୨୦୨୬ ଟି-୨୦ ବିଶ୍ୱକପ୍ ସେମିଫାଇନାଲ ମ୍ୟାଚ୍‌ରେ ସଞ୍ଜୁ ସାମସନ୍ ଏବଂ ଇଶାନ୍ କିଶାନ୍ ୧୯ ବର୍ଷର ପୁରୁଣା ରେକର୍ଡ ଭାଙ୍ଗିଛନ୍ତି । ଭାରତ ଏବଂ ଇଂଲଣ୍ଡ ମଧ୍ୟରେ ସେମିଫାଇନାଲ ମ୍ୟାଚ୍‌ ମୁମ୍ବାଇର ୱାଙ୍ଖେଡେ ଷ୍ଟାଡିୟମ୍‌ରେ ଖେଳାଯାଉଛି । ଏହି ମ୍ୟାଚ୍‌ରେ ସାମସନ୍ ଏବଂ ଇଶାନ୍ ୯୭ ରନ୍‌ର ପାର୍ଟନରସିପ୍‌ କରିଥିଲେ, ଯାହା ଟି-୨୦ ବିଶ୍ୱକପ୍‌ର ନକଆଉଟ୍ ମ୍ୟାଚ୍‌ରେ ଭାରତ ପାଇଁ ସର୍ବାଧିକ ପାର୍ଟନରସିପ୍‌ ଥିଲା । ସେମାନେ ୧୯ ବର୍ଷ ପୁରୁଣା ଯୁବରାଜ ସିଂହ ଏବଂ ରବିନ୍ ଉଥାପ୍ପାଙ୍କ ରେକର୍ଡ ଭାଙ୍ଗିଥିଲେ ।

୧୯ ବର୍ଷ ପୁରୁଣା ରେକର୍ଡ ଭାଙ୍ଗିଗଲା

୨୦୦୭ ଟି-୨୦ ବିଶ୍ୱକପ୍ ସେମିଫାଇନାଲ୍‌ରେ ଅଷ୍ଟ୍ରେଲିଆ ବିପକ୍ଷରେ ଯୁବରାଜ ସିଂହ ଏବଂ ରବିନ୍ ଉଥାପ୍ପା ୮୪ ରନ୍‌ର ପାର୍ଟନରସିପ୍‌ କରିଥିଲେ । ଯୁବରାଜ ଏବଂ ଉଥାପ୍ପା ମାତ୍ର ୩୯ ବଲ୍‌ରେ ୮୪ ରନ୍‌ ଯୋଡିଥିଲେ । ଏହା ଆଜି ପର୍ଯ୍ୟନ୍ତ ଟି-୨୦ ବିଶ୍ୱକପ୍‌ର ନକଆଉଟ୍ ମ୍ୟାଚ୍‌ରେ ଭାରତ ପାଇଁ ସର୍ବାଧିକ ପାର୍ଟନରସିପ୍‌ ଥିଲା ।
ଏବେ ୧୯ ବର୍ଷ ପରେ ସଞ୍ଜୁ ସାମସନ୍ ଏବଂ ଇଶାନ୍ କିଶାନ୍ ୯୭ ରନ୍‌ର ପାର୍ଟନରସିପ୍‌ କରି ଏହି ରେକର୍ଡ ଭାଙ୍ଗିଛନ୍ତି। ସାମସନ୍ ଏବଂ କିଶାନ୍ ୪୫ ବଲ୍‌ରେ ୯୭ ରନ୍‌ର ପାର୍ଟନରସିପ୍ କରିଥିଲେ । ଇଶାନ୍ ୧୮ ବଲ୍‌ରେ ୩୯ ରନ୍ କରି ଆଉଟ୍ ହୋଇଥିଲେ, ଯେତେବେଳେ ସାମସନ୍ ଇଂଲଣ୍ଡ ବିପକ୍ଷ ସେମିଫାଇନାଲ୍‌ରେ ୮୯ ରନ୍‌ କରିଥିଲେ ।

