ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ ମ୍ୟାଚ୍ ନଭେମ୍ବର ୨୨ରେ ଖେଳାଯିବ । ଏହି ମ୍ୟାଚ୍‌ ଆସାମର ଗୌହାଟିରେ ଖେଳାଯିବ । ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ପ୍ରଥମ ମ୍ୟାଚରେ ଭ୍ରମଣକାରୀ ଦକ୍ଷିଣ ଆଫ୍ରିକା ଟିମ୍ ଇଣ୍ଡିଆକୁ ପରାସ୍ତ କରି ସିରିଜରେ ୧-୦ରେ ଆଗୁଆ ହୋଇଛି । ଏବେ, ସିରିଜରେ କ୍ଲିନ୍ ସୁଇପ୍ ଏଡାଇବା ପାଇଁ ଭାରତୀୟ ଦଳକୁ ଯେକୌଣସି ମୂଲ୍ୟରେ ଦ୍ୱିତୀୟ ଟେଷ୍ଟ ଜିତିବାକୁ ପଡିବ। ରିପୋର୍ଟ ଅନୁଯାୟୀ ଅଧିନାୟକ ଶୁଭମନ ଗିଲ୍ ଏବଂ ଚାଇନାମ୍ୟାନ୍ ସ୍ପିନର କୁଲଦୀପ ଯାଦବ ଦ୍ୱିତୀୟ ଟେଷ୍ଟରେ ଖେଳିବା ସମ୍ଭାବନା କମ୍ ।

ସୂଚନା ଅନୁସାରେ, ଟିମ୍ ଇଣ୍ଡିଆ ମ୍ୟାନେଜମେଣ୍ଟ ଏପର୍ଯ୍ୟନ୍ତ ନଭେମ୍ବର ୨୨ରୁ ଗୌହାଟିରେ ଖେଳାଯିବାକୁ ଥିବା ଦ୍ୱିତୀୟ ଟେଷ୍ଟରେ ଶୁବମନ ଗିଲ ଖେଳିବେ କି ନାହିଁ ସେନେଇ କୌଣସି ନିଷ୍ପତ୍ତି ନେଇନାହାନ୍ତି । କିନ୍ତୁ ଜାତୀୟ ଗଣମାଧ୍ୟମ ରିପୋର୍ଟରେ ଦାବି କରାଯାଇଛି ଯେ ଗିଲ୍ ଦ୍ୱିତୀୟ ଟେଷ୍ଟରେ ଖେଳିପାରିବେ ନାହିଁ । ଏପରି ପରିସ୍ଥିତିରେ ତାଙ୍କ ସ୍ଥାନରେ ୱିକେଟକିପର-ବ୍ୟାଟ୍ସମ୍ୟାନ୍ ଋଷଭ ପନ୍ତ ଦଳର ନେତୃତ୍ୱ ନେବେ ।

ନୀତୀଶ ରେଡ୍ଡି ଶୁଭମନ ଗିଲଙ୍କ ବଦଳ ଭାବରେ ଦଳରେ ଯୋଗ ଦେଇଛନ୍ତି

ପ୍ରଥମ ଟେଷ୍ଟ ପୂର୍ବରୁ ନୀତୀଶ କୁମାର ରେଡ୍ଡିଙ୍କୁ ପୂର୍ବରୁ ଟିମ୍ ଇଣ୍ଡିଆରୁ ରିଲିଜ୍‌ କରାଯାଇଥିଲା । ଯାହାଦ୍ୱାରା ସେ ଇଣ୍ଡିଆ ଏ ପାଇଁ ଖେଳିପାରିବେ । କିନ୍ତୁ ରେଡ୍ଡିଙ୍କୁ ଏବେ ପୁଣି ଥରେ ଟିମ୍ ଇଣ୍ଡିଆରେ ସାମିଲ କରାଯାଇଛି । ସେ ଅଧିନାୟକ ଶୁବମନ ଗିଲଙ୍କ ବଦଳ ସ୍ୱରୂପ ଦଳରେ ପୁନର୍ବାର ଯୋଗ ଦେଇଛନ୍ତି । ଗିଲ୍ ମଧ୍ୟ ଦଳ ସହିତ ଗୌହାଟି ଯାତ୍ରା କରିବେ, କିନ୍ତୁ ତାଙ୍କର ଦ୍ବିତୀୟ ଟେଷ୍ଟ ଖେଳିବା ସମ୍ଭାବନା କମ୍ ରହିଛି ।

ଦ୍ୱିତୀୟ ଟେଷ୍ଟରେ କୁଲଦୀପ ଯାଦବଙ୍କ ଅଂଶଗ୍ରହଣ ମଧ୍ୟ ସମ୍ଭାବନା କମ୍

ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଚାଇନାମ୍ୟାନ୍ ସ୍ପିନର କୁଲଦୀପ ଯାଦବ ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଟେଷ୍ଟରେ ଖେଳିନପାରନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ, କୁଲଦୀପ ଯାଦବ ନଭେମ୍ବର ଶେଷରେ ବିବାହ କରୁଛନ୍ତି । ତେଣୁ ସେ ଛୁଟିରେ ଯାଇପାରନ୍ତି । ରିପୋର୍ଟରେ ଏହା ମଧ୍ୟ କୁହାଯାଇଛି ଯେ କୁଲଦୀପ ପୂର୍ବରୁ ବିସିସିଆଇକୁ ଛୁଟି ପାଇଁ ଅନୁରୋଧ କରିସାରିଛନ୍ତି ।

ଦ୍ୱିତୀୟ ଟେଷ୍ଟ ପାଇଁ ଟିମ୍ ଇଣ୍ଡିଆର ସମ୍ଭାବ୍ୟ ଚୁଡ଼ାନ୍ତ ଏକାଦଶ: କେଏଲ ରାହୁଲ, ଯଶସ୍ୱୀ ଜୟସ୍ବାଲ, ସାଇ ସୁଦର୍ଶନ, ଧ୍ରୁବ ଜୁରେଲ, ଋଷଭ ପନ୍ତ (ଅଧିନାୟକ ଏବଂ ୱିକେଟକିପର), ନୀତିଶ କୁମାର ରେଡ୍ଡୀ, ରବିନ୍ଦ୍ର ଜାଡେଜା, ୱାଶିଂଟନ ସୁନ୍ଦର, ଅକ୍ଷର ପଟେଲ, ମହମ୍ମଦ ସିରାଜ ଏବଂ ଜସପ୍ରୀତ ବୁମରାହ