Virat Kohli Lionel Messi / ଭାରତ ଫେରିଲେ ବିରାଟ କୋହଲି, ଲିଓନେଲ ମେସିଙ୍କୁ କରିପାରନ୍ତି ସାକ୍ଷାତ

କିଛିଦିନର ବ୍ୟବଧାନ ପରେ ପୁଣି ଭାରତ ଫେରିଲେ ଟିମ୍ ଇଣ୍ଡିଆର ଷ୍ଟାର କ୍ରିକେଟ୍‌ର ବିରାଟ କୋହଲି । ବିରାଟ କୋହଲି ଓ ତାଙ୍କ ପତ୍ନୀ ଅନୁଷ୍କା ଶର୍ମାଙ୍କୁ ଆଜି ମୁମ୍ବାଇ ବିମାନ ବନ୍ଦରରେ ଦେଖିବାକୁ ମିଳିଛି । ତେବେ ଚର୍ଚ୍ଚା ହେଉଛି କି ବିରାଟ ଓ ଅନୁଷ୍କା ଷ୍ଟାର ଫୁଟବଲ୍‌ର ଲିଓନେଲ ମେସିଙ୍କୁ ଭେଟିବାକୁ ଭାରତ ଆସିଛନ୍ତି ।
ଅନୁଷ୍କା ଶର୍ମା ଏବଂ ବିରାଟ କୋହଲି ବହୁତ ଦିନ ଧରି ଲଣ୍ଡନରେ ରହୁଛନ୍ତି । ତେବେ ସେମାନଙ୍କ ଭାରତ ଗସ୍ତର ସଠିକ୍ କାରଣ ଏପର୍ଯ୍ୟନ୍ତ ଜଣା ପଡ଼ିନାହିଁ । ଆଶା କରାଯାଉଛି ଯେ ଏହି ଦମ୍ପତି ମୁମ୍ବାଇରେ ଲିଓନେଲ ମେସିଙ୍କୁ ସାକ୍ଷାତ କରିପାରନ୍ତି ।

ସୂଚନା ଅନୁସାରେ, ନିକଟରେ ଶେଷ ହୋଇଥିବା ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍‌ ପୂର୍ବରୁ ଭାରତକୁ ଆସିଥିଲେ ବିରାଟ କୋହଲି । ଆଉ ଦିନିକିଆ ସିରିଜ୍‌ରେ ଦମଦାର ପ୍ରଦର୍ଶନ କରିଥିଲେ । ୩ ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ୍‌ରେ ବିରାଟ କୋହଲି ପ୍ରଥମ ଦୁଇ ମ୍ୟାଚ୍‌ରେ ଶତକ ହାସଲ କରିଥିଲେ ଏବଂ ତୃତୀୟ ଦିନିକିଆରେ ଅପରାଜିତ ୬୫ ରନ୍ କରିଥିଲେ । ଆଉ ଏହି ସିରିଜ୍‌ ଶେଷ ହେବା ପରେ ସେ ପୁଣି ଲଣ୍ଡନ ଚାଲି ଯାଇଥିଲେ । ଆଉ ଏବେ ପୁଣି ଥରେ ମେସିଙ୍କୁ ଦେଖା କରିବାକୁ ଭାରତ ଆସିଛନ୍ତି ବୋଲି ଚର୍ଚ୍ଚା ହେଉଛି ।

ଅଧିକ ପଢ଼ନ୍ତୁ: ମେସିଙ୍କୁ ଦେଖିବାକୁ ଷ୍ଟାଡିୟମରେ ଖଣ୍ଡଯୁଦ୍ଧ, ଫିଙ୍ଗିଲେ ବୋତଲ ଓ ଚେୟାର...କ୍ଷମା ମାଗିଲେ ମୁଖ୍ୟମନ୍ତ୍ରୀ

ଲିଓନେଲ ମେସି ତାଙ୍କର ତିନି ଦିନିଆ "GOT India Tour 2025" ପାଇଁ ଭାରତରେ ଅଛନ୍ତି । ଯାହା ଚାରୋଟି ସହରରେ ଅନୁଷ୍ଠିତ ହେବ ଏବଂ କୋଲକାତାରୁ ଆରମ୍ଭ ହେବ । ମେସି ଆଜି କୋଲକାତାରେ ଅଛନ୍ତି ଏବଂ ଶାହରୁଖ ଖାନ ମଧ୍ୟ ତାଙ୍କୁ ଭେଟିବାକୁ ପହଞ୍ଚିଛନ୍ତି । ଶନିବାର ସକାଳେ ଶାହରୁଖ ତାଙ୍କ ସାନ ପୁଅ ଅବରାମଙ୍କ ସହ କୋଲକାତାରେ ପହଞ୍ଚି ମେସିଙ୍କୁ ସାକ୍ଷାତ କରିଥିଲେ ।

ସେପଟେ ଷ୍ଟାର ଫୁଟବଲର ଲିଓନାଲ ମେସିଙ୍କୁ ଦେଖିବାକୁ ପ୍ରବଳ ହଙ୍ଗାମା । କୋଲକାତାର ସଲ୍ଟ ଲେକ୍ ଷ୍ଟାଡିୟମରେ ମେସିଙ୍କ ଏକ ଝଲକ ଦେଖିବା ପାଇଁ ହଜାର ହଜାର ଫୁଟବଲ ପ୍ରେମୀ ଏକାଠି ହୋଇଥିଲେ । କିନ୍ତୁ ମେସିଙ୍କୁ ଦେଖିପାରିନଥିଲେ । ଯାହାଫଳରେ ଷ୍ଟାଡିୟମରେ ଉପସ୍ଥିତ ଥିବା ଲୋକେ ସେଠାରେ ହଙ୍ଗାମା କରିଛନ୍ତି । ମେସିଙ୍କର ଟିକେ ଝଲକ ନ ମିଳିବାରୁ ପ୍ରଶଂସକମାନେ ଷ୍ଟାଣ୍ଡରୁ ବୋତଲ ଏବଂ ଚେୟାର ଫିଙ୍ଗିବା ଆରମ୍ଭ କରିଦେଲେ । ପରିସ୍ଥିତି ବିଗିଡ଼ିବା ପରେ ଲିଓନେଲ୍ ମେସିଙ୍କୁ କଡ଼ା ସୁରକ୍ଷା ମଧ୍ୟରେ ସଲ୍ଟ ଲେକ୍ ଷ୍ଟାଡିୟମରୁ ବାହାରକୁ ନିଆଯାଇଥିଲା ।