଙ୍କ ଅବସ୍ଥା ଖରାପ ହେବା ପରେ ତାଙ୍କୁ ଭେଣ୍ଟିଲେଟର ସପୋର୍ଟରେ ରଖାଯାଇଛି । ଏହି କାରଣରୁ ରିଙ୍କୁ ଫେବ୍ରୁଆରୀ ୨୪ ତାରିଖରେ ଚେନ୍ନାଇ ଛାଡି ପ୍ରଥମେ ଦିଲ୍ଲୀରେ ପହଞ୍ଚିଥିଲେ ଏବଂ ପରେ ଗ୍ରେଟର ନୋଏଡାର ଏକ ହସ୍ପିଟାଲରେ ତାଙ୍କ ପିତାଙ୍କୁ ଭେଟିଥିଲେ ।

ପରିବାର ସହିତ ସମୟ ବିତାଇବା ପରେ, ରିଙ୍କୁ ଏବେ ଦଳରେ ପୁଣି ଯୋଗଦେବାକୁ ପ୍ରସ୍ତୁତ ହେଉଛନ୍ତି। ସେ ଫେବ୍ରୁଆରୀ ୨୫ ତାରିଖ ବୁଧବାର ଚେନ୍ନାଇ ଫେରିବାର ଯୋଜନା ରହିଛି । ଭାରତ-ଜିମ୍ବାୱେ ସୁପର ୮ ମ୍ୟାଚ୍ ପୂର୍ବରୁ ଚୟନ ପାଇଁ ଉପଲବ୍ଧ ହେବେ ବୋଲି ଜଣାପଡ଼ିଛି ।

ତାଙ୍କ ପିତାଙ୍କ ହଠାତ୍ ଅସୁସ୍ଥତା ଯୋଗୁଁ ରିଙ୍କୁ ଚେନ୍ନାଇ ଦଳର ପ୍ରଶିକ୍ଷଣ ଅଧିବେଶନରେ ଯୋଗ ଦେଇପାରି ନଥିଲେ। ପ୍ରଥମେ ବିଶ୍ୱାସ କରାଯାଉଥିଲା ଯେ ସେ ଜିମ୍ବାୱେ ବିପକ୍ଷ ମ୍ୟାଚ୍ ଖେଳି ପାରନ୍ତି ନାହିଁ କିନ୍ତୁ ଏବେ ତାଙ୍କର ପ୍ରତ୍ୟାବର୍ତ୍ତନ ଆଶା କରାଯାଉଛି। ଦଳ ପରିଚାଳନା ଏବଂ ଚିକିତ୍ସା ସମ୍ବନ୍ଧୀୟ ଅପଡେଟ୍ ଉପରେ ଚୂଡ଼ାନ୍ତ ନିଷ୍ପତ୍ତି ନିର୍ଭର କରିବ ।

ଚଳିତ ଟି-୨୦ ବିଶ୍ୱକପ୍ ରିଙ୍କୁ ପାଇଁ ନିରାଶାଜନକ ହୋଇଛି। ସେ ପାଞ୍ଚଟି ଇନିଂସରେ ମାତ୍ର ୨୪ ରନ୍ କରିଛନ୍ତି । ଯେତେବେଳେ କି ତାଙ୍କର ଷ୍ଟ୍ରାଇକ୍ ରେଟ୍ ୧୦୦ ତଳେ ରହିଛି । ତେବେ ରିଙ୍କୁଙ୍କ ଅନୁପସ୍ଥିତିରେ ସଞ୍ଜୁଙ୍କୁ ଦଳରେ ସାମିଲ କରାଯିବା ନେଇ ଚର୍ଚ୍ଚା ଆଲୋଚନା ଜାରି ରହିଛି ।