ଭାରତ ପ୍ରଥମେ ବ୍ୟାଟିଂ କରୁଛି

ମୁମ୍ବାଇର ୱାଙ୍ଖେଡେ ଷ୍ଟାଡିୟମ୍‌ରେ ଖେଳାଯାଉଥିବା ସେମିଫାଇନାଲ୍ ମ୍ୟାଚ୍‌ରେ ଇଂଲଣ୍ଡ ଟସ୍ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା । ଅଭିଷେକ ଶର୍ମା ମଧ୍ୟ ଏହି ଗୁରୁତ୍ୱପୂର୍ଣ୍ଣ ମ୍ୟାଚ୍‌ରେ ବିଫଳ ହୋଇଥିଲେ, ମାତ୍ର ୯ ରନ୍ କରି ପ୍ୟାଭିଲିୟନ ଫେରିଥିଲେ । ଏହା ପରେ ସଞ୍ଜୁ ସାମସନ୍‌ ଓ ଇଶାନ କିଶାନ ଧୁଆଁଧାର ଇନିଂସ ଖେଳିଥିଲେ । ଉଭୟରେ ଦ୍ବିତୀୟ ଓ୍ବିକେଟ୍‌ ପାଇଁ ୯୭ ରନ୍‌ ପାର୍ଟନରସିପ୍‌ କରିଥିଲେ । ଇଶାନ ୩୯ ରନ୍‌ କରି ଆଉଟ୍‌ ହେବା ପରେ ଶିବମ ଦୁବେ ବ୍ୟାଟିଂ କରିବାକୁ ଆସିଥିଲେ ।

ସାମସନ୍‌ ଓ ଦୁବେ ୪୩ ରନ୍‌ର ପାର୍ଟନରସିପ୍‌ କରିଥିଲେ । ତେବେ ସାମସନ୍‌ ୮୯ ରନ୍‌ ଆଉଟ୍‌ ହେବା ପରେ ଅଧିନାୟକ ସୂର୍ଯ୍ୟକୁମାର ଯାଦବ କ୍ରିଜ୍‌କୁ ଆସିଥିଲେ । ସେ ମାତ୍ର ୧୧ ରନ୍‌ କରି ଆଉଟ୍‌ ହୋଇଥିଲେ । ସେହିପରି ଶିବମ ଦୁବେ ୪୩ ରନ୍‌ କରି ଆଉଟ୍‌ ହୋଇଥିଲା । ଏହା ପରେ ହାର୍ଦ୍ଦିକ ପାଣ୍ଡ୍ୟା ୧୨ ୨୭ ଓ ତିଲକ ବର୍ମା ୭ ବଲ୍‌ରେ ଦ୍ରୁତ ୨୧ ରନ୍ କରିଥିଲେ । ଯାହାଫଳରେ ଭାରତର ସ୍କୋର ନିର୍ଦ୍ଦାରିତ ୨୦ ଓଭରରେ ୨୫୩ ରନ୍‌ କରିଥିଲା ।

ସଞ୍ଜୁ ସାମସନ୍ ଲଗାତାର ଦ୍ୱିତୀୟ ମ୍ୟାଚ୍‌ରେ ପଚାଶ ରନ୍ କରିଥିଲେ । ପୂର୍ବରୁ ସାମସନ୍ ୱେଷ୍ଟଇଣ୍ଡିଜ୍ ବିପକ୍ଷ ସୁପର ୮ ମ୍ୟାଚ୍‌ରେ ୯୭ ରନ୍‌ର ମ୍ୟାଚ୍ ବିଜୟୀ ଇନିଂସ ଖେଳିଥିଲେ। ଏବେ ସେ ଇଂଲଣ୍ଡ ବିପକ୍ଷ ସେମିଫାଇନାଲ୍‌ରେ ମଧ୍ୟ ଅର୍ଦ୍ଧଶତକ ହାସଲ କରିଥିଲେ ।