ବେଙ୍ଗାଲୁରୁ: କର୍ଣ୍ଣାଟକର ରାଜଧାନୀ ବେଙ୍ଗାଲୁରୁ ଦକ୍ଷିଣ ତାଲୁକର ମଦାପଟ୍ଟାନାରେ ଏକ ପଥର ଖଣିରେ ଏକ ବଡ଼ ଦୁର୍ଘଟଣା ଘଟିଛି । ୭ଜଣ ଶ୍ରମିକଙ୍କ ଉପରେ ଏକ ବିରାଟ ପଥର ପଡ଼ିବାରୁ ସେମାନଙ୍କ ମୃତ୍ୟୁ ଘଟିଛି । ଭୋର ସମୟରେ ଏହି ଦୁଃଖଦ ଘଟଣା ଘଟିଛି । ମୃତକମାନେ ସମସ୍ତେ ଏକ ପଥର କ୍ରସରରେ କାମ କରୁଥିବା ଦିନମଜୁରିଆ ଶ୍ରମିକ ଥିଲେ । ବର୍ତ୍ତମାନ ଉଦ୍ଧାର କାର୍ଯ୍ୟ ଜାରି ରହିଛି । ଫସି ରହିଥିବା ଶ୍ରମିକଙ୍କୁ ଖୋଜିବା ପାଇଁ ପୋଲିସ ଏବଂ ଉଦ୍ଧାର ଦଳ ଭଗ୍ନାବଶେଷ ହଟାଇବା ଆରମ୍ଭ କରିଛନ୍ତି ।

• ଦୁର୍ଘଟଣା ପରେ କ’ଣ ହେଲା?

ଅଧିକାରୀମାନେ କହିଛନ୍ତି ଯେ ମୃତକଙ୍କ ମୃତଦେହ ଏପର୍ଯ୍ୟନ୍ତ ପଥର ତଳୁ ଉଦ୍ଧାର କରାଯାଇନାହିଁ । ବଡ଼ ବଡ଼ ପଥର ଖସିପଡ଼ିବାରୁ, ଖଣିରେ ପଥର କାଟୁଥିବା ଯନ୍ତ୍ରପାତି ବି କ୍ଷତିଗ୍ରସ୍ତ ହୋଇଛି । ଘଟଣାସ୍ଥଳରେ କାମ କରୁଥିବା ଜଣେ ଶ୍ରମିକ ବିନୋଦ କହିଛନ୍ତି, "ପୀଡିତମାନେ ନାଇଟ ସିଫ୍ଟ ପରେ କାମ ଆରମ୍ଭ କରିଥିଲେ । ପଥରଗୁଡ଼ିକ ପଡ଼ିବା ସମୟରେ ଅନେକ ଶ୍ରମିକ ଏହା ତଳେ ଚାପି ହୋଇଯାଇଥିଲେ। କେତେକଙ୍କ ଗୋଡ଼ ହାତ କଟିଯାଇଛି । ଆମେ ସେମାନଙ୍କୁ ବଞ୍ଚାଇବା ପାଇଁ କିଛି କରିପାରିଲୁ ନାହିଁ। ମୁଁ ଏକ ମେସିନ୍ ଚଲାଉଥିଲି ଏବଂ ଘଟଣାସ୍ଥଳରୁ ପ୍ରାୟ ୧୦ ମିଟର ଦୂରରେ ଥିଲି । ପୀଡିତମାନେ ଖଣିରେ ଖନନ କରୁଥିଲେ ଏବଂ ସେମାନଙ୍କ ଉପରେ ଥିବା ପଥରଗୁଡ଼ିକୁ ଦେଖିପାରି ନଥିଲେ ।"

• ପୋଲିସ କ’ଣ କହିଲା?

ଘଟଣା ସମ୍ପର୍କରେ ସୂଚନା ପାଇବା ପରେ ଖଣି ଖନନ ସ୍ଥଳରେ ପୋଲିସ ପହଞ୍ଚିଥିଲା । ଶ୍ରମିକମାନେ ଏକ ଭୁଶୁଡ଼ି ପଡ଼ିଥିବା ପଥର ତଳେ ଫସି ଯାଇଥିଲେ ଏବଂ ଘଟଣାସ୍ଥଳରେ ହିଁ ସେମାନଙ୍କର ମୃତ୍ୟୁ ହୋଇଥିଲା । ପୋଲିସ କହିଛି ଯେ ଶ୍ରମିକମାନେ ଖଣି କାର୍ଯ୍ୟରେ ନିୟୋଜିତ ଥିବା ସମୟରେ ଏହି ଦୁର୍ଘଟଣା ଘଟିଥିଲା । ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ଉଦ୍ଧାରକାରୀ ଦଳ ଏବଂ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ।

