ବିଜୟ ହଜାରେ ଟ୍ରଫିର ପ୍ରଥମ ମ୍ୟାଚ୍‌ରେ ଦମଦାର ଶତକ ହାସଲ କରିଥିଲେ ରୋହିତ ଶର୍ମା । ସିକ୍କିମ୍‌ ବିପକ୍ଷରେ ରୋହିତ ୧୫୫ ରନ୍‌ର ଏକ ଚମତ୍କାର ଇନିଂସ ଖେଳିଥିଲେ । ଜୟପୁରରେ ଏହି ମ୍ୟାଚ୍‌ ଖେଳାଯାଇଥିଲା । ବିଜୟ ହଜାରେ ଟ୍ରଫିରେ ମୁମ୍ବାଇର ଦ୍ବିତୀୟ ମ୍ୟାଚ୍‌ ମଧ୍ୟ ସେହି ଷ୍ଟାଡିୟମରେ ଖେଳାଯାଇଥିଲା । ରୋହିତଙ୍କୁ ଦେଖିବା ପାଇଁ ସକାଳୁ ସକାଳୁ ବହୁ ସଂଖ୍ୟାରେ ଦର୍ଶକ ଷ୍ଟାଡିୟମରେ ପହଞ୍ଚିଥିଲେ । କିନ୍ତୁ ପ୍ରଶଂସକଙ୍କୁ ନିରାଶ କରିଥିଲେ ରୋହିତ । ଉତ୍ତରାଖଣ୍ଡ ବିପକ୍ଷରେ ଖେଳାଯାଉଥିବା ଏହି ମ୍ୟାଚ୍‌ରେ ରୋହିତ ଶର୍ମା ଖାତା ଖୋଲି ପାରିନଥିଲେ । ସେ ଜିରୋରେ ଆଉଟ୍ ହୋଇ ପ୍ୟାଭିଲିୟନ୍ ଫେରିଥିଲେ ।

ବିଜୟ ହଜାରେ ଟ୍ରଫିର ପ୍ରଥମ ମ୍ୟାଚ୍‌ରେ ସିକିମ୍ ବିପକ୍ଷରେ ୧୫୫ ରନ୍‌ର ଏକ ଧମାକାଦାର ଇନିଂସ ପରେ ରୋହିତ ଆଉ ଏକ ବଡ଼ ଇନିଂସ୍ ଖେଳିବେ ବୋଲି ଆଶା କରାଯାଉଥିଲା । କିନ୍ତୁ ଏଥର କାହାଣୀ ସମ୍ପୂର୍ଣ୍ଣ ଭିନ୍ନ ଥିଲା । ଉତ୍ତରଖଣ୍ଡର ଦ୍ରୁତ ବୋଲର ଦେବେନ୍ଦ୍ର ବୋରା ରୋହିତଙ୍କୁ ଶୂନରେ ଆଉଟ କରିଥିଲେ । ରୋହିତ ଫାଇନ୍‌ ଲେଗ୍‌ ଆଡକୁ ଏକ ସଟ୍‌ ଖେଳିଥିଲେ । କିନ୍ତୁ ଜଗମୋହନ ନାଗରକୋଟି ଏକ ଚମତ୍କାର କ୍ୟାଚ୍ ନେଇଥିଲେ । ଯାହାଫଳରେ ରୋହିତ ଖାତା ଖୋଲି ପାରିନଥିଲେ । ରୋହିତ ଆଉଟ୍ ହେବା ପରେ ଷ୍ଟାଡିୟମ୍‌ରେ ଥିବା ପ୍ରଶଂସକମାନେ ନିରାଶ ହୋଇଥିଲେ ।

ରୋହିତ ଶର୍ମା ଆଉଟ୍‌ ହେବା ପରେ ମୁମ୍ବାଇର ବ୍ୟାଟିଂ ସମ୍ଭାଳିଥିଲେ ଦୁଇ ଭାଇ ସରଫରାଜ ଖାନ ଓ ମୁସୀର ଖାନ । ଉଭୟ ୫୫ ରନ୍‌ କରିଥିଲେ । ଏହାପରେ ଓ୍ବିକେଟ୍‌ କିପର ବ୍ୟାଟ୍ସମ୍ୟାନ୍‌ ହାର୍ଦ୍ଦିକ ତାମୋର ଦମଦାର ୯୩ ରନ୍‌ର ଇନିଂସ ଖେଳିଥିଲେ । ଯାହାଫଳରେ ନିର୍ଦ୍ଧାରିତ ୫୦ ଓଭରରେ ମୁମ୍ବାଇ ୭ ଓ୍ବିକେଟ୍‌ ହରାଇ ୩୩୧ ରନ୍‌ କରିଛି ।
ସେପଟେ ଆଉ ଏକ ମ୍ୟାଚ୍‌ରେ ଦିଲ୍ଲୀ ଓ ଗୁଜରାଟ ମଧ୍ୟରେ ଖେଳାଯାଉଛି । ଏହି ମ୍ୟାଚ୍‌ରେ ବିରାଟ କୋହଲି ଦମଦାର ଇନିଂସ ଖେଳିଥିଲେ । ପ୍ରଥମ ମ୍ୟାଚ୍‌ରେ ଶତକ ପରେ ଦ୍ବିତୀୟ ମ୍ୟାଚ୍‌ରେ ଗୁଜରାଟ ବିପକ୍ଷରେ ମଧ୍ୟ ଦମଦାର ଇନିଂସ ଖେଳିଥିଲେ ବିରାଟ । ସେ ୬୧ ବଲ୍‌ରେ ୧୩ ଚୌକା ଓ ଗୋଟିଏ ଛକା ସହ ୭୭ ରନ୍‌ କରିଥିଲେ । ବିରାଟଙ୍କ ଏହି ଇନିଂସ ଫଳରେ ଦିଲ୍ଲୀ ନିର୍ଦ୍ଧାରିତ ୫୦ ଓଭରରେ ୯ ଓ୍ବିକେଟ୍‌ ହରାଇ ୨୫୪ ରନ୍‌ କରିଛି ।