୨୦୨୬ ଟି-୨୦ ବିଶ୍ୱକପ୍ ପାଇଁ ଶୁବମନ ଗିଲଙ୍କୁ ଭାରତୀୟ ଦଳରୁ ବାଦ ଦିଆଯାଇଛି । ଉପ-ଅଧିନାୟକ ହେବା ସତ୍ତ୍ୱେ ଗିଲଙ୍କୁ ବିଶ୍ୱକପ୍ ଦଳରେ ଚୟନ କରାଯାଇନାହିଁ । ଗିଲ୍‌ଙ୍କ ସ୍ଥାନରେ ଅକ୍ଷର ପଟେଲଙ୍କୁ ବର୍ତ୍ତମାନ ବିଶ୍ୱକପରେ ଉପ-ଅଧିନାୟକ ଦାୟିତ୍ୱ ଦିଆଯାଇଛି । ଏହି ବର୍ଷ ଶୁବମନଙ୍କ ଟି-୨୦ ଫର୍ମ ପୁରା ଖରାପ ରହିଛି । କିନ୍ତୁ ଅଧିନାୟକ ସୂର୍ଯ୍ୟକୁମାର ଯାଦବ କହିଛନ୍ତି ଯେ ଗିଲଙ୍କୁ ଖରାପ ଫର୍ମ ପାଇଁ ନୁହେଁ, ବରଂ ଦଳ ପରିଚାଳନା ଶୀର୍ଷ କ୍ରମରେ ଜଣେ ୱିକେଟକିପର ଚାହୁଁଥିବାରୁ ବାଦ ଦିଆଯାଇଛି ।

ଶୁବମନ ଗିଲଙ୍କୁ କାହିଁକି ବାଦ ଦିଆଯାଇଛି, ମୁହଁ ଖୋଲିଲେ ସୂର୍ଯ୍ୟକୁମାର

ସାମ୍ବାଦିକ ସମ୍ମିଳନୀରେ, ଅଧିନାୟକ ସୂର୍ଯ୍ୟକୁମାର ଯାଦବ ଶୁବମନ ଗିଲଙ୍କୁ ବାଦ ଦେବା ବିଷୟରେ କହିଛନ୍ତି, "ଖରାପ ଫର୍ମ ପାଇଁ ଶୁଭମନ ଗିଲଙ୍କୁ ବାଦ ଦିଆଯାଇନାହିଁ । ଏହା ଦଳ କମ୍ବିନେସନ୍‌ ପାଇଁ କରାଯାଇଛି । ଆମେ ଶୀର୍ଷ କ୍ରମରେ ଜଣେ ୱିକେଟ କିପର ଚାହୁଁଥିଲୁ । ଏହା ଫର୍ମ ବିଷୟରେ ଆଦୌ ନୁହେଁ । ତାଙ୍କ ଦକ୍ଷତା ବିଷୟରେ କୌଣସି ସନ୍ଦେହ ନାହିଁ; ସେ ଜଣେ ମହାନ ଖେଳାଳି। ଦଳକୁ ରିଙ୍କୁ ସିଂହ ଏବଂ ୱାଶିଂଟନ୍ ସୁନ୍ଦର ମଧ୍ୟ ଆବଶ୍ୟକ ଥିଲା।"
ସୂର୍ଯ୍ୟକୁମାର ଆହୁରି କହିଛନ୍ତି, "ଦଳ ଭିତରେ ନମନୀୟତା ସୃଷ୍ଟି କରିବା ପାଇଁ, ଅନେକ ବିକଳ୍ପ ଖୋଲା ରଖିବା ଗୁରୁତ୍ୱପୂର୍ଣ୍ଣ ଥିଲା। ସେଥିପାଇଁ ଆମେ ଏହି ଦଳକୁ ଚୟନ କରିଥିଲୁ। ଗିଲଙ୍କ କ୍ଷମତା ଉପରେ କୌଣସି ପ୍ରଶ୍ନ ନାହିଁ।"

ମୁଖ୍ୟ ଚୟନକର୍ତ୍ତା ଅଜିତ ଅଗରକର କ'ଣ କହିଥିଲେ ?

ଶୁବମନ ଗିଲଙ୍କ ବାଦ୍ ପଡ଼ିବା ଉପରେ ପ୍ରତିକ୍ରିୟା ଦେଇ ମୁଖ୍ୟ ଚୟନକର୍ତ୍ତା ଅଜିତ ଅଗରକର କହିଛନ୍ତି, "ନିରନ୍ତରତା ଏଥିରେ ଏକ ବଡ଼ ଭୂମିକା ଗ୍ରହଣ କରିଥିଲା। ଶୁଭମନ ଉପ-ଅଧିନାୟକ ଥିଲେ। ଯେହେତୁ ସେ ଆଉ ଦଳରେ ନାହାନ୍ତି, ତେଣୁ ଆଉ ଜଣଙ୍କୁ ତାଙ୍କ ସ୍ଥାନ ପୂରଣ କରିବାକୁ ପଡ଼ିବ । ପୂର୍ବରୁ, ଯେତେବେଳେ ଗିଲ୍‌ ଟେଷ୍ଟ କ୍ରିକେଟ ଦାୟିତ୍ୱ ଯୋଗୁଁ ଟି-୨୦ ଖେଳୁ ନଥିଲେ, ଅକ୍ଷର ପଟେଲ ଉପ-ଅଧିନାୟକ ଭାବରେ କାର୍ଯ୍ୟ କରିଥିଲେ। ନୂତନ ବିବୃତ୍ତି ଜାରି କରିବା ପରିବର୍ତ୍ତେ ନିରନ୍ତରତା ବଜାୟ ରଖିବା ପାଇଁ ପୁଣି ଥରେ ଅକ୍ଷର ପଟେଲଙ୍କୁ ଉପ-ଅଧିନାୟକ ଦାୟିତ୍ବ ଦିଆଯାଇଛି'।

ଟି-୨୦ ବିଶ୍ୱକପ୍ ପାଇଁ ୧୫ ଜଣିଆ ଭାରତୀୟ ଦଳ : ସୂର୍ଯ୍ୟକୁମାର ଯାଦବ (ଅଧିନାୟକ), ଅକ୍ଷର ପଟେଲ (ଉପ-ଅଧିନାୟକ), ଅଭିଷେକ ଶର୍ମା, ତିଲକ ବର୍ମା, ହାର୍ଦ୍ଦିକ ପାଣ୍ଡ୍ୟା, ଶିବମ୍ ଦୁବେ, ସଞ୍ଜୁ ସାମସନ (ୱିକେଟକିପର), କୁଲଦୀପ ଯାଦବ, ବରୁଣ ଚକ୍ରବର୍ତ୍ତୀ, ଜସପ୍ରିତ ବୁମରାହ, ଅର୍ଶଦୀପ ସିଂହ, ରିଙ୍କୁ ସିଂହ, ହର୍ଷିତ ରାଣା, ୱାଶିଂଟନ ସୁନ୍ଦର ଏବଂ ଇଶାନ କିଷାନ (ୱିକେଟକିପର)