ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜ୍‌ରେ ଦମଦାର ପ୍ରଦର୍ଶନରେ ଘରୋଇ ମ୍ୟାଚ୍‌ ଖେଳୁଛନ୍ତି ବିରାଟ କୋହଲି । ସେ ବିଜୟ ହଜାରେ ଟ୍ରଫିର ପ୍ରଥମ ଦୁଇଟି ମ୍ୟାଚ୍‌ ଖେଳିଛନ୍ତି । ଆଉ ଏବେ ବିରାଟ କୋହଲି ବିଜୟ ହଜାରେ ଟ୍ରଫିରେ ଦିଲ୍ଲୀ ପାଇଁ ତାଙ୍କର ତୃତୀୟ ମ୍ୟାଚ୍ ଖେଳିବାକୁ ପ୍ରସ୍ତୁତ ବୋଲି ସୂଚନା ମିଳିଛି । ଏହି ଅଭିଜ୍ଞ ବ୍ୟାଟସମ୍ୟାନ ଜାନୁଆରୀ ୬ ତାରିଖରେ ବେଙ୍ଗାଲୁରୁରେ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (ବିସିସିଆଇ) ସେଣ୍ଟର ଅଫ୍ ଏକ୍ସଲେନ୍ସରେ ରେଲୱେ ବିପକ୍ଷରେ ମ୍ୟାଚ୍ ଖେଳିବେ ବୋଲି ଆଶା କରାଯାଉଛି । ଦିଲ୍ଲୀ ଏବଂ ଜିଲ୍ଲା କ୍ରିକେଟ୍ ସଂଘ (ଡିଡିସିଏ) ସଭାପତି ରୋହନ ଜେଟଲି କୋହଲିଙ୍କ ଉପଲବ୍ଧତା ସମ୍ପର୍କରେ ଜାତୀୟ ଗଣମାଧ୍ୟମରେ କହିଛନ୍ତି । ସେ କହିଛନ୍ତି, ବିଜୟ ହଜାରେ ଟ୍ରଫିର ତିନୋଟି ମ୍ୟାଚ୍‌ ପାଇଁ ତାଙ୍କର ଉପଲବ୍ଧତା ସ୍ପଷ୍ଟ କରିଛନ୍ତି ବୋଲି ବିରାଟ କହିଛନ୍ତି ।

ବିରାଟ କୋହଲି ଖେଳିଥିବା ଦୁଇଟି ଘରୋଇ ମ୍ୟାଚ୍‌ରେ ଦମଦାର ପ୍ରଦର୍ଶନ କରିଥିଲେ । ସେ ପ୍ରଥମ ମ୍ୟାଚ୍‌ରେ ୧୩୧ ରନ୍‌ ଓ ଦ୍ବିତୀୟ ମ୍ୟାଚ୍‌ରେ ୭୭ ରନ୍‌ କରିଥିଲେ । ସେ ଲିଷ୍ଟ ଏ କ୍ରିକେଟରେ ୧୬ ହଜାର ରନ୍‌ ମଧ୍ୟ ପୂରଣ କରିଥିଲେ । ସଚିନ ତେନ୍ଦୁଲକରଙ୍କୁ ପଛରେ ପକାଇ ଏହି ସଫଳତା ହାସଲ କରିବାରେ କୋହଲି ଦ୍ରୁତତମ ବ୍ୟାଟସମ୍ୟାନ୍ ହୋଇଥିଲେ।

ଘରୋଇ ମ୍ୟାଚ୍ ପୂର୍ବରୁ କୋହଲି ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ । ସେ ଲଗାତାର ଦୁଇଟି ଶତକ ଏବଂ ତା'ପରେ ଏକ ଅର୍ଦ୍ଧଶତକ ହାସଲ କରିଥିଲେ । ଯାହା ଭାରତକୁ ୨-୧ ରେ ସିରିଜ୍ ଜିତିବାରେ ସାହାଯ୍ୟ କରିଥିଲା ।
ରିପୋର୍ଟ ଅନୁସାରେ, ଭାରତୀୟ ଦଳ ଜାନୁଆରୀ ୮ ତାରିଖରେ ଭଦୋଦରାରେ ଏକତ୍ରିତ ହେବ । ସମ୍ଭବତଃ କୋହଲି ଗୋଟିଏ ଦିନ ପୂର୍ବରୁ ପହଞ୍ଚି ପ୍ରଶିକ୍ଷଣ ଆରମ୍ଭ କରିବେ । ନ୍ୟୁଜିଲାଣ୍ଡ ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ଜାନୁଆରୀ ୧୧ ତାରିଖରୁ ଆରମ୍ଭ ହେବ । ପ୍ରଥମ ମ୍ୟାଚ୍ ଭଦୋଦରାରେ ଖେଳାଯିବ।

ରିପୋର୍ଟ ଅନୁଯାୟୀ, ହାର୍ଦ୍ଦିକ ପାଣ୍ଡ୍ୟା ଏବଂ ଜସପ୍ରିତ ବୁମରା ଏହି ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜ୍ ରେ ଅଂଶଗ୍ରହଣ କରିବେ ନାହିଁ । ୨୦୨୬ରେ ଅନୁଷ୍ଠିତ ହେବାକୁ ଥିବା T20 ବିଶ୍ୱକପରେ ଭାରତର ଅଭିଯାନ ପାଇଁ ଉଭୟ ଖେଳାଳି ଗୁରୁତ୍ୱପୂର୍ଣ୍ଣ । ଭାରତ ଡିଫେଣ୍ଡିଂ ଚାମ୍ପିଅନ୍, ଏବଂ ଏହି ଟୁର୍ଣ୍ଣାମେଣ୍ଟ ଘରୋଇ ମାଟିରେ ଖେଳାଯିବ। ତେଣୁ, ଯଦି ଭାରତ ସଫଳତାର ସହ T20 ଟାଇଟଲ୍ ରକ୍ଷା କରି ଇତିହାସ ରଚିବାକୁ ଚାହେଁ, ତେବେ ହାର୍ଦ୍ଦିକ ଏବଂ ବୁମରାହଙ୍କ ଭୂମିକା ଗୁରୁତ୍ୱପୂର୍ଣ୍ଣ ହେବ । ତେଣୁ ଉଭୟ ଷ୍ଟାର ଖେଳାଳିଙ୍କୁ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍‌ରେ ବିଶ୍ରାମ ଦିଆଯାଇପାରେ ।