ଭୋପାଳ: ବାର୍‌ଗି ଡ୍ୟାମ୍‌ରେ ବଡ଼ ଅଘଟଣ । ବୁଡ଼ିଗଲା ପର୍ଯ୍ୟଟକଙ୍କୁ ନେଇ ଯାଉଥିବା ବୋଟ୍ । ମଧ୍ୟପ୍ରଦେଶ ଜବଲପୁରର ବାର୍‌ଗି ଡ୍ୟାମ୍‌ରେ ବୋଟ୍ ବୁଡ଼ିଯାଇ ୪ ଜଣଙ୍କ ମୃତ୍ୟୁ ହୋଇଛି । ଏକାଧିକ ଯାତ୍ରୀ ନିଖୋଜ ରହିଥିବା ବେଳେ ଜାରି ରହିଛି ଉଦ୍ଧାର କାର୍ଯ୍ୟ ।

ସୂଚନା ଅନୁସାରେ, ବାର୍‌ଗି ଡ୍ୟାମ୍‌ରେ ଚାଲୁଥିବା ଯନ୍ତ୍ରଚାଳିତ ବୋଟ୍‌ରେ ଭରପୂର ଯାତ୍ରୀ ଥିଲେ । ପ୍ରାୟ ୩୦ ଜଣ ଯାତ୍ରୀଙ୍କୁ ନେଇ ବୋଟ୍ ଆଗକୁ ବଢ଼ୁଥିଲା । ନର୍ମଦା ନଦୀର ପଛୁଆ ପାଣି ସୁଅକୁ କାଟି ବୋଟ୍ ଆଗକୁ ବଢ଼ୁଥିବା ବେଳେ ବହିଥିଲା ପବନ ।

ଏଥିସହ ପଢ଼ନ୍ତୁ: ରୋଷେଇ ବେଳେ ଭୟଙ୍କର ଗ୍ୟାସ ବିସ୍ଫୋରଣ: ଗୋଟିଏ ପରିବାରର ୭ ଜଣ ଗୁରୁତର 

ଆଉ ଦେଖୁ ଦେଖୁ ଡ୍ୟାମ୍‌ରେ ଓଲଟି ପଡ଼ିଥିଲା ବୋଟ୍‌ଟି । ଜବଲପୁର ଜିଲ୍ଲାପାଳ ରାଘବେନ୍ଦ୍ର ସିଂହ ବୋଟ୍ ବୁଡ଼ି ଘଟଣାକୁ ସ୍ପଷ୍ଟ କରିଛନ୍ତି । ଏହି ଦୁର୍ଘଟଣାରେ ୪ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଛି । ୧୫ ଜଣଙ୍କୁ ଉଦ୍ଧାରକାରୀ ଦଳ ଉଦ୍ଧାର କରିଛନ୍ତି ।

ଉଦ୍ଧାର କାର୍ଯ୍ୟ ଜାରି

ସୂଚନା ଅନୁସାରେ, ଉଦ୍ଧାରକାରୀ ଦଳ ଦ୍ଵାରା ରେସ୍କ୍ୟୁ ଅପରେସନ୍ ଜାରି ରହିଛି । ସ୍ଥାନୀୟ ପ୍ରଶାସନ ଓ ପୋଲିସ ସ୍ଥିତି ଉପରେ ନଜର ରଖିଛନ୍ତି । ୧୫ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଏକାଧିକ ନିଖୋଜ ଅଛନ୍ତି । ଏବେ ସୁଦ୍ଧା ୪ ଜଣଙ୍କ ମୃତଦେହ ମିଳିଛି ।

ଏଥିସହ ପଢ଼ନ୍ତୁ: ଭୟଙ୍କର ସଡ଼କ ଦୁର୍ଘଟଣା: ଚଳନ୍ତା କାର ନିଆଁ ପିଣ୍ଡୁଳାରେ ପରିଣତ…ଜଣେ ଝିଅ ସମେତ ୫ଜଣ ଜୀବନ୍ତ ଦଗ୍ଧ 

୪ ଜଣଙ୍କ ମୃତ୍ୟୁ ହୋଇଥିବା ଜବଲପୁର ଜିଲ୍ଲାପାଳ ରାଘବେନ୍ଦ୍ର ସିଂହ ସ୍ପଷ୍ଟ କରିଛନ୍ତି । ଏକାଧିକ ଲୋକ ଆହତ ହୋଇଥିବା ବେଳେ ନିଖୋଜଙ୍କୁ ଖୋଜାଖୋଜି ଚାଲିଛି । ପ୍ରଶାସନ ଉଦ୍ଧାର କାର୍ଯ୍ୟ ଉପରେ ଗୁରୁତ୍ଵ ଦେଉଥିବା କହିଛନ୍ତି ଜିଲ୍ଲାପାଳ ।

इस हादसे में जो जनहानि हुई है, वह अत्यंत पीड़ादायक है। शोकाकुल परिजनों के प्रति मेरी गहरी संवेदनाएं हैं।

मृतकों के परिवारजनों को राज्य शासन की ओर से ₹4-4 लाख की आर्थिक सहायता प्रदान करने के निर्देश दिए हैं।

— Dr Mohan Yadav (@DrMohanYadav51) April 30, 2026

ମୁଖ୍ୟମନ୍ତ୍ରୀଙ୍କ ଶୋକ

ଜବଲପୁର ବାର୍‌ଗି ଡ୍ୟାମ୍‌ରେ ବୋଟ୍ ବୁଡ଼ିଯିବାକୁ ନେଇ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ଦୁଃଖ ପ୍ରକାଶ କରିଛନ୍ତି । ଏକ୍ସ ପୋଷ୍ଟରେ ଶୋକ ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ । ଝଡ଼ ତୋଫାନ ଯୋଗୁଁ ବୋଟ୍ ବୁଡ଼ି ଯାଇଛି । ସ୍ଥାନୀୟ ପ୍ରଶାସନ ଏବଂ ଉଦ୍ଧାରକାରୀ ଦଳ ରେସ୍କ୍ୟୁ ଜାରି ରଖିଛନ୍ତି ।