• ଆହତଙ୍କ ଜାରି ରହିଛି ଚିକିତ୍ସା

ଆହତମାନଙ୍କୁ ଚିକିତ୍ସା ପାଇଁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ପ୍ରାରମ୍ଭିକ ରିପୋର୍ଟରୁ ଜଣାପଡିଛି ଯେ ଅନେକ ଶ୍ରମିକ ଆହତ ହୋଇଛନ୍ତି । ଆହତଙ୍କ ସଠିକ୍ ସଂଖ୍ୟା ଏପର୍ଯ୍ୟନ୍ତ ନିଶ୍ଚିତ କରାଯାଉଛି । ଅନ୍ୟ କୌଣସି ଶ୍ରମିକ ଫସି ରହିଛନ୍ତି କି ନାହିଁ ତାହା ସ୍ପଷ୍ଟ ହେବା ପାଇଁ ଅଧିକାରୀମାନେ ଭଗ୍ନାବଶେଷ ସଫା କରିବା ଆରମ୍ଭ କରିଥିଲେ । ଆଉ କୌଣସି ଅଘଟଣକୁ ରୋକିବା ଲାଗି ଅଘଟଣ ପରେ ତୁରନ୍ତ ଅଞ୍ଚଳକୁ ସିଲ୍ କରାଯାଇଥିଲା । ଜଣେ ଶ୍ରମିକ ସୂଚନା ଦେଇଛନ୍ତି ଯେ ଦୁର୍ଘଟଣାସ୍ଥଳରେ ପ୍ରାୟ ୧୮ ଜଣ ଶ୍ରମିକ ଉପସ୍ଥିତ ଥିଲେ ।

ପଢନ୍ତୁ ଏହି ଖବର: 'ପ୍ରାକୃତିକ ପ୍ରସବ' ପାଇଁ ପରିବାର ଜିଦ୍ ନେଲା ମହିଳାଙ୍କ ଜୀବନ; କେମିତି ଅଛି ନୂବଜାତ ଶିଶୁ ?

• ବିହାରରେ ଥିଲା ସମସ୍ତ ମୃତ ଶ୍ରମିକ

ତାଙ୍କ ଅନୁସାରେ, ପ୍ରାୟ ୪୦ ଫୁଟ ଉଚ୍ଚତାରୁ ହଠାତ୍ ଏକ ବଡ଼ ପଥର ସେମାନଙ୍କ ଉପରେ ପଡ଼ିଲା । ପୋଲିସ କହିଛି ଯେ ସମସ୍ତ ମୃତକ ବିହାରର ମୂଳ ବାସିନ୍ଦା । ଏହି ଦୁଃଖଦ ଘଟଣା ବିଷୟରେ ସେମାନଙ୍କ ପରିବାରକୁ ଜଣାଇବା ପାଇଁ ପ୍ରୟାସ ଚାଲିଛି । ପଥର ଖସିବାର ସଠିକ୍ କାରଣ ଜଣାପଡ଼ିନଥିବାବେଳେ ତଦନ୍ତ ଆରମ୍ଭ କରାଯାଇଛି । ଖଣିରେ ସୁରକ୍ଷା ମାନଦଣ୍ଡର କୌଣସି ଉଲ୍ଲଂଘନ କିମ୍ବା ଅବହେଳା ହୋଇଛି କି ନାହିଁ ତାହା ମଧ୍ୟ ପୋଲିସ ତଦନ୍ତ କରୁଛି ।

Pained by the loss of lives in an accident at a stone quarry in Bengaluru Urban District of Karnataka. My heartfelt condolences to the bereaved families. I pray for speedy recovery of those injured.

— President of India (@rashtrapatibhvn) July 2, 2026

• ଦୁଃଖ ପ୍ରକାଶ କଲେ ରାଷ୍ଟ୍ରପତି

ପଥର ଖଣିରେ ହୋଇଥିବା ଏହି ଦୁଃଖଦ ଦୁର୍ଘଟଣା ସମଗ୍ର ଦେଶକୁ ମର୍ମାହତ କରିଛି । ରାଷ୍ଟ୍ରପତି ଦ୍ରୌପଦୀ ମୁର୍ମୁ, ଉପରାଷ୍ଟ୍ରପତି ସି.ପି. ରାଧାକୃଷ୍ଣନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୭ ଜଣ ଶ୍ରମିକଙ୍କ ମୃତ୍ୟୁ ପାଇଁ ଗଭୀର ଶୋକ ପ୍ରକାଶ କରିଛନ୍ତି । ଏହାସହିତ ଆହତମାନଙ୍କ ଆଶୁ ଆରୋଗ୍ୟ ମଧ୍ୟ କାମନା କରିଛନ୍ତି